FAATAOTO 15 - Tuvalu Revised Bible

1A te tali i te leo filemu e galo ei te kaitaua, kae kafai se tino e tali mo te leo malosi e fakatupu fua ne ia te kaitaua.

2Kafai e faipati a tino poto, e gali olotou fakamatalaga e uiga ki te poto, ka ko tino valea e faipati fua ki mea se aoga.

3E lavea ne te Aliki a mea e tupu i koga katoa; e onoono mai a ia ki a tatou me e fai ne tatou a mea lei io me ikai.

4A muna alofa e aumai ne ia te ola, ka ko muna se lei e fai fua ne ia koe ke fanoanoa.

5E se tau mo koe o fakaseaoga a muna akoako a tou tamana ki a koe; e tau eiloa o talia ne koe manafai e fakatonu ne ia au mea se ne fai.

6A tino amiotonu e tausi fakalei olotou koloa, ka ko tino amio masei e galo olotou koloa i taimi o fakalavelave.

7A te poto e fakasalalau foki eiloa ne tino poto, se ko tino valea.

8A te Aliki e fiafia manafai e talo atu a tino amio lei ki a ia, kae e se fiafia ki taulaga kola e avatu ne tino amio masei ki a ia.

9A te Aliki e se fiafia ki auala o tino amio masei, kae alofa ki a latou kola e fai te mea tonu.

10Kafai e fai ne koe te mea se, e fakasala 'mafa eiloa koe; e iku eiloa koe ki te mate manafai e se talia ne koe ke fakatonu tau mea se ne fai.

11Ke oko foki eiloa ki te lalolagi o tino mate, e seai se mea i ei e se iloa ne te Aliki; e mafai la pefea ne se tino o funa ona mafaufauga mai i te Atua?

12A tino valea e se manako ke fakatonu atu latou; e se mafai ne latou o sala ne manatu fakatonutonu ki a latou kola e poto atu i a latou.

13A tino e kata manafai e fiafia, kae e mata fita manafai e fanoanoa.

14A tino poto e manako o tauloto, ka ko tino valea ko malie eiloa i te lotou valea.

15A te olaga o tino mativa se olaga kausaki i te puapuaga, ka ko tino fiafia e fiafia faeloa i te lei o olotou olaga.

16E sili atu manafai a kita e mativa kae e mataku ki te Aliki, i lo te maumea kae maua faeloa ne fakalavelave.

17E sili atu te lei manafai e kai laulakau koe fakatasi mo tino kola e alofa koe ki ei, i lo te kai meafasi gali i te koga e seai se fiafia i ei.

18A tino mata itaita e fakatupu faeloa ne latou a finauga, ka ko tino loto kufaki e aumai ne latou te filemu.

19Kafai koe e paie, ka fetaui faeloa koe mo fakalavelave i koga katoa e fano koe ki ei, kae kafai e faimeatonu koe, ka seai ne fakalavelave e oko ki a koe.

20A te tamaliki poto e fakafiafia ne ia tena tamana. Ko te tagata valea fua tela e se fiafia ki tena matua.

21A tino valea e fiafia i te lotou valea, ka ko tino poto e fai eiloa ne latou te mea tonu.

22Taumafai ke maua ne koe ne manatu fakatonutonu e uke, kae ka manuia koe; kafai e se saga koe o sala ne manatu fakatonutonu, ko tena uiga e se mafai o manuia tou taumafai.

23Ko oko eiloa i te gali kae fakafiafia manafai ko maua te tina muna tonu eiloa mo te taimi tonu tenei!

24A tino poto e sasale i te auala tela e fanake ki luga i te ola, se ko te auala tela e fanaifo ki lalo i te mate.

25A te Aliki ka ofa ne ia a fale o tino fakamatamata, kae ka puipui ne ia a mea a te fafine ko mate tena avaga.

26A te Aliki e se fiafia ki mafaufauga masei, kae e fiafia ki muna 'lei.

27Kafai e taumafai koe o sala sou maumea i se auala kaisoa, ka aumai fua ne koe se fakalavelave ki tou kaiga. Sa talia ne togi fakakolekole kae ka ola leva koe.

28A tino poto e mafaufau mua ki olotou pati kae koi tuai o fai. A tino amio masei e tali fakavave fua kae se mafaufau, tela la, e tupu ei fakalavelave.

29Kafai e talo a tino amio lei, te Aliki e fakalogologo ki olotou talo, kae e se saga ki tino amio masei.

30A tino mata katakata e fai ne ia koe ke fiafia, pela foki mo tala gali e fakafiafia ne ia koe.

31Kafai e talia ne koe ke fakatonu au mea se ne fai, a koe se tagata poto.

32Kafai koe e se fiafia o tauloto, ko tena uiga e fakatigaina fua ne koe a koe eiloa. Kafai e talia ne koe ke fakatonu au mea 'se, kae ka gasolo eiloa koe o poto.

33A te ava ki te Aliki se poto foki tena e tau o tauloto. E tau mo koe o loto malalo muamua, kae fakamuli ko mafai ei ne koe o maua se tulaga fakaaloalogina.