SALAMO 20 - Tuvalu Revised Bible

Ko te Talo mo se Manumalo

1Ke tali mai te Aliki ki a koe i taimi e maua ei koe ne puapuaga!

Ke tausi foki koe ne te Atua o Iakopo

2Ke aumai ne ia ki a koe se fesoasoani mai tena Faletapu,

Kae alofa atu foki ki a koe mai Siona!

3Ke talia ne ia au taulaga katoa,

Pela foki mo au taulaga 'sunu.

4Ke tuku mai ki a koe a mea e manako koe ki ei

Kae fakataunu foki ne ia au fuafuaga katoa.

5Tena la, ka ka'laga fiafia matou i tou manumalo

Kae fakamanatu foki tou manumalo i te 'viki atu ki te 'tou Atua.

Ke tali atu te Aliki ki au fakatagi katoa.

6Nei, ko iloa ne au me e avatu ne te Aliki te manumalo ki tena tupu filifilia;

E tali mai foki a ia ki a ia mai tena lagi tapu,

Kae ne manumalo a ia mai tena 'mana malosi.

7A nisi tino e fakatuaga ki kaliota tau,

Ka ko nisi e fakatuaga ki solofanua,

Ka ko tatou e fakatuaga ki te 'mana o te Aliki te tou Atua.

8A tino kona ka tapatusala olotou vae kae 'siga,

Ka ko tatou ka 'tu ake mo te make'ke i 'tou tulaga.

9Te Aliki, tuku mai te manumalo ki te tupu;

Tali mai i te taimi e kalaga atu ei matou.