FAATAOTO 9 - Tuvalu Revised Bible

Ko te Poto mo te Valea

1A te poto ne faite tena fale kae ne faite ne ia e fitu pou mō tena fale tena.

2E isi se manu ne ta ne ia mo fai te kaiga, ne palu ne ia mea manogi mo te uaina, kae fakatoka ne ia te taipola.

3Ne uga ne ia ana tavini fafine ke tu i luga i te toe koga maluga eiloa i te fa'kai kae ke kalaga penei:

4“Tino valea, o'mai.” Kae ne fai atu a ia ki te tino valea penei,

5“Vau o kai i aku meakai kae inu i te uaina tenei ne palu ne au.

6Tiakina atu a tino valea kona, kae ka ola koe. Tautali i te auala o te poto.”

7Kafai e fakatonu ne koe se mea se a te tino valea, a te ikuga ka muna masei fua ne ia koe. Kafai e kote ne koe se tagata masei, a te ikuga ko koe fua ka kaitaua.

8Sa taumafai eiloa o fakatonu se tagata valea; a te ikuga, ka se fiafia ki a koe i a koe ne fakatonu atu ki a ia. Kae kafai e fakatonu ne koe se mea se a se tagata poto, e talia ne ia kae ka fakaaloalo mai ki a koe.

9So se mea e faipati ne koe ki se tagata poto ka fakaopoopo ki tena iloa. So se mea e faipati ne koe ki se tagata amiotonu ka fakaopoopo ki tena mea e iloa.

10 Iopu 28.28; Sala 111.10; Faata 1.7 Kafai e fia maua ne koe te poto, e tau o muamua koe o fakalogo ki te Aliki. Kafai ko iloa ne koe te Tasi Tapu, ko maua ne koe te malamalama.

11A te poto e fakaopoopo ne ia a tausaga o tou olaga.

12Kafai e maua ne koe te poto, ka manuia foki eiloa koe i ei. Kae kafai e se fiafia koe ki ei, ko koe foki eiloa e puapuaga.

13A te valea e pela me se fafine valea, gutu faipati kae matafatu.

14E sagasaga i te mataloa o tena fale, io me i se nofoaga i te feitu maluga o te fa'kai,

15kae kalaga ki tino kola e fakasili aka i te auala, kola e olo eiloa o fai olotou fekau. E penei ana kalaga:

16“Tino valea, o'mai!” E penei ana muna ki te tagata valea,

17“A te vai ne kaisoa e magalo atu. A te falaoa ne kaisoa e gali atu.”

18A tino kola e maua ne ia e se iloa ne latou me i tino e olo ki tena fale e mate, ka ko tino kola ko leva ne ulu ki loto i tena fale ko nofo nei i te lalolagi o tino mate.