2 SAMUELU 10 - Tuvalu Revised Bible

Ko Takavale te Kau Amoni mo te Kau Sulia(1NTupu 19.1-19)

1I se taimi fakamuli ifo, ne mate a te Tupu o Amoni ko Nahasa, kae sopo aka tena tama ko Hanuna o fai mo tupu.

2Ne fai aka te Tupu ko Tavita penei, "E tau eiloa mo au o fakaasi toku loto fia taugasoa ki a Hanuna, e pela eiloa mo te faiga a tena tamana ki a au." Tena, ne ave ei ne Tavita se fekau fakamafanafana loto ki a Hanuna, e tusa mo te mate o tena tamana.

I te okoatuga o tagata kona ne olo atu mo te fekau a Tavita ki Amoni,

3kae ne fai atu mo takitaki o Amoni ki te lotou tupu penei, "I 'tau fakatau, a tino kona ne uga mai ne Tavita, ona ko tena fakaava ki tou tamana, ke o'mai mo tena fekau fakamafanafana loto ki a koe? Ikai! A latou kona, ne uga mai ne Tavita ke sukesuke fakalei te fa'kai, ko te mea ke mafai ne ia o fakatakavale tatou!”

4Ne puke Hanuna ki avefekau a Tavita, vele aka a feitu takitasi o olotou talafa, kati aka olotou gatu i feitu ki lalo, kae uga ke olo.

5Ko oko eiloa latou kona i te 'ma, tena ko se foki ei ki a Tavita. I te logoga a Tavita i te mea tena, ne uga tena fekau ki a latou ke nofo eiloa i Ieliko ke oko ki te taimi ko toetupu aka ei olotou talafa.

6A tino Amoni ko iloa nei ne latou i a Tavita ko tau nei o kaitaua ki a latou, tela la, ne togi mai ne latou e luasefulu afe sotia o Sulia mai i fa'kai o Petelehopa mo Sopa, e sefululua afe tagata mai Topa, pela foki te tupu o Maaka mo te toko afe tagata.

7Ne logo Tavita i te mea tena, tena ne uga ei ne ia a Ioapo mo te kautau katoa ke fepaki atu ki a latou.

8Ne solo atu te kau Amoni, o tu i te mataloa ki te fa'kai o Lapa, te laumua o latou, ka ko te kau Sulia mo tagata mai Topa mo Maaka, ne 'tū i te laukele ateatea.

9Ne lavea ne Ioapo i potukau a te fili e fakatoka o taua mai ki tena kau mai mua mo tua, tena ne fili aka ei ne ia a sotia 'lei eiloa o Isalaelu kae fakatu ne ia ke fakafesagai ki te kau Sulia.

10A te 'toega o ana potukau ne tuku ne ia i lalo o te pulega a tena taina ko Apisai, tela ne fakatu ne ia o fakafesagai ki te kau Amoni.

11Muna a Ioapo ki a Apisai, "Kafai ko lavea ne koe i taku kau ka gasolo o takavale i te kau Sulia, ko tele mai koutou o fesoasoani mai, kae kafai ko tai takavale koutou i tino Amoni, ko fanatu foki ei au mo taku kau o fesoasoani atu.

12Koutou ke lotomalosi kae ’toa! Tatou e taua fakamalosi mō otou tino, pela foki mō fa'kai o te tou Atua. Ko te loto o te Atua ke fakataunu!"

13Ne solo atu te kau a Ioapo o taua, kae tele te kau Sulia.

14I te laveaga ne te kau Amoni a te kau Sulia ko tele, tena ne tele foki ei latou mai i a Apisai, o tele ki loto i te fa'kai. Tena, ne mafuli mai Ioapo mo tena kau mai te tauaga ki te kau Amoni, foki atu eiloa ki Ielusalema.

15Ko lavea ne tino Sulia i a latou ne takavale i te kau Isalaelu, tena ne toe fakamaopoopo mai ei ne latou olotou kautau katoa.

16Ne uga te fekau a te Tupu ko Hatatesa ki tino Sulia i te feitu ki te saegala o te Vaitafe o Eufilate, tena ne o'mai ei ki Helama, i lalo o te takitakiga a Sopaka, te takitaki o te kautau a te Tupu ko Hatatesa i Sopa.

17I te logoga a Tavita i te mea tena, ne fakamaopoopo ne ia a kautau a Isalaelu, olo atu ei latou ki te sua feitu o te Vaitafe o Iolitana, fanatu eiloa te lotou solo ki te fa'kai o Helama, tela e nofo mai i ei te kau Sulia, e faka'saga mai eiloa ki a latou. Tena, ko te taua eiloa ko kamata,

18kae ne afuli ne te kau Isalaelu a te kautau a Sulia. A te kau Sulia ne 'ta ne te kau a Tavita, e tusa mo te fituselau tino fakatele kaliota kae fasefulu afe tagata i solofanua; kae ne pakia foki i a latou a Sopaka, te takitaki o te kautau a te fili, tela ne mate eiloa i te koga ne fai ei te taua.

19I te laveaga ne tupu kola e pule ne Hatatesa i a latou ko takavale i tino Isalaelu, tena ne fai ei se fakataugasoa a latou mo tino Isalaelu, pule ei latou ne Isalaelu. Ka ko tino Sulia ko ma'taku ma toe fesoasoani ki tino Amoni.