2 NOFOAIGA TUPU 26 - Tuvalu Revised Bible

Ko Usia te Tupu o Iuta(2Tupu 14.21-22; 15.1-7)

1A tino katoa o Iuta, ne fili ne latou a Usia, te tama tagata a Amasia, tela ko sefuluono ona tausaga, ke sui ne ia tena tamana o fai mo tupu.

2A te fa'kai o Elata ne toe puke ne ia, kae toe faite faka'lei ne ia, ka ko Amasia ei ko oti ne mate atu.

3A Usia ne fai mo tupu ka ko sefuluono ei ona tausaga, kae ne pule a ia i Ielusalema i tausaga e limasefulu lua. A tena matua, ko Iekolia mai i Ielusalema.

4Ne tautali a ia i faiga a tena tamana, me ne fakafiafia ne ia a te Aliki.

5Ne tavini fakamaoni eiloa a ia ki te Aliki, i aso ne ola ei a Sakalia, te tagata fakatonutonu a ia i mea faka‐te lotu.

6Ne fano Usia o taua ki te kau Filisitia. Ne ofa ne ia a pui o fa'kai o Kata, Iaminia, mo Asetota, kae faite aka foki ne ia ne fa'kai malosi i tafa o Asetota, pela foki i te toega o Filisitia.

7Ne fesoasoani atu te Atua ki a ia o fakatakavale a tino Filisitia, tino Alapi e nofo i Kulupaala, mo tino Meuno.

8A tino Amoni ne o'mai o asi mai ki a Usia, tena la, a Usia ko oko eiloa i te takutakua, ko oko atu foki tena takutakua ki Aikupito.

9Ne fakamalosi ne Usia a te puluga o Ielusalema, i te faitega ne ia o taoa i te Mataloa o Matulimanu, i te Mataloa o Vanu, pela foki i te gaofega o te pui.

10Ne faite foki ne ia a taoa malosi i tua o te fa'kai, kae keli ne ia a vaisameni e uke, me e uke lafu pulumakau i tafito mauga ki te togala mo koga laugatasi. Ona ko ia e fiafia ki te olaga toki lakau, tena ne fakamalosi ei ne ia a loto o tino ke toki a toga vine i laukele malugaluga, kae ke toki faka'lei a laukele ola.

11E isi sena kautau lasi eiloa ko toka mo se taua. A tala o mea e tupu e fakamau ne ana failautusi ko Ieielu mo Maseia i te pulega a Hanania, se ofisa a te tupu.

12A te kautau tena, e pulepulegina ne ofisa e tusa mo te 2,600.

13E tusa mo te 307,500 sotia i lalo o te lotou pulega, kola e toka lei o taua mō te tupu.

14Ne avatu ne Usia ki te kautau a talita, tao, pulou fiti, gatu tau, kausana mo matasana, mo fatu ei mo sanafatu.

15A tufuga a te tupu e faite ne latou a mea mo sana a matasana, mo nisi mea e sana ei a fatu lasi mai i taoa mo matulimanu o pui o te fa'kai. Ne salalau atu tena igoa ki koga katoa, ne gasolo eiloa a ia o takutakua, me i te Aliki e fesoasoani atu ki a ia.

Usia ko Fakasala

16Kae i te taimi ko malosi eiloa Usia i tena tulaga, ne gasolo ake ei a ia o fakamatamata, kamata foki eiloa i kona tena tekateka ifo ki lalo. Ne teke ne ia a te Aliki tena Atua, i tena fanatuga o sunu mea manogi i luga i te fata-fai-taulaga sunu mea manogi.

17Ne fanatu a te faitaulaga ko Asalia, fakatasi mo faitaulaga malosi kae loto toa e tinovalu, o taumafai o teke a te tupu.

18Eso 30.7,8; Nume 3.10 Muna a latou, “Usia! E se tau mo koe o sunu ne mea manogi ki te Aliki. Ko faitaulaga fua i te gafa o Alona ko oti ne faka'malu ke fai ne latou a te mea tena. Tiaki nei ne koe a te koga tapu tenei. Ko teke nei ne koe a te Aliki te Atua, tela la, ko galo tena manuia mai i a koe.”

19A Usia e tu i kona, i te Faletapu, i tafa o te fata-fai-taulaga e sunu ei mea manogi, kae e pukepuke mai i tena lima a te mea sunu mea manogi. Ne kaitaua a ia ki faitaulaga, kae i te taimi eiloa tena, ko te lepela eiloa ko sae mai i tena lae.

20Ne kilo atu a Asalia mo nisi faitaulaga mo te poi ki te lae o Usia, tena fai malo ei ne latou ke fano keatea mai i te Faletapu. Ne fakavave a ia o ulu ki tua, me i a ia ko fakasala ne te Aliki.

21Ne lailai eiloa a Usia i feitu faka‐te lotu i te toega o tena olaga, ona ko te lepela. Ko se mafai ne ia o ulu ki loto i te Faletapu, tela la, ne nofo eiloa a ia i tena fale, ko seai se tiute e toe fai ne ia, me ko Iotama, tena tama tagata, tena ko pulepule ne ia a te fenua.

22A te pelofeta ko Isaia te tama tagata a Amota, ne fakamau ne ia a mea katoa kola ne fai ne te Tupu ko Usia i tena nofoaiga.

23Isa 6.1 Ne mate atu a Usia, kae ne tanu i te laukele e tanu ei a tupu. Ne seki tanu a ia i tanuga o tupu ona ko tena masaki. Ko tena tama tagata ko Iotama ne sui ne ia a tena tamana o fai mo tupu.