2 SAMUELU 18 - Tuvalu Revised Bible

Ko te Takavale mo te Mate o Apisaloma

1Ne fakamaopoopo ne Tavita tena kau katoa, kae vaevae ne ia ki potukau, e taki afe i nisi potukau, kae taki selau i nisi potukau, kae tuku atu mo ofisa ke takitaki i potukau takitasi.

2Tena, uga ei ne ia ke olo i vaega e tolu; ko Ioapo, mo tena taina ko Apisai, mo Itai mai i Kata, e takitaki i vaega takitasi. Ne fai atu te tupu ki tena kau penei, “Au e fanatu ke olo tatou.”

3Ne tali mai latou, “A koe e se tau o vau i a matou. Kafai e taua matou mo te fili kae tele matou, io me e 'mate te afa o matou, e seai eiloa se mea e afaina i ei. Ka ko koe, a tou aoga, e tusa eiloa mo te tokosefulu afe o matou. Kaati e sili ke nofo koe i te fa'kai tenei, o aumai sale ne koe ne fesoasoani ki a matou.”

4Ne tali atu a te tupu, “Kaati ka fai eiloa ne au te mea e fakatau ifo koutou e 'lei.” Tena, ne tu ei a ia i tafa o te mataloa o te fa'kai kae solo atu tena kau ki tua i taki afe mo taki selau.

5Ne tuku atu tena fakatonuga ki a Ioapo, Apisai mo Itai penei: “Fakamolemole, sa faigina se mea ki a Apisaloma.” Ne lagona ne tagata katoa kona a te fakatonuga tena a Tavita ki ana ofisa.

6Ne olo atu te kau a Tavita ki te feitu ki tua o te fenua, o taua atu ki te kau Isalaelu i te vao o Efalaima.

7Ne takavale masei eiloa te kau Isalaelu i te kau a Tavita; e tusa mo te luasefulu afe tagata ne mate i te aso tena.

8Ne fai eiloa te taua tena, ka ko te mea ko salalau atu pela ki te vao, tela la, e tokouke atu tagata ne mate i te vao i lo tagata ne mate i te koga eiloa tela ne fai ei te taua.

9A Apisaloma e poi i a ia e fetaui mo nisi tagata o te kau a Tavita. A Apisaloma e sopo i te miula, kae i tena fanatuga i lalo o te lakau ko te oka, ko tena ulu eiloa ko lave i kaula. Ne tele eiloa te miula, ka ko Apisaloma ko tautau i te lakau tena.

10E tokotasi mai te kau a Tavita ne matea ne ia a Apisaloma, tena ne fakailoa atu ei ne ia ki a Ioapo, muna a ia, “Tou malu, a Apisaloma ne matea ne au e tautau i luga i te lakau ko te oka!”

11Ne tali atu a Ioapo, “Kafai ne matea ne koe, ai a seki na tamate ei ne koe i kona? Moi ne ta ne koe, e penei e avatu ne au ki a koe e sefulu tupe siliva, mo te fusi.”

12Ne tali atu te tagata tela, “E ui eiloa e aumai ne koe e afe tupe siliva, e se mafai lele eiloa o oko oku lima ki te tama a te tupu. Ne lagona katoa ne matou te fakatonuga a Tavita ki a koe mo Apisai mo Itai ke sa tamategina a Apisaloma.

13Kae moi ne seki fakalogo au ki te tupu, kae tamate Apisaloma, e penei e logo eiloa te tupu, i te tupu e logo i mea katoa e tupu, kae ailoga eiloa e vau koe o fesoasoani mai ki a au.”

14Muna a Ioapo, “E se toe fakamaumau oku taimi ki a koe.” Tena, ne puke aka ne ia a tao e tolu, kae velo atu ki te fatafata o Apisaloma tela koi ola mai eiloa, tela e tautau i luga i te lakau ko te oka.

15Ne toe o'mai e tinogafulu sotia a Ioapo, tamate faka'lei eiloa ne latou a Apisaloma.

16Ne fakatonu atu a Ioapo ke fakatagi te pu ke fakagata te taua, tena ne foki mai ei tena kau i te ologa o afuli te kau Isalaelu.

17Ne puke ne latou te foitino o Apisaloma, 'pei ki loto i te lua i te vao, kae taotao ki fatu. Ne fakatau 'sola te kau Isalaelu, o fakatau tele eiloa ki olotou fale.

18I te taimi ne ola ei a Apisaloma, ne faite ne ia se mea fakamanatu o ia i te Vanu o Tupu, me e seai sena tama tagata ke fakaola ei tena igoa. Ne fakaigoa ne ia te mea tena ki tena igoa, tela la, ke oko mai ki aso nei e fakaigoa eiloa ko te Fakamanatuga o Apisaloma.

Tavita ko Logo i te mate o Apisaloma

19Ne fai atu Aimaasu, te tama a Satoka ki a Ioapo penei, “Tuku mai ke tele au ki te tupu o fakaasi ki ei te tala 'lei tenei, i a ia ko fakasao ne te Aliki mai ona fili.”

20Muna a Ioapo, “Ikai, e se tau o ave ne koe se tala 'lei i te aso nei. Se isi aso aka ko fano ei koe mo te tala lei tenei, kae se ko te aso nei, me i te tama a te tupu ko mate.”

21Ne fai atu a Ioapo ki tena tavini, se tagata Sutana, penei, “Fano o fakamatala ki te tupu te mea ko oti ne lavea ne koe.” Ne punou ifo te tavini tena te mea eiloa ko tele.

22Ne finau atu eiloa Aimaasu, “Kiloke, au se saga ki te mea tena ne tupu, kae fakamolemole tuku mai foki au ke fano o ave te tala o te taua.”

Ne fesili atu a Ioapo, “Taku tama, ai a e manako ei koe o fano mo te tala o te manumalo o tatou? E seai se togi 'lei e maua ne koe manafai e fai ne koe a te mea tena.”

23Muna a Aimaasu, “Faitalia me se a te mea e tupu, au e manako eiloa o fano.”

Muna a Ioapo, “Ko 'lei, fano la.” Tena, ko Aimaasu eiloa ko tele ki te auala, to i loto i te Vanu o Iolitana, maua atu ne ia te tavini a Ioapo, fakasili atu foki eiloa a ia o fano i ona mua.

24A Tavita e sagasaga i te va o te pui loto mo te pui tua o te fa'kai. A te tagata uatimani ne fanake ki te ulu o te pui, tu ei i luga i te tuafale o te mataloa o te 'pui; ne kilo atu a ia ki tua, matea eiloa ne ia te tino e tele tokotasi mai.

25Ne kalaga ifo a ia o fakailoa ki te tupu, kae fai mai te tupu penei, “Kafai ko ia fua tokotasi, e iku se tala 'lei tena e vau mo ia.” Ne gasolo eiloa te tagata tena o pili mai ki te fa'kai.

26Ne toe matea ne te uatimani a te sua tagata e tele tokotasi mai, tena kalaga atu ei a ia ki te tagata tausi o te mataloa o te fa'kai penei, “Kiloke! E isi sua tagata tenei e tele mai foki!”

Ne tali atu Tavita, “A ia tena e vau foki mo se tala 'lei.”

27Muna a te uatimani, “A te tagata muamua e pela eiloa mo te tele a Aimaasu.”

Muna a te tupu, “A ia tena se tagata 'lei, kae na e vau mo se tala 'lei.”

28Ne fakatalofa atu Aimaasu ki te tupu, fakasiga ifo ki lalo i te laukele i mua o te tupu, kae fai atu penei, “Ke vikia te Aliki tou Atua, tela ne tuku atu ne ia te manumalo ki tau kau i tagata kola ne taumafai o teke Tou Malu!”

29Ne fesili atu te tupu, “E a, e isi se mea ne tupu ki a Apisaloma?”

Ne tali atu Aimaasu, “Tou malu, i te uga maiga a au ne tau ofisa ko Ioapo, ne matea ne au a tino e ka'laga, kae e se iloa ne au me se a te mea e tupu.”

30Muna a te tupu, “Tu i te koga tela,” tena fano ei Aimaasu o tu i te koga ne fai atu te tupu ke fano a ia o tu i ei.

31Ne oko mai te tavini Sutana, kae fai atu ki te tupu, “Tou Malu, e isi se tala gali ne vau mo au! I te aso nei, ko oti ne tuku mai ne te Aliki te manumalo ki a koe i luga i tino katoa kola e teke atu ki a koe!”

32Ne fesili atu Tavita, “E a Apisaloma, e isi se mea ne tupu ki ei?”

Ne tali atu te tavini, “Tou malu, aku muna eiloa ke oko ki ou fili a te fakalavelave ne oko ki a ia, pela foki latou kola e fia teke ki a koe.”

33Ne oko atu te fanoanoa lasi ki te tupu. Ne fanake a ia ki te potu i luga o te mataloa o te fa'kai kae tagi. I tena fanatuga, ne tagi a ia penei, “Oi aue taku tama! Taku tama ko Apisaloma! Apisaloma e, taku tama! E sili te lei moi ne mate au kae se ko koe taku tama! Apisaloma e, taku tama!”