SAKALIA 14 - Tuvalu Revised Bible

Ko Ielusalema mo Malo Fakaatea

1A te aso o te Aliki ko pili o oko mai. I te aso tena, a Ielusalema ka fakamaseigina ka ko mea taua kola ne maua mai i ei ka vaevae i otou mua.

2Ka tuku fakatasi ne te Aliki a malo katoa o tau ki Ielusalema. A te fa'kai ka puke, a mea taua i loto i fale ka fao malo, ka ko fafine ka puke malo. A te afa o te fenua ka ave fakapagota, ka ko te sua afa ka nofo eiloa i te fenua.

3Ka oti aka, ko te Aliki ka fano o taua ki malo kona, e pela eiloa mo aso mua.

4I te taimi tena, ka tu a ia i luga i te Mauga o Olive, i te feitu ki te saegala o Ielusalema. Tena, ka vaelua te Mauga o Olive mai te saegala ki te togala, ne te vanu i te kogaloto. A te afa o te mauga ka gasue ki matu ka ko te sua afa ki saute.

5Ka sola koutou i loto i te vanu tenei, tela e vaelua ne ia te mauga tenei. Ka sola koutou e pela mo otou tupuna i te taimi ne poko ei te mafuie i aso o te tupu o Iuta ko Usia. Ka vau te Aliki toku Atua mo ana agelu katoa.

6Ka oko mai te taimi tena, ka se toe ai se moko mo afusaga moko,

7ka se toe ai foki se pouliga. Ka ao faeloa, e tusa foki eiloa manafai ko te taimi o te po. Ko te Aliki fua e iloa ne ia te taimi e tupu ei te mea tenei.

8 Eseki 47.1; Ioa 7.38; Faka 22.1 Ka oko mai te aso tena, a te vai ka 'tafe mai i Ielusalema. A te afa o ia e tafe ki te Tai Mate, ka ko te sua afa ki te Tai Metitilani. Ka tafe faeloa i te tausaga katoa, i te tau vela e pela foki i te tau moko.

9Tena, ka fai ei te Aliki mo tupu i te lalolagi katoa; a tino katoa ka tapuaki ki a ia me ko te Atua, kae ka iloa foki ne latou a ia i te igoa tena.

10A te koga tela mai Kepa i matu ke oko ki Limoni i saute ka fakalaugatasi. A Ielusalema ka maluga atu i fenua i ona feitu; a te fa'kai ka vau mai te Mataloa o Peniamina ke oko ki te Mataloa o Matulimanu, tela ne isi ei se mataloa muamua. E vau foki mai te Taoa o Hananelu ke oko ki te koga faite uaina a tupu.

11Faka 22.3 Ka nofo ei a tino i kona mo te filemu, ko se toe ma'taku i te malaia.

12Ka aumai ne te Aliki se famai fakamataku ki malo kola e faitaua ki Ielusalema. A olotou 'kano ka pala kae koi ola mai eiloa latou; a olotou mata mo olotou alelo ka pala foki.

13I te taimi tena, ka faka'numi ne te Aliki olotou mafaufau, tela ko ma'taku ei latou kae fakatau ta i a latou eiloa.

14A tagata o Iuta ka tau atu o pulu a Ielusalema. Ka pule ne latou a koloa o malo katoa — ko aulo, siliva mo gatu e uke.

15A te masaki fakamataku ka oko atu foki ki solofanua, ki miula, kamela mo asini mo manu vaefa katoa kola i te koga e nofo ei olotou fili.

16 Levi 23.39-43 A tino katoa kola e toe mai i malo kola ne faitaua ki Ielusalema ka olo sale ki te koga tena i tausaga takitasi, o tapuaki ki te Aliki Tafasili i te Malosi, i a ia ko te tupu, kae fakamanatu foki ne latou a te Kaiga Fiafia o Fale Fakamalumalu.

17Kafai e isi se malo e se talia ne ia o tapuaki atu ki te Aliki Tafasili i te Malosi, me ko te tupu, ka seai se vaiua e to i te lotou fenua.

18Kafai e se talia ne tino Aikupito ke fakamanatu a te Kaiga o Fale Fakamalumalu, ka fakaoko ne te Aliki ki a latou te famai tela ka aumai ne ia ki malo katoa kola e ita ma olo.

19Tena te fakasalaga ka oko ki luga i Aikupito pela foki ki nisi malo katoa aka foki, manafai e se fakamanatu ne latou a te Kaiga o Fale Fakamalumalu.

20I te taimi tena, a pēle i luga i solofanua ko tusi i ei a pati konei, “E fakatapu mo te Aliki.” A ulo tunu meakai i te Faletapu ka malu e pela mo pola i mua o te Fatafaitaulaga

21A ulo tunu meakai katoa i Ielusalema mo Iuta kātoa ka tuku fakaatea ke fakaaoga mō tapuakiga ki te Aliki Tafasili i te Malosi. A tino kola e ofo atu a taulaga ka fakaaoga ne latou a ulo mo tunu ei a kano manu o taulaga. Kafai e oko mai te taimi tena, ka se toe ai ne tino faimeatogi i te Faletapu o te Aliki Tafasili i te Malosi.