GALUEGA 25 - Tuvalu Revised Bible

Ko te Tagi a Paulo ki te Kaisala

1E tusa mo te tolu o aso mai tua ifo, i te okomaiga a Feso ki te koga tela mai lalo o tena pulega, kae toe malaga atu a ia mai Kaisaleia ki Ielusalema.

2Ne olo atu ki a ia i kona a faitaulaga sili mo takitaki o Iutaia, o avatu olotou mau e uiga ki a Paulo. Ne fakamolemole atu foki latou ki a Feso,

3ke fakamalie ake olotou loto, ke aumai a Paulo ki Ielusalema, i te mea ko oti ne fai te lotou pulepulega o tamate a Paulo manafai e vau.

4Ne tali atu a Feso: “A Paulo e saisai nei fakapagota i Kaisaleia, ka ko au nei e toe foki fakavave ki ei.

5Tela la, ke olo fakatasi matou mo otou pule, ko te mea ke 'moli ne latou a Paulo ke fakasala, manafai e isi sena mea 'se ne fai.”

6Kati e tusa mo te valu io me sefulu aso ne nofo ei a Feso i a latou, toe foki ei ki Kaisaleia. I te sua aso, ko nofo i luga i tona nofoga fakamasino, kae fakatonu atu ke aumai a Paulo ki ona mua o fakamasino.

7I te vauga a Paulo, ka ko Iutaia kola ne o'mai mai Ielusalema ne mumu atu ki a ia, kamata eiloa o fai olotou molimau o fakamasei a ia, kae ne se mafai eiloa ne latou o fakatalitonu olotou mau.

8Ne fai te molimau a Paulo ke sao a ia, ana muna, “E seai eiloa saku mea 'se kai fai ki te Tulafono a Iutaia, io me ki te Fale Tapu io me ki te Kaisala.”

9Ne manako a Feso o fakamalie a tino Iutaia, tela fai atu ei ana pati ki a Paulo, “E manako koe o fano ki Ielusalema, ke fakamasino ei koe i oku mua e tusa mo molimau konei?”

10Ne tali mai Paulo, “Au e tu atu nei i mua o te fono fakamasino a te Kaisala, tela e 'tau o fakamasino ei au. E iloa 'lei eiloa ne koe, me seai saku mea 'se ne fai ki tino Iutaia.

11Moi fai ko oti ne ofa ne au a te tulafono, kae fai foki se mea ko 'tau ei au o fakasala ki te mate, e penei e se taumafai au ke sao mai i ei. Kae nei, e se tonu olotou mau e uiga ki a au, tela la, e seai foki se tino e mafai ne ia o tuku atu au ki a latou. Nei la, au ko tagi ki te Kaisala.”

12I te otiga ne fai'pati fakatasi a Feso mo tena kau fono, tali atu ei a ia, “Ko oti nei koe ne fai tau tagi ki te Kaisala, tela la, e 'tau mo koe o fano ki te Kaisala.”

Ko Paulo i Mua o Akelipa mo Pelenike

13Ko teka atu a nisi aso, kae o'mai a te tupu ko Akelipa mo Pelenike o asi atu ki a Feso i Kaisaleia.

14Ne 'nofo i kona i ne aso; tela fakamatala atu ei ne Feso ki te tupu a te fakalavelave e tupu ki a Paulo: “E isi se tagata i konei mai aso o Filiki, koi saisai nei eiloa fakapagota,

15kae i taku fanoga ki Ielusalema, ne o'mai faitaulaga sili mo toeaina o Iutaia, o fai mai olotou mau e uiga ki a ia. Ne fai mai foki ke fakasala 'mafa ne au.

16Ne fakamatala atu ne au ki a latou, me se se faifaiga a te malo Loma o fakasala se tino, seiloga ko oti ne tu i mua o te fono a te tino ne 'moli mo te tino tela ne 'moli ne ia, kae isi foki se avanoa e tuku atu, ke taumafai ei a ia o fai ne ana fakasako e sao ei a ia.

17I te lotou okomaiga katoa ki konei, ne seki fakatalave eiloa au; taeao ake nofo eiloa au i toku nofoga fakamasino, kae fakatonu atu ke aumai a ia tena ki mua o te fono.

18Ne 'tu ake ona fili, kae ne seki 'moli mai ne latou a ia i sala kola ne mafaufau au ki ei.

19E fakaautu katoa olotou mau ki a ia, e uiga ki te lotou lotu, pela foki ki te tagata ko mate e igoa ki a Iesu; tela e folafola sale ne Paulo me ola nei.

20Ko 'numi toku mafaufau me ka sukesuke pefea a te tonuga o mau konei, tela fesili atu ei au ki a Paulo me fia fano a ia ki Ielusalema, ke fai ei tona fakamasinoga mō mau konei.

21Ne fakatagi mai Paulo ke tuku eiloa a ia penei fakapagota ke tausi ne leoleo, ka ke tuku tona fakamasinoga ke fakaiku ne te Kaisala. Tela, fakatonu atu ei au ke leoleo faka'lei a ia, ke oko eiloa ki te taimi e uga atu ei ne au ki te Kaisala.”

22Ne fai atu Akelipa ki a Feso, “Au foki e fia fakalogologo ki ana fakamatalaga.” Ne tali mai a Feso, “Ka fakalogologo koe ki a ia i te aso a taeao.”

23I te taeaoakega, ko o'mai a Akelipa mo Pelenike, ne fakaaloalogina malosi te la okomaiga, ulu atu ei ki loto i te fale fono mo pule o te kautau pela foki mo takitaki o te fa'kai. Aumai ei Paulo ki loto i te fale fono, e tusa eiloa mo te fakatonuga a Feso.

24Muna a Feso: “Te Tupu ko Akelipa mo tino katoa ko fakatasi tatou i te taimi nei. E matea ne koe te tagata tenei; ko ia la tenei e fakaautu ki ei a mau a tino Iutaia katoa i konei mo Ielusalema, kola ne aumai ki a au. Ne ka'laga foki latou me se 'tau o ola a ia nei.

25Ne iloa ake ne au me seai se mea e 'tau ei o fakasala a ia nei ki te mate; kae ona ne fakatagi mai a ia ke tuku atu tona fakamasinoga ki te Kaisala, ne tonu ake ei i a au ke uga atu a ia ki ei.

26E seai foki eiloa se molimau tonu tela e 'tau ei mo au o tusi ki te Kaisala, e uiga ki a ia nei. Tela la, ko oti ne aumai ne au a ia ki otou mua pela foki ki ou mua e te tupu ko Akelipa, ko te mea kafai e oti ne sukesuke faka'lei a mau e uiga ki a ia, kati ka maua ei se fakamatalaga tonu e tusi atu ei au ki te Kaisala.

27I toku mafaufau tonu, se mea se 'tau o uga atu fua se pagota ke fano ki te Kaisala, kae se fakamatala faka'lei a mau kola e 'tau ei o fakasala a ia.”