ESEKIELU 21 - Tuvalu Revised Bible

Ko te Pelu a te Aliki

1A te Aliki ne faipati mai ki a au,

2ana muna, “Te tagata ola, muna toka atu a Ielusalema. Muna toka atu a koga e tapuaki i ei a tino. Fakailoa atu ki te fenua o Isalaelu

3i a au, te Aliki, ko fai atu penei: Au ko te otou fili. Ka tapale taku pelu o tamate koutou katoa, tino amiotonu fakatasi mo tino masei.

4Ka fakaaoga taku pelu o ta a tino mai i matu ki saute.

5Ka iloa ne tino katoa i a au, te Aliki, ko oti ne tapale taku pelu kae ka se tuku keatea eiloa ne au.

6“Te tagata ola, tagi aka pela me se tino ko fatifati te loto i te fanoanoa. Tagi mo te fanoanoa i te koga e mafai ei koe o lavea ne tino katoa.

7Kafai e fesili atu me ai a e tagi ei koe, fai ki a latou me e pogai i te tala tenei ko pili o oko mai. Kafai e oko mai, ka mataku valevale latou, olotou lima ka tautau fua i olotou feitu, ka seai se loto toa o latou, mo olotou tuli ka polepole. Ko oko mai te taimi; ko i konei.” Ko te Aliki Sili tena ne faipati atu.

8Muna a te Aliki ki a au,

9“Te tagata ola, fai au muna fakapelofeta. Folafola atu ki tino a muna a aku, te Aliki, konei e fai atu:

Te pelu, te pelu tena e fakamata kae fakamalapulapu.

10Ko fakamata o tatino,

Ko fakamalapu ke malapu pela me se uila.

E se mafai o isi te fiafiaga,

Me i oku tino ne seki saga lele eiloa

Ki muna polopoloki mo fakasalaga ne oko atu ki a latou.

11A te pelu ko fakamalapulapu,

O fakatoka mo te taimi e fakaaoga ei.

Ko fakamata kae fulufulu ke tuku ki te lima o te tino tatino.

12Te tagata ola, tagi i te fanoanoa;

A te pelu tenei ne fakatoka mo toku fenua,

Pela foki mo takitaki katoa o Isalaelu.

Ka mate katoa latou,

Fakatasi mo tino katoa o toku fenua.

Tuki otou fatafata i te fanoanoa!

13Ko tofotofo nei ne au oku tino,

Kafai e ita ma salamo,

Ko tena uiga, a mea katoa konei ka tupu katoa ki a latou.

14“Te tagata ola, na fai nei au muna fakapelofeta. Pati ou lima, kae ka tafuke te pelu o katikati a tino. Se pelu e tatino, se pelu e fai ne ia tino ke mataku kae e tatino foki.

15E fai ne ia oku tino ke loto vaivai kae siga valevale. Ko fakamatakutaku nei ne au a te lotou fa'kai ki te pelu tela e malapu pela me se uila kae e toka o tatino.

16Te pelu mata 'kai, kati ki te fakaatamai pela foki ki te fakamaui! Kati ki so se koga e fuli koe ki ei.

17Ka pati foki oku lima, ko gata ei toku kaitaua. Ko au, te Aliki, tena ne faipati atu.”

Ko te Pelu a te Tupu o Papelonia

18A te Aliki ne faipati mai ki a au,

19“Te tagata ola,” “fakamailoga aka ne auala e lua tela e mafai o vau i ei a te tupu o Papelonia mo tena pelu. A auala kona e tau o kamata i te fenua e tasi. Fakatu aka ne pou fakailoga e fakaasi i ei a te koga e maga ei a auala kona.

20A te sua pou e fakaasi ei ki te tupu a te auala ki te fa'kai o Amoni ko Lapa, ka ko te sua pou e fakaasi ei a te auala ki Iuta, ki te fa'kai o Ielusalema, te olo malosi.

21A te tupu o Papelonia e tu i te pou fakailoga i te koga e maga ei te auala. Ne lue ne ia ana matasana, ke iloa ne ia me e tefea te koga ka fano a ia ki ei; ne fesili foki a ia ki ana tupua; ne onoono foki a ia ki te ate o te manu ne ta mo fai te taulaga.

22Nei, a tena lima fakaatamai e puke i te matasana tela e tusi i ei a te igoa o Ielusalema! E fakasino atu ki a ia ke fano o fakatoka ana mea tuki mataloa, o kalaga te kalaga o te taua, o fakatu a mea tuki mataloa i tafa o te mataloa o te fa'kai, o fakatu aka a one, kae keli a lua.

23A tino Ielusalema ka se talitonu i te mea tena, ona ko feagaiga a latou ne fai. Ka ko te valoaga tenei ke fakamasaua ki a latou olotou agasala kae fakailoa atu foki i a latou e fakatakavale eiloa.

24Konei la a muna a te Aliki Sili. A otou agasala ko sae mai eiloa. Ko iloa ne tino katoa te se o koutou. A otou agasala e lavea atu i otou faiga katoa. A koutou ko malaia, kae ka tuku atu ne au koutou ki otou fili.

25“A koe te pule masei kae se malu o Isalaelu, a tou aso, te aso o te fakasalaga fakaoti o koe, ko pili mai.

26Ko au, te Aliki Sili, tena ne faipati atu. Tapale tou kalauna mo tou pulou laugatu. Ko se toe pela mo taimi mua. Avake a tino mativa ke fai mo pule! Ave ifo ki lalo a tino kona e pule!

27Ko maofa, ko maofa valevale! Ao, ka fai ne au a te fa'kai ke masei valevale. Ka se tupu mua te mea tenei ke oko ki te taimi e oko mai ei a te tagata tela ko oti ne fili ne au ke fakasala ne ia a te fa'kai. Ka oti, ko tuku atu ei ne au ki a ia.

Ko te Pelu mo te Kau Amoni

28 Iele 49.1-6; Eseki 25.1-7; Amo 1.3-15; Sefa 2.8-11 “Te tagata ola, fai au muna fakapelofeta. Folafola atu a muna a aku, te Aliki Sili, ki te kau Amoni kona e faka'Itaita ne latou a Isalaelu. Fai atu ki a latou penei:

‘A te pelu ko toka o ta fakapalele;

Ne mulu ke tatino, ke malapu pela me se uila.

29A fakaasiga kona ne lavea ne koutou ne fakaasiga loi, mo valoaga kona ne fai ne koutou e se tonu. A koutou e amio masei kae masei, ka ko te aso o koutou ko pili mai, te aso o te fakasalaga fakaoti o koutou. Ka kati otou ua ne te pelu.

30“‘Sisi aka te pelu! Ka fakamasino ne au koutou i te koga ne faite ei koutou, i te fenua ne fanau ei koutou.

31Ka lagona ne koutou te malosi o toku kaitaua manafai ko fakaoko atu ne au pela me se afi ka. Kae ka tuku atu ne au a koutou ki tagata fakasaua, ne tagata ko masani i te ofa mea.

32Ka ta fakamasei koutou ne te afi. A otou toto ka maligi i te otou fenua tonu, kae ka se manatua koutou ne tino.’ ” Ko te Aliki tena ne faipati atu.