NEEMIA 2 - Tuvalu Revised Bible

Neemia ko Fano ki Ielusalema

1I te aso e tasi, ko fa masina fakamuli ifo, ne kai a te Tupu ko Aletaseta i tena taipola, kae fanatu ei au mo te uaina a ia. E seki lavea eiloa ne ia a au ke mata fanoanoa penei muamua,

2tena ne fesili mai ei penei, “Ai a e mata fanoanoa ei koe? A koe e se masaki, kaati e isi se mea e se fiafia koe ki ei.”

3 2Tupu 25.8-10; 2NTupu 36.19; Iele 52.12-14 Ko oko eiloa i oku poi, tena ne tali atu ei au penei, “Tou Malu, ke ola loa koe! E se fanoanoa pefea au i te fa'kai ne tanu ei oku tupuga ko masei valevale, mo ona pui ko palele katoa ne sunu?”

4Ne fesili mai te tupu penei, “E isi se mea e manako koe ki ei?”

5Ne 'talo atu au ki te Atua o te lagi, tena, fai atu ei au ki te tupu penei, “Tou Malu, kafai koe e fiafia mai ki a au, ke talia ne koe taku fakamolemole ke foki atu au ki te fenua o Iuta, ki te fa'kai ne tanu ei oku tupuga, ko te mea ke toe faite ne au a te fa'kai tena.”

6Ne talia eiloa ne te tupu taku fakamolemole, ka ko tena avaga e sagasaga i ona tafa. Ne 'sili mai ki a au a te tupu me e pefea toku leva, me ko au e foki mai mafea, kae ne tali atu eiloa au ki ei.

7Tena ne toe fakamolemole atu au ki te tupu ke fai mai se tusi ke fano mo au ki te kovana o te itu malo o Eufilate ki te Togala, ke fai ki ei ke fakasaoloto au o malaga ki Iuta.

8Ne fakamolemole foki au ke fai sena tusi ki a Asafo, te tino tausi o te vao lakau a te tupu, ke fakatonu ki ei ke aumai ki a au ne laupapa mō faite a mataloa o te olo tela e puipui ei te Faletapu, mō faite foki a pui o te fa'kai, mo te fale e nofo ei au. Ne tuku katoa mai ne te tupu a mea ne manako au ki ei, me i te Atua ne fakatasi mai eiloa ki a au.

9Ne uga mai ne te tupu ne ofisa o te kautau mo se kautau o sotia i solofanua ke olo matou, tena ne ma'laga atu ei matou ki Eufilate ki te Togala. Tena ne tuku atu ei ne au a tusi a te tupu ki kovana i kona.

10Ka ko Sanipalata, mai te fa'kai o Peta Holono, mo Tovia, se ofisa i te itu malo o Amoni ko oko eiloa i te se fia'fia i te logoga me e isi se tino ka vau o galue mō te lei o tino Isalaelu.

11Ne fanatu eiloa a au ki Ielusalema, kae i aso e tolu,

12ne seki fakaasi eiloa ne au ki se tino a te mea ne fakatonu mai ne te Atua ke fai ne au mō Ielusalema. Tena la, i te valuapo, ne tu aka au ki luga o fano ki tua mo nisi o oku taugasoa. E tasi eiloa te manu ne olo mo matou, ko te asini tela e sopo ei au.

13Ne tiaki ne au te fa'kai ka koi po eiloa, ui atu ei au i te Mataloa o te Vanu i te togala, fanatu eiloa au faka saute, fakasili atu au i te Vaipuna o Talako, oko atu eiloa au ki te Mataloa o Kaiga. I toku auala, ne onoono faka'lei au ki pui o te fa'kai kola ko maofa, mo mataloa o te fa'kai kola ne fakamasei i te afi.

14Tena la, ne fanatu ei au i te feitu ki te saegala o te fa'kai o fano faka matu ki te Mataloa o Vaipuna mo te Vai o te Tupu. A te asini tela e sopo ei au ko seai sena auala o ulu atu i loto i te fakatuga fatu o te pui tela ne maofa,

15tena ne fanaifo ei au ki te Vanu o Kitilona, fanatu eiloa au kae kilokilo ki te pui o te fa'kai. Tena, foki mai ei au i te auala ne vau ei au, ulu atu ei au ki loto i te fa'kai i te Mataloa o Vanu.

16E seai eiloa se ofisa i te fa'kai ne iloa ne ia te koga ne fano au ki ei mo te mea ne fai ne au. Ke oko mai ki te taimi tenei, e seki faipati eiloa au ki soku taina Iutaia — me ko faitaulaga, takitaki mo ofisa, io me so se tino tela ka galue i te galuega ne vau au o fai.

17Kae nei, ko fai atu au ki a latou penei, “Kilo mai ki te fakalavelave tenei e poko i a tatou, me i te fa'kai o Ielusalema tenei e maofa valevale mo ona mataloa ko se aoga! Tatou ka toe faite a pui o te fa'kai, ke na fakagata te tou masiasi.”

18Tena, ne fai atu foki ne au i te Atua ne fakatasi mai ki a au kae fesoasoani mai ki a au, mo muna foki a te tupu ne fai mai ki a au.

Ne tali mai latou penei, “Tatou ka kamata te galuega!” Tena ne fakatoka ei latou o kamata te galuega.

19I te logoga a Sanipalata mo Tovia mo te tagata Alapi ko Gesemu i te mea tenei e taumafai tatou o fai, ne 'kata fakatauemu mai latou ki a tatou, kae fai mai penei, “Se a te otou mea tena e fai? A koutou ko taumafai o teke ki te tupu?”

20Ne tali atu au penei, “A te Atua o te lagi e fakamanuia ne ia te motou galuega. A matou ko ana tavini, tela la, matou ka kamata o fai te galuega. A koutou, e seai eiloa se otou fekau i mea i Ielusalema kae e seai foki eiloa se vaega o koutou i tu mo aganu a te fenua.”