IOPU 24 - Tuvalu Revised Bible

1Ai a e se fakatoka ei ne te Atua se taimi mo fai fakamasinoga,

Se aso e fakaasi ei te mea tonu ki a latou kola e tavini ki a ia?

2E siki ne tagata a fatu o olotou tuakoi ke fakaopoopo te lasi o olotou manafa;

E kaisoa ne latou a mamoe, kae tuku ki olotou lafu.

3E puke ne latou a asini a tamaliki kola e seai ne matua,

Kae sai ne latou a pulumakau a fafine seai ne avaga

Ke oko ki te taimi e togi mai ei olotou kaitalafu.

4E taofi ne latou a saolotoga o tino mativa,

Kae fai malo ne latou a tino puapuaga ke tele o muni.

5Tela la, a tino mativa ko olo o salasala meakai pela mo ne asini vao i te koga e seai ne vai i ei;

Ko seai aka foki eiloa se koga e mafai o maua ei ne meakai ma olotou tamaliki.

6Ko olo latou o kati te taukai i fatoaga kola e se o latou,

Kae tau vine i togavine a tino amio masei.

7I te po, e moe latou kae seai ne sulukafu,

Seai ne sulu mo kafu latou mai i te moko.

8Ko siu latou i te vaiua tela e to ki mauga,

Kae ko fakapikipiki fua ki kaupapa ke malu latou.

9A tagata amio masei ko fakapologa ne latou a tamaliki seai ne tamana o latou,

Kae puke ne latou a tamaliki a tino mativa mo togi olotou kaitalafu i a latou.

10A tino mativa e olo seai ne gatu e puipui ei olotou foitino;

E tau eiloa o olo mo te likiliki o kati te taukai saito.

11E tau ne latou a olive ke maua ei te sinu,

Ka ko fuagavine ke maua ei te uaina, ka ko latou e mate fiainu.

12A tino pakia mo tino ko pili o mate i loto i fa'kai e tagi, ka ko te Atua e se saga ki olotou talo.

13E isi ne tino e teke ne latou te mainaga,

E se malamalama latou i ei,

Kae se fia tautali foki i te koga e fano ki ei.

14I te vaveao, a te tagata tatino e tu ki luga o fano o tamate a tino mativa,

Kae i te po ko fano a ia o kaisoa.

15A te tino mulilua e fakatalitali ki te afiafi po,

E funa ona mata ke se lavea a ia ne tino.

16I te po, a tino kaisoa e olo o kaisoa i fale o tino,

Kae i te ao, ko muni me ko se manako ki te mainaga.

17E mataku latou i te mainaga o te ao,

Kae ko te pouliga o te po e se mataku latou i ei.

(Sofala)

18A te tagata amio masei ko ave i te lofiaga,

A tena laukele ko i lalo i te fakamalaiaga a te Atua;

Ko se fano eiloa a ia o galue i tena toga vine

19A te tagata agasala ka galo atu keatea mai i te fenua o tino ola,

E pela eiloa mo te kiona tela e matafi i te vela mo te oge vai.

20Ke oko foki eiloa ki tena matua ko se manatua ne ia a ia; ko kai tena foitino ne ilo,

Kae ko pala pela me se lakau siga.

21Ne tupu te mea tena me ne seki fai fakalei ne ia a fafine ko mate olotou avaga kae se alofa ki fafine seai ne fanau.

22E ta fakapalele ne te Atua a tino malosi i tena malosi;

E gasue te Atua, ko te tino amio masei eiloa ko mate.

23E mafai ne te Atua o tuku atu te tagata tena ke ola mo te saogalemu,

Kae e onoono eiloa a ia ki ei i taimi katoa.

24A te tagata masei e maumea i se taimi toetoe,

Se leva ko mage atu ei a ia e pela me se mouku,

E pela me se saito tela ko oti ne kati keatea.

25E a, e isi se tino e mafai ne ia o faka'se te manatu tena?

E isi se tino e mafai ne ia o taku tonu mai i aku pati e se tonu?