IELEMIA 35 - Tuvalu Revised Bible

Ko Ielemia mo te kau Lekapa

1 2Tupu 23.36—24.6; 2NTupu 36.5-7 I te taimi ne fai ei mo tupu o Iuta a Ieoiakimo te tama tagata a Iosia, kae ne faipati mai te Aliki ki a au penei,

2“Fano ki tino o te kaukaiga o Lekapa, o faipati atu ki a latou. Ka oti, ko aumai ei ne koe ki loto i se potu e tasi o te Faletapu kae tuku atu ne uaina ki a latou.”

3Tena, ne aumai ne au a te kaukaiga katoa o Lekapa — ko Iasania (te tama tagata a te sua tino e igoa ki a Ielemia, te tama tagata a Hapasinia), mo ana taina katoa mo ana tama tagata —

4ave ei ne au ki te Faletapu. Ne 'taki atu ne au latou ki loto i te potu o te kau a te pelofeta ko Hananu, te tama tagata a Ikitalia. A te potu tenei, e tu mai i luga o te potu o te ofisa maluga e tokotasi o te Faletapu ko Maseia, te tama tagata a Saluma, kae pili ki potu o nisi ofisa.

5Tena la, ne tuku atu ei ne au a ipu mo pola e fonu i uaina ki mua o te kau Lekapa, fai atu ei au ki a latou penei, “Inu aka i uaina.”

6Kae ne tali mai latou penei, “A matou se inu uaina. A te motou tupuga ko Ionatana, te tama tagata a Lekapa, ne fai mai ke mo a eiloa matou io me ko omotou tupuga e inu ki uaina.

7Ne fai mai foki a ia ki a matou ke mo a e faite ne matou ne fale, ke mo a e toki ne motou fatoaga, ke mo a foki e toki io me togi ne togavine ma matou. Ne fakatonu mai ne ia matou ke nofo faeloa i faleie, ko te mea ke tumau matou i te fenua tenei e nofo i ei matou pela me ne tino fakaatea.

8Ne tausi eiloa ne matou a fakatonuga kola ne tuku mai ne Ionatana ki a matou. A matou e se inu uaina, e pena foki omotou avaga, mo omotou tama tagata mo tama fafine.

9-10E seai ne motou fale e faite mo omotou nofo, a matou e nofo i faleie, kae e seai ne motou togavine, io me ne fatoaga io me ne saito. Ne tausi fakamaoni eiloa matou ki mea katoa kola ne fakatonu mai ne te motou tupuga ko Ionatana ki a matou.

11Kae i te taimi ne faitaua mai ei a te Tupu ke Nepukanesa ki te fenua tenei, ne mafaufau ei matou o o'mai ki Ielusalema, ke sao matou mai i kautau a Papelonia mo Sulia. Tena te pogai ko nofo nei ei matou i Ielusalema.”

12-13Tena, ne fai mai te Aliki Malosi, te Atua o Isalaelu, ki a au, ke fano au o fai atu ki tino Iuta mo Ielusalema penei, “Au, te Aliki, ko fesili atu me ai a ne ita ei koutou ma faka'logo mai ki a au o tausi ki aku fakatonuga.

14A te gafa o Ionatana ne faka'logo ki tena fakatonuga ke se inu i uaina, kae ne seki ai eiloa se tino o latou ne inu i se uaina ke oko mai ki te aso nei. Ka ko au ne faipati 'soko faeloa ki a koutou, kae e seki faka'logo mai eiloa koutou ki a au.

15Ne tumau eiloa o uga sāle atu ne au a aku tavini ko pelofeta ki a koutou, kae ne fai sāle atu eiloa ke tiaki otou uiga masei kae fai te mea tonu. Ne fai sāle atu eiloa ke sa tapuaki kae tavini ki atua fakaatea, ko te mea ke 'nofo tumau koutou i te fenua tenei ne avatu ne au ki a koutou mo otou tupuga. Kae e seki faka'logo mai eiloa koutou io me 'saga mai ki aku muna e fai sāle atu.

16A te gafa o Ionatana ne faka'logo ki te fakatonuga a te lotou tupuga ki a latou, ka ko koutou e seki faka'logo mai eiloa ki a au.

17Tela la, i te taimi nei, a au, te Aliki Malosi, te Atua o Isalaelu, ka aumai ne au ki a koutou, tino Iuta mo Ielusalema, a te fakamaseiga tela ne folafola ne au me e fakaoko ki a koutou. Ka fai ne au a te mea tena, me i a koutou ne seki faka'logo mai i te taimi ne faipati atu ei au, ne seki tali mai foki koutou i te taimi ne kalaga atu ei au.”

18Oti aka, fai atu ei au ki te kaukaiga o Lekapa, i te Aliki Malosi, te Atua o Isalaelu, ne fai mai penei, “A koutou ne faka'logo ki te fakatonuga a te otou tupuga ko Ionatana ne fai ki a koutou; ne tautali eiloa koutou i ana fakatonuga, kae ne fai eiloa ne koutou a mea katoa ne fakatonu mai ne ia ki a koutou.

19Tela la, a au, te Aliki Malosi, te Atua o Isalaelu, e tauto atu me ka isi faeloa se tino i te gafa o Ionatana, te tama tagata a Lekapa, e tavini mai ki a au.”