FAILAUGA 1 - Tuvalu Revised Bible

A te olaga tenei e seai se Aoga

1Konei a muna a te failauga, te tama tagata a Tavita, te tupu i Ielusalema.

2Muna a te failauga i te olaga tenei e seai se aoga.

3A te olaga o te tagata e lasi te fakamaumau ki te faiga o galuega, kae se a la te mea e maua ne ia mai ei?

4E mate atu a tupulaga konei kae mai nisi tupulaga, ka ko te lalolagi e tumau eiloa, seai se 'fuliga ki ei.

5A te la e fanake kae toe fanaifo foki, kae toe foki atu foki ki te koga ne kamata aka mai i ei.

6A te matagi e tumau foki eiloa tena agiagi — mai saute, mai matu mai nisi feitu, ka oti ko toe foki o toe kamata mai i te koga ne kamata mai i ei.

7A vaitafe katoa e tafe katoa ki te tai, ka ko te tai e se mafai eiloa o fonu maligiligi. A te vai e toe foki eiloa ki te koga ne kamata o tafe mai i ei, o toe kamata tena tamilosaga.

8A mea katoa e iku katoa ki te fita o te mafaufau, te fita tela e se mafai o fakamatala ki pati. A mata o tatou e se mafai o ma'lie i mea e lavea ne latou; e pena foki a tou taliga.

9A mea kola ne tupu muamua e toetupu katoa foki. A mea kola ne fai muamua e toe fai katoa foki eiloa. E seai eiloa se mea fou i te lalolagi nei.

10Ka fai mai a nisi tino penei, “Kiloke, tenei te mea fou!” Kae tela la, te mea tena se mea foki ko oti ne tupu.

11E seai se tino e masaua ne ia a mea ko oti ne tupu i aso ko teka, e seai foki se tino i aso fakamuli ka masaua ne ia a mea ne tupu i te taimi nei.

Ko mea ko Oti ne Iloa ne te Failauga

12A au, te failauga, ko oti ne fai mo tupu o Isalaelu ka ko au ne nofo i te laumua ko Ielusalema.

13Ne fatuaki toku loto ke sukesuke kae tauloto ne au a mea katoa kola e fai i te lalolagi tenei.

A te Atua ko oti ne fakatakato ne ia se ikuga se 'lei mō tatou katoa.

14Ko oti ne lavea ne au a mea katoa e fai i te lalolagi tenei, kae fai atu au penei me ne mea katoa e se aoga. E pela eiloa me se tino e taumafai o afuli te matagi.

15E se mafai ne se tino o faka'tonu a mea pikopiko; e se mafai ne se tino o lau a mea kola e seai i ona mua.

16 1Tupu 4.29-31 Au ne faipati ifo eiloa ki a au penei, “Au nei se tagata takutakua, e silia atu toku poto i tino katoa kola ne fai mo tupu i oku mua i Ielusalema. E iloa faka'lei ne au a te uiga o te poto mo te iloa.”

17Ne fatuaki toku loto ke tauloto ne au a te kese o te poto mo te valea, te poto mo te fakavalevale. Kae e iloa aka fakamuli ne au me i te mea e taumafai au o fai e pela eiloa me se tino e taumafai o afuli te matagi.

18Ko te lasi o tou poto, ko te uke o mea e fakalavelave ki tou mafaufau; ko te uke o mea e iloa ne koe ko te lasi foki tena o tou fi'ta.