1 PETELU 2 - Tuvalu Revised Bible

Ko te Fatu Ola mo te Fenua Filifilia

1Tela la, tiakina mea masei katoa; te fakaloiloi, te fia amiotonu, te kaisanosano, te pati masei!

2Ke fai koutou e pela mo ne tamaliki fatoa fa'nau, kola ka 'mate i te fia inu ki te tinā susu faka te Agaga, me kafai e inu koutou ki ei, e 'tupu ake koutou i ei, kae ola foki i ei.

3Sala 34.8E pela mo muna a te Tusi, “Ko oti ne iloa ne koutou a te alofa kaimalie o te Aliki.”

4O'mai ki te Aliki, ko te fatu ola tela ne tiakina ne tino me se aoga, kae ne filifilia me aoga i mua o te Atua.

5O'mai e pela mo ne fatu ola, kae ke fai foki otou foitino mo mea e faite ake ei te malumalu faka te Agaga, tela ka galue ei koutou e pela mo ne faitaulaga e tapu, o ofo atu a taulaga faka te Agaga mo taulaga logomalie ki te Atua e alatu i a Iesu Keliso.

6Isa 28.16E pela mo muna a te Tusi:

“Ne filifili ne au a te fatu taua

Tenei ko tuku ne au ke fai mo fatu tulimanu i Siona;

Kae so se tino e talitonu ki a ia e maua faeloa ne ia a te loto malie.”

7 Sala 118.22 A te fatu tenei se fatu e pito sili i te aoga mo koutou kola e talitonu; kae ki a latou kola e se talitonu:

“Ko te fatu ne tiakina ne tufuga me se aoga

Ko fai nei mo fatu e tafasili i te taua.”

8 Isa 8.14,15 E penei foki a nisi muna i te Tusi,

“Tenei te fatu e fai ne ia tino ke takase'se,

Ko te fatu e fakapa'ku ne ia latou.”

Ne takase'se ona ko te se talitonu ki te muna; me ko te loto eiloa o te Atua ke fai pena latou.

9 Eso 19.5,6; Isa 43.20 Isa 9.2 A koutou ko te fenua filifilia, ko faitaulaga a te Tupu, ko te fenua tapu, ko tino tonu o te Atua, ne filifilia ke folafola atu a galuega fakaofoofogina a te Atua, tela ne kalagagina ne ia a koutou mai i te pouliga ki tona mainaga fakaofoofogina.

10Hose 2.23Ne seki fai koutou mo tino o te Atua i aso mua, kae nei ko fai koutou mo ona tino; ne seki maua foki ne koutou a te alofa 'nau o te Atua i aso mua, kae nei ko maua ne koutou a tena alofa 'nau.

Ko Tavini a te Atua

11Oku taugasoa, a koutou ne fakaalofa kola e se 'nofo mau i te lalolagi. Ko fakamolemole atu au ki a koutou, ke mo a ma takavale koutou i manakoga faka te foitino kola e taua faeloa ki te agaga.

12E 'tau o 'lei otou amio i mua o tino pouliuli, i te mea manafai e fakama'sei ne latou a koutou e pela me ne tino amio masei; kae kafai e 'kilo ki otou amioga 'lei, ko 'viki ei latou ki te Atua i te Aso e vau ei a ia.

13Ke faka'logo koutou ki fakatonuga a tino pule ona ko te aliki: ki te Tupu me ko ia ko te pule sili,

14ki kovana kola ne uga atu ne ia o fakasala a tino amio ma'sei, kae tavae ki a latou kola e fai mea 'lei.

15Me tenei eiloa te loto o te Atua: e manako ke fakafilemu ne koutou te faipati valevale o tino va'lea ki mea 'lei e fai ne koutou.

16Ola e pela mo ne tino saoloto; sa fakaaoga te otou saolotoga, io me taumafai o ufiufi so se mea masei, kae ola e pela mo ne tavini a te Atua.

17Ava ki tino katoa, alofa ki otou taina talitonu, mataku ki te Atua, kae ava foki ki te Tupu.

Ko te Akoakoga e Maua mai i Puapuaga o Keliso

18Tavini, e 'tau mo koutou o fakalogo ki otou pule, kae ava foki ki a latou mo te loto katoatoa, e se ki a latou fua kola e alofa kae mafaufau 'lei, kae ki a latou foki kola e fakasaua.

19E fakamanuia koutou ne te Atua ona ko te mea nei, manafai e kufaki ne koutou te fi'ta o te se 'tau o puapuagatia ona ko te otou mafaufau ki tena loto.

20Se a te 'togi e maua ne koe, manafai e kufaki ne koe a kini e 'tau o maua ne koe ona ko mea 'se ne fai ne koe? Kae kafai e kufaki ne koe a puapuaga e oko atu ona ko tou fai mea tonu, e fakamanuia atu koe ne te Atua ona ko te mea nei.

21Tenei te pogai ne kalagagina ei koutou ne te Atua; i te mea i a Keliso ne puapuagatia mo koutou, kae tuku atu foki ne ia ki a koutou te fakaakoakoga, ke tau'tali ei koutou i ona kalafaga.

22Isa 53.9E seai se agasala kai fai ne ia; e seai foki se tino ko lagona ne ia se loi e to mai i tona gutu.

23Isa 53.7I te taimi ne fetugina ei a ia, ne seki tali atu a ia i muna fetu; kae i te taimi ne puapuagatia ei a ia, ne seki mataku, kae ne tuku atu katoatoa ona fakamoemoega ki te Atua, tela ko te Famasino amiotonu.

24Isa 53.5,6Ko Keliso eiloa ne tauave ne ia o'tou agasala i tona foitino i luga i te sataulo, ko te mea ke olo keatea tatou mai te agasala, kae ke ola mo te amiotonu; ko ona pa'kiaga foki ko faka'leigina ei koutou.

25E pau eiloa koutou mo mamoe kola ko takasese; kae nei ko oti ne toe fakafoki mai koutou ki te Tausi mamoe, ko ia foki tena e tausi ne ia otou agaga.