IOSUA 8 - Tuvalu Revised Bible

Ko Takavale te Fa'kai o Ai

1Muna a te Aliki ki a Iosua, “Puke te kautau katoa kae olo ki te fa'kai o Ai. Sa ma'taku io me loto vaivai. Ka tuku atu ne au te manumalo ki a koe i te tupu o Ai. A tena fa'kai, ona tino mo tena fenua ka puke mo koutou.

2Masaua o fai ne koutou ki te fa'kai o Ai mo tena tupu, a te mea ne fai ne koutou ki te fa'kai o Ieliko mo tena tupu. I te taimi tenei, e mafai o tausi ma koutou a mea i ei, pela foki mo pulumakau. Fakatoka o puke te fa'kai i tena feitu ki tua.”

3Tena ne fakatoka ei a Iosua mo ana sotia o olo ki Ai. Ne fili aka ne ia e tolusefulu afe tino 'lei eiloa mai tena kautau, kae uga ne ia ke olo i te po

4mo te fakatonuga tenei: “Muni i te sua feitu o te fa'kai, sa to fakamao mai te fa'kai; kae fakatokatoka faeloa o taua.

5Ka olo atu matou mo taku kau o fakasae ki te fa'kai. Kafai e o'mai a te kautau a Ai o taua ki a matou, ko matou eiloa ko tele, e pela mo te afuliga foki o tatou i te taimi muamua.

6Ka afuli ne latou matou ke oko ki te taimi ko 'mao ei latou mo te lotou fa'kai. Ka manatu aka eiloa latou i a tatou e tele mai i a latou, e pela mo te taimi mua.

7Tena, ko o'mai ei koutou mai te koga e muni ei koutou o puke te fa'kai. Ko te Aliki te otou Atua ka tuku atu ne ia ki a koutou.

8Kafai ko oti ne fakatakavale ne koutou te fa'kai, ko sunu ei ne koutou, e pela eiloa mo te fakatonuga a te Aliki. Kona a fakatonuga e tau o fai ne koutou.”

9Tena, ne uga atu ei latou ne Iosua, ko latou eiloa ko olo ki te koga ne fakasino atu ke muni latou i ei, i te feitu ki te togala o Ai, i te va o Ai mo Peteli, tena, fakatalitali eiloa latou i te po i kona. A Iosua ne nofo eiloa i te koga e tu ei olotou faleie i te po tena.

10I te tafataeao, ne pula aka Iosua, fakamaopoopo ei ne ia tena kautau. Tena, taki ei ne ia mo takitaki o Isalaelu a te kautau tena ki Ai.

11Ne olo atu latou mo sotia kona ki te feitu ki te mataloa o te fa'kai, faka'tu ei olotou faleie i te feitu ki matu, kae e isi se vanu i te va o latou mo te fa'kai o Ai.

12Ne fakamuni ne ia e tusa mo te lima afe tagata i te feitu ki te togala o te fa'kai, i te va o Ai mo Peteli.

13Tena ko toka ei te kautau a Iosua, a te koga e fakamautu ei latou e i matu o te fa'kai; ka ko te toega o te kau e nofo i te feitu ki te togala. A Iosua ne nofo i te po tena i te vanu.

14I te laveaga ne te tupu o Ai a te kau a Iosua, ne fai fakavave eiloa tena tonu. Ne olo atu a ia mo tena kau ki te Vanu o te Iolitana o taua atu ki tino Isalaelu i te koga foki eiloa tela ne tau ei latou muamua, kae se iloa eiloa ne ia me ka vau te sua potukau mai ona tua.

15Ne fakaloiloi a Iosua mo tena kau i a latou ko takavale tela tele ei latou ki te vao.

16A tagata katoa i te fa'kai ne o'mai katoa o afuli latou, tena la, ko gasolo eiloa latou o mao keatea mo te lotou fa'kai.

17Ne olo katoa a tagata i te fa'kai o Ai o afuli a tino Isalaelu, tela la, ko seai eiloa se tagata e toe o 'pui te fa'kai, ka ko te fa'kai ko tuku fakasau eiloa.

18Tena ne fai mai ei te Aliki ki a Iosua penei, “Fakasaga te mata o tau tao ki te fa'kai o Ai, me ko tuku atu ne au ki a koe.” Tena, ne fai eiloa ne Iosua a te mea ne fai atu ki a ia.

19I te taimi eiloa ne sisi aka ei tena lima, ko tena kau eiloa kola ne muni ko tu aka ki luga o tele ki loto i te fa'kai, puke eiloa ne latou te fa'kai. Tena, sunu foki eiloa ne latou te fa'kai i te taimi tena.

20I te kilomaiga o tagata Ai ki olotou tua, matea ei ne latou te au e fanake ki te lagi. Ko seai eiloa se koga e sao ei latou, me i te kau kola ne afuli atu ne latou ki te vao ko mafuli mai o tau ki a latou.

21I te mateaga ne Iosua mo tena kau me ko oti ne puke ne sua vaega o latou a te fa'kai kae ko 'ka foki, ne fuli mai ei latou o tamate valevale a tagata Ai kola ne olo atu o afuli latou.

22A tagata Isalaelu kola ne puke ne latou te fa'kai, ko o'mai foki o tau fakatasi mo te kau a Iosua. Tena ne nikoi ei a tagata o Ai ne tagata Isalaelu, tena tamate katoa eiloa latou. E seai eiloa se tino ne sao keatea io me se tino ne ola

23na ko te tupu fua o Ai. Ne puke fakapagota a ia kae avatu ki a Iosua.

24Ne tamate ne tagata Isalaelu a tagata Ai katoa i te vao kola ne olo atu o afuli latou. Ne toe foki atu te kau Isalaelu ki Ai o tamate katoa a tino i ei.

25-26Ne taofi eiloa ne Iosua tena tao fakasaga ki Ai, seki tuku eiloa ne ia ki lalo ke oko ki te taimi ne 'mate katoa ei a tino i ei. Tino katoa i te fa'kai o Ai ne mate katoa i te aso tena, e sefulu lua afe tagata mo fafine.

27Ne tausi ne tino Isalaelu ma latou pulumakau mo mea taua kola ne maua ne latou i loto i te fa'kai, e pela mo pati a te Aliki ki a Iosua.

28Ne sunu ne Iosua te fa'kai o Ai, tiakina ei ne ia pena. E pena eiloa ke oko mai ki aso nei.

29Ne noaua ne ia te tupu o Ai i se lakau, fakatautau eiloa ne ia pena ke oko ki te afiafi. I te tōga o te la, ne fai te fakatonuga a Iosua ke ave ifo te foitino, tena ne pei atu ei ki te mataloa o te fa'kai. Ne taotao ne latou ki fatu, tena koi tu eiloa ke oko mai ki aso nei.

Ko Tulafono i te Mauga o Epalu

30 te kopi o Tulafono kola ne tusi ne Mose.

33Teu 11.29; 27.11-14 A tino Isalaelu mo olotou takitaki, mo ofisa, famasino, pela foki a tino fakaalofa e nofo tasi latou, e tu i feitu e lua o te Pusa o te Feagaiga, o fakasaga ki faitaulaga sa Levi kola e amo ne latou. Te afā o tino e tu mo olotou tua e fakasaga ki te Mauga o Kelisima, ka ko te sua afa e fakasaga olotou tua ki te Mauga o Epalu. Ko Mose, te tavini a te Aliki, ne fakatonu ne ia ke fai ne latou te mea tena mafai ko oko mai te taimi ka maua ei ne latou te fakamanuiaga.

34Tena ne faitau ei ne Iosua te Tulafono katoa, e aofia ei a fakamanuiaga mo fakamalaiaga, e pela eiloa mo te mea e tusi i te tusi o te Tulafono.

35A tulafono katoa a Mose ne faitau ne Iosua ki te fenua katoa, e aofia ei fafine mo tamaliki, pela foki a tino fakaalofa kola e nofo tasi latou.