NUMELA 36 - Tuvalu Revised Bible

Ko Tofi o Fafine ko Avaga

1Ne olo atu a ulu takitasi o te kaukaiga o Kileata, te tama a Makila kae ko te mokopuna o Manase te tama a Iosefa, ki a Mose mo nisi takitaki.

2Nume 27.7 Muna a latou, “A koe ne fakatonu ne te Aliki ke vaevae a te fenua i tino Isalaelu i te faiga o te vili. Ne fakatonu foki ne ia a koe ke tuku atu a te tofi o te motou kaiga ko Selofeata ki ana tama fafine.

3Kae masaua me kafai e avaga latou ki tino o nisi matakaiga, ko tena uiga ko fano te tofi i olotou avaga, tela la, ko galo te tofi tena mai te vaega ne tuku mai mo matou.

4I te Tausaga o te Faka'fokiga o Mea, te taimi e faka'foki katoa ei a mea kola ne togi atu ki tino e o latou a mea, ko tena uiga ko te tofi o tama fafine a Selofeata ka puke mau eiloa ne te matakaiga tela ne avaga atu latou ki ei, tela la, ko se toe maua ne matou.”

5Tena ne tuku mai ei ne Mose a fakatonuga mai te Aliki ki tino Isalaelu. Muna a Mose, “A te mea e fai mai ne te matakaiga o Manase e tonu,

6tela la, ne fai mai te Aliki i tama fafine a Selofeata e saoloto o avaga ki so se tino e ma'nako latou o avaga ki ei, kae ne tino i loto i te lotou matakaiga.

7A te tofi o so se tino Isalaelu e tau eiloa o nofo i loto i tena matakaiga.

8So se fafine e isi sena manafa, e tau eiloa o avaga ki se tino o tena matakaiga. I te faiga tena, e fakasolo lei eiloa a tofi i tagata mo olotou fanau:

9kae e se mafai o fano te manafa mai te sua matakaiga ki te sua matakaiga. A tofi o te matakaiga e fakasolo eiloa i olotou tino.”

10E pela mo te fakatonuga a te Atua ki a Mose, tela ne fai ei ne tama fafine a Selofeata.

11Tena ne fai eiloa ne Mahala, Tilesa, Hokala, Milika mo Noa, tama fafine a Selofeata, a te fakatonuga a te Aliki ki a Mose. Ne avaga eiloa latou ki olotou fai tuagaene.

12Ne avaga latou ki tino i loto i te matakaiga o Manase, te tama a Iosefa, tela la, te tofi o latou e nofo eiloa i loto i te matakaiga o te lotou tamana.

13Kona a tulafono mo fakatonuga kola ne tuku mai ne te Aliki ki tino Isalaelu e auala i a Mose, i te kogā koga laugatasi o Moapi, i tafa o te Vaitafe o te Iolitana kae 'luta mo Ieliko.