1“Konei a tulafono kola e tau o tausi ne koutou i aso e nofo ei koutou i te fenua tela ne avatu ne te Aliki te Atua o otou tupuga ki a koutou. Fakalogo fakalei ke folafola atu ne au!
2Kafai ko nofo koutou i te fenua tena, masaua o ofa a koga katoa kola e tapuaki sale i ei a tino kona e nofo i te fenua ki olotou atua. Ofa katoa a koga tapuaki o latou kola e tu i luga i mauga maluga, mauga foliki, pela foki a olotou koga tapuaki i lalo i malūga o lakau.
3Teu 7.5 Ofa likiliki olotou fata-fai-taulaga, pela foki a pou fatu kola e tapuaki sale latou ki ei. Sunugina a fakatusa o te lotou atua fafine ko Asaila, kae kati ki lalo olotou tupua, ko te mea ke se toe tapuaki ne tino ki ei.
4“Sa tapuaki ki te Aliki te otou Atua e pela mo faigā tapuakiga a tino konei ki olotou atua.
5Ka filifili ne te Aliki te kogā koga e tasi mai kogā koga katoa e nofo ei a otou matakaiga e sefululua, ke fai mo koga e tapuaki atu ei a tino ki a ia.
6Tena te koga ka ofo atu ei otou taulaga sunu mo nisi taulaga a koutou, ke oko foki eiloa ki tasi vae sefulu kola e avatu ne koutou, mo meaalofa kola ne fakameaalofa ne koutou ki te Aliki, mo taulaga o te loto malie, mo uluaki tama a otou pulumakau mo mamoe.
7I kona, i mua o te Aliki tela ne fakamanuia ne ia koutou, ka kai kae fiafia koutou i mea 'lei ne galue koutou ki ei.
8“Kafai ko oko mai te taimi tena, sa toe tapuaki e pela mo otou faiga mua. A koutou mua ne masani o tapuaki ki te mea e loto koutou ki ei,
9me i a koutou e seki oko atu ki te fenua ne tauto mai te Aliki ke avatu mo koutou, te koga ka maua ei ne koutou te filemu.
10Kafai ko olo atu koutou ki te sua feitu o te Vaitafe o Iolitana, ko te Aliki ka fakanofo ne ia koutou i kona. Ka puipui ne ia koutou mai otou fili, kae ka nofo koutou mo te filemu.
11Ka fili ne te Aliki te koga e tasi e tau o tapuaki atu a tino ki a ia, kae ka avatu ki kona ne koutou a mea kola ne fakatonu atu ne au: ko taulaga sunu a koutou, mo nisi taulaga, ko tasi vae sefulu a koutou mo taulaga saito, mo nisi meaalofa fakapitoa kola ne tauto koutou ke ave ki te Aliki.
12Ke fiafia koutou o nofo i mua o te Aliki, fakatasi mo otou tamaliki, otou tavini, mo sa Levi kona e nofo i otou fa'kai; masaua i te kau sa Levi e seai ne laukele totino o latou.
13E se tau o ofo ne otou taulaga i so se koga e manako koutou ki ei.
14E tau eiloa o ofo otou taulaga i te kogā koga e tasi tela ka fili ne te Aliki i se kogā koga o te otou fenua. Tena fua eiloa te koga e tau o ofo i ei otou taulaga sunu mo nisi mea kola ne fakatonu atu ne au ke fai ne koutou.
15“Kae e mafai faeloa ne koutou o ta otou manu o kai i so se koga e nofo koutou i ei. E mafai ne koutou o kai te aofaki e manako koutou o kai. A koutou katoa, faitalia me ma io me lailai i feitu fakatapuakiga, e taga o kai ki manu kona, e pela eiloa manafai e kai i kano o tia io me ko anitilope.
16Kene 9.4; Levi 7.26,27; 17.10-14; 19.26; Teu 15.23 Kae e tapu koutou e kai ki olotou toto; e tau o ligi ne koutou ki luga i te laukele e pela me se vai.
17A mea kola ne ofo ne koutou ki te Aliki e tapu ma kai i koga e nofo ei koutou; me ko tasi vae sefulu o otou saito, uaina mo sinu olive, me ko uluaki tama a otou pulumakau mo mamoe, me ko meaalofa ne avatu ne koutou ki te Aliki, me ko taulaga lotomalie a koutou, ke oko foki eiloa ki nisi taulaga aka.
18A koutou mo otou tamaliki mo otou tavini mo sa Levi kola e nofo i te otou fa'kai, e tau koutou o kai a taulaga konei i mua o te Aliki te otou Atua, i te koga tapuaki e tasi tela ne fili ne te Aliki te otou Atua. Kae e tau mo koutou o fiafia i kona i mea katoa a koutou ne fai.
19Masaua o sa puli a te kau sa Levi i taimi katoa e nofo ei koutou i te otou fenua.
20“Kafai ko fakalasi ne te Aliki a te otou fenua, e pela mo tena tautoga, ko mafai ei ne koutou o kai ki kano o manu i so se taimi e manako koutou ki ei.
21Kafai ko to mao a te koga tapuaki tela e tasi, tela ne fakatonu atu ne au ke tapuaki katoa koutou i ei, tena la, e mafai fua ne koutou o ta se pulumakau io me se mamoe, kae kai i otou fale, e pela eiloa mo aku muna ki a koutou.
22So se tino i a koutou, faitalia me e ma i feitu fakatapuakiga me ikai, e mafai faeloa o kai ki kano manu kona, e pela eiloa manafai e kai koutou ki kano o tia io me ko anitilope.
23 Levi 17.10-14 Kae masaua fua o sa kai ki kano o manu kae koi isi ne toto i ei, me i te toto ko te ola tena, tela la, e se tau o kai ne koutou a te ola fakatasi mo te kano manu.
24Sa fakaaogagina te toto o kai ki ei, kae ave o ligi ki te laukele e pela me se vai.
25Kafai e fakalogo koutou ki te fakatonuga tenei, ko te Aliki ka fiafia ki a koutou, kae ka fanofano lei otou olaga e pela foki a tino e tupu mai i a koutou.
26Ave ki te koga tapuaki tela e tasi, a otou taulaga mo meaalofa kola ko oti ne avatu ne koutou mo te Aliki.
27Ke ofo atu ne koutou i kona a taulaga kola e tau o sunu katoa i luga i te fata-fai-taulaga a te Aliki. Ofo atu foki a taulaga kola i kano manu kola e kai ne koutou ka ko te toto e ligi ki te fata-fai-taulaga.
28Tausi fakalei ki mea katoa kola ne fakatonu atu ne au, kae ka fanofano lei otou olaga pela foki a tino i otou gafa, ki te se gata mai, me ka fai ne koutou a mea tonu mo mea e fiafia ki ei te Aliki te otou Atua.
Ko te Tapuaki ki Tupua29“Ka ta fakapalele ne te Aliki te otou Atua a malo kona e nofo i te fenua tena ka puke ne koutou mo koutou.
30Kafai ko oti ne ta fakapalele ne te Aliki a malo kona, masaua o sa tautali ki olotou tu mo amioga i olotou tapuakiga, i a koutou ma fakasala 'mafa. Sa taumafai o sukesuke ki faifaiga o tapuakiga a latou, ko te mea ke tautali koutou i olotou faifaiga.
31Sa tapuaki ki te Aliki te otou Atua e pela mo olotou tapuakiga ki olotou atua, me kafai e tapuaki latou ki olotou atua, e fai ne latou a amioga fakatakalialia katoa kola e se fiafia ki ei te Aliki. E sunu foki ne latou olotou tamaliki i luga i fata-fai-taulaga mo fai olotou taulaga.
32 Teu 4.2; Faka 22.18,19 “Ke fai ne koutou a mea katoa kola ne fakatonu atu ne au ki a koutou; sa fakaopoopogina ne mea ki ei, io me ave keatea ne mea mai i ei.
Who We AreWhat We EelieveWhat We Do
2025 by iamachristian.org,Inc All rights reserved.
