IELEMIA 2 - Tuvalu Revised Bible

Ko te Atafai o te Atua mō Isalaelu

1A te Aliki ne fai mai ki a au

2ke folafola atu ne au ki tino katoa i Ielusalema a te fekau tenei,

“E masaua ne au i a koe e lasi tou fakamaoni i aso koi foliki ei koe,

Kae ne alofa foki eiloa koe ki a au

I te taimi ne fatoa fakaipoipo ei taua;

Ne tautali mai koe i a au i loto i te vao,

I loto i kogā laukele tela e seki toki ki ei ne lakau.

3Isalaelu, a koe e a aku tokotasi;

A koe ko toku fenua tapu.

Ne avatu ne au a mala mo puapuaga

Ki tino katoa kola e taumafai o faitaua atu ki a koutou.

Ko au, te Aliki, tena ne faipati atu.”

Ko Te Agasala a Tupuga o Isalaelu

4Fakalogo mai ki te fekau a te Aliki, koutou te gafa o Iakopo, koutou matakaiga o Isalaelu.

5Muna a te Aliki:

“Se a te mataupu a otou tupuga ne avake e uiga ki a au?

Se a te pogai ne fulitua mai ei latou ki a au?

E tapuaki latou ki tupua se aoga, tena la, ko se aoga foki ei latou.

6E se fia 'saga lele mai eiloa latou ki a au,

Kae tela la, ne faka'sao ne au latou mai i Aikupito

Kae taki ne au latou i loto i te vao:

Se laukele e seai ne lakau e ola i ei kae uke a lua fakamataku i ei,

Se laukele fakamataku kae seai ne vai i ei,

Kae seai ne tino e nofo i ei,

E seai foki se tino e fia malaga i se koga pena.

7Ne aumai ne au latou ki se fenua laukele ola,

Ke fiafia latou o fakaaoga a fuagalakau mo nisi mea lei aka foki.

Kae tela la, ne fakamasei ne latou toku fenua;

Ne fakalailai ne latou a te fenua tena ne avatu ne au mō latou.

8A faitaulaga e seki fia fesili penei, ‘Tefea te Aliki?’

Aku faitaulaga e se iloa ne latou a au.

A tino pule ko teke mai ki a au;

A pelofeta ko faipati i te igoa o Paala kae tapuaki ki tupua se aoga.

Ko te Mataupu a te Aliki o Teke ki Tena Fenua

9“Tela la, ko au te Aliki, ka fakaasi atu ne au taku mataupu e uiga ki toku se fiafia ki oku tino.

Ka fakaasi aka foki ne au a nisi mea e uiga ki te se lei o olotou tupuga.

10Olo ki te togala ki te fenua o Kupelu,

Kae uga atu se tino ki te saegala ki te fenua o Ketala.

Ka lavea ne koutou i te mea tenei ka tupu,

E seki tupu eiloa i aso mua.

11E seki ai eiloa se malo ne fuli ana atua,

E ui eiloa e se ne atua tonu a atua kona.

Ka ko oku tino ko oti ne fesuiaki ne latou a au,

Te Atua tela ne aumai ne ia te tulaga fakaaloalogina ki a latou,

Ki atua kola e se mafai o fai se mea lei mō latou.

12Tela la, ko fakatonu ne au a te lagi ke 'pole i te mataku,

Ke ofo kae poi,

13Me i toku fenua ko fai ne latou a agasala e lua:

Ko oti ne fulitua mai ki a au,

Te vaipuna e maua ei te vai fou,

Kae ne keli ne latou ne vaikeli,

Ne vaikeli se aoga kola e se mafai o taofi ei se vai.

Ko te Ikuga o te se Fakamaoni o Isalaelu

14“A Isalaelu e se se pologa;

E seki fanau mai i se kaiga pologa.

Ai a la e salasala ei a ia ne ona fili o ta?

15Ne 'gulu atu latou ki a ia e pela me ne leona;

Ne fakamasei ne latou tena fenua ke liu toafa,

Mo ona fa'kai ko ma'ofa valevale,

Kae ko seai ne tino e nofo i ei.

16Ao, ko tagata Mefisi mo tagata Tapenesa ne foa ne latou tena ulu.

17Isalaelu, a mea kona e pogai mai foki eiloa i a koutou!

Ne tiakina ne koutou a au, te Aliki te otou Atua,

I te taimi ne taki ei ne au koutou i te ala.

18Se a te mea ka maua ne koutou i te olo o koutou ki Aikupito

O inu i te vai o te Naila?

Se a te mea e maua ne koutou i te olo o koutou ki Asulia

O inu i vai o te Eufilate?

19Ka fakasala eiloa koutou ne otou amioga masei,

Ka fakamalaia foki eiloa koutou i te fulitua mai o koutou ki a au.

Ka matea ne koutou te 'kona mo te se o te mea a koutou tena ne fai,

O tele keatea mai i a au, te Aliki te otou Atua,

Kae ko se tumau foki te otou fakamaoni mai ki a au.

Ko au, te Aliki Sili i te Maluga, tena ne faipati atu.”

Isalaelu ko Ita ma Tapuaki atu ki te Aliki

20Muna a te Aliki Sili,

“Isalaelu, a koe ne teke mai ki taku pule i aso mua;

Ne ita koe ma fakalogo mai, kae tapuaki mai ki a au.

I luga i mauga foliki katoa,

Pela foki i lalo o malūga o lakau katoa,

E fai ei au tapuakiga ki atua se aoga.

21Ne toki ne au a koe e pela me se vine ne filifilia fakalei,

Mai fuataga tafasili i te gali.

Kae kiloke ki te mea ko fua mai i a koe!

A koe ko pela me se vine pala kae se aoga.

22Me pefea eiloa te malosi o te sopu e kana ei koe

Kae e lavea atu eiloa ne au a te lailai o te agasala i a koe.

23E mafai pefea ne koe o fai mai me e seki fakalailai eiloa ne koe a tou foitino,

I a koe e seki tapuaki eiloa ki a Paala?

Kiloke ki te agasala ne fai ne koe i te vanu;

Kilo ki te mea ko oti ne fai ne koe.

A koe ko pela me se kamela vao tela ko manako ki sena soa,

Kae ko tele sale fua

24Ko te mea eiloa ko tele kini atu ki loto i te toafa.

Kafai ko manako te kamela fafine ki sena soa tagata,

Ko oi te tino e mafai o taofi ne ia?

So se kamela tagata e manako ki ei,

E seai se mea e tau o fakafita a ia ki ei,

Me e toka faeloa i te taimi o te fakatasiga.

25Isalaelu, sa fakamae ou vae,

Sa fakamae foki tou kato i te fiainu,

I te fano fua o koe o tautali i tua o nisi atua.

Ne fai aka au pati penei, ‘Ikai! Ko se mafai ne au o toe foki.

Au ko alofa eiloa ki atua fakaatea,

Tela la, au ka tautali atu eiloa i a latou.’ ”

Isalaelu ko Tau o Fakasala

26Muna a te Aliki, “E pela eiloa mo te tino kaisoa tela ko maua atu kae ko fakamasiasigina, e pena eiloa te fakamasiasiga ka oko ki a koutou tino Isalaelu katoa — ko otou tupu mo tino maluga, otou faitaulaga mo pelofeta.

27A koutou e fakamasiasigina katoa, koutou kona e fai aka pela i te lakau ko te otou tamana, ka ko te kaupapa ko te otou matua. Ka tupu te mea tena i a koutou ne fulitua mai ki a au, kae seki fuli mai ki a au. Kae kafai ko maua koutou ne fakalavelave, ko kalaga mai ei koutou ke fanatu au o fakasao koutou.

28“Ko fea a atua kola ne faite ne koutou ma koutou? Kafai ko maua koutou ne fakalavelave, fai ki ei ke fakasao ne latou a koutou — manafai e mafai ne latou! Iuta, a te uke o otou atua ko pau eiloa mo te uke o otou fa'kai.

29Se a te mea tena e se malie koutou ki ei? Ai a ko teke mai ei koutou, ki a au?

30Ne fakasala ne au koutou, kae e seai se lei e maua mai i ei; e se talia eiloa ne koutou ke fakasao atu koutou ne au. Ne tamate ne koutou otou pelofeta, e pela eiloa koutou me ne leona kaitaua.

31Tino Isalaelu, fakalogo mai ki aku muna konei e fai atu. Kai fai eiloa au pela me se toafa ki a koutou, pela me se fenua pouli kae fakamataku? Ai a la e fai mai ei koutou pela me e fai eiloa ne koutou a te mea e loto koutou ki ei, kae ka se toe foki mai koutou ki a au?

32E mafai ne se tamafine o puli ana teuga taua io me se tamafine ka fakaipoipo o puli tena gatu fakaipoipo? Ka ko toku fenua ko puli i a latou a au i aso e uke ko se mafai o lau.

33A koutou ko oko eiloa i te atamai o tele i tua o otou fiafaiga. A fafine tafasili i te masei e mafai o tauloto i otou uiga.

34A otou gatu ko pisia i toto o tino mativa mo tino amiotonu, kae se ko toto o tino kaisoa.

“Kae e ui i mea katoa konei,

35kae e fai mai eiloa koe penei, ‘Au e se se; a te Aliki kaati ko se ita mai ki a au.’ Ka ko au, te Aliki, ka fakasala ne au a koe i a koe e se taku tonu mai i a koe ko agasala.

36Ko fakaseaoga ne koe a koe i tou fuli atu ki atua o nisi malo. Ka salamo koutou i a koutou ne fuli atu ki a Aikupito, e pela eiloa mo te fakamoemoega a koutou ki a Asulia, kae seki fai ne Asulia te mea ne fakamoemoe koutou ki ei.

37Ka fulitua atu koutou ki a Aikupito, mo otou ulu e punou i te masiasi. Ko au, te Aliki, ne teke ne au a tino kola ne fakalagolago koutou ki ei; e seai se mea e maua ne koutou mai i a latou.”