1 SAMUELU 25 - Tuvalu Revised Bible

Ko te Mate o Samuelu

1Ne mate Samuelu, kae ne maopoopo katoa tino Isalaelu o tagi fanoanoa i tena mate. Ne tanu ne latou a ia i tena fa'kai ko Lama.

Ko Tavita mo Apikaila

I te otiga o mea kona, ko Tavita eiloa ko fano ki te vao o Palana.

2-3E isi se tagata e igoa ki a Napalu, mai te kaukaiga o Kalepo, kae se tino mai te fa'kai o Maono, kae e isi ne manafa o ia i tafa o te fa'kai o Kalamelu. A ia tena se tagata maumea; e tolu afe ana mamoe kae afe ana kouti. A tena avaga ko Apikaila, se fafine taulekaleka kae poto, ka ko Napalu se tino kaitaua gofie fua, kae masei.

A Napalu e vele a fulu o ana mamoe i Kalamelu,

4ka ko Tavita, tela i te vao ne logo i te 'velega tena e fai,

5tena ne uga ei ne ia e tinogafulu tamataene ke olo o sala Napalu i Kalamelu, o fakaoko atu tena fakatalofaga ki ei.

6Ne fakatonu atu ne ia latou ke fai atu ki a Napalu penei: “A Tavita ko alofa mai ki a koe, kae tuku mai tena fakamanuiaga ki a koe, tou kaiga, mo mea katoa a koe.

7A ia ne logo i a koe ko fano o vele a fulu o au mamoe, tela la, a ia e manako ke iloa ne koe me i tausi mamoe a koe ne nofo sale matou, kae seai eiloa ne mea masei kai fai ne matou ki a latou. E seai eiloa se mea a latou kai kaisoa i te taimi ne nofo ei i Kalamelu.

8Fesili atu ki a latou, me e fakaasi atu eiloa ne latou. A matou nei e o'mai i te aso o te kaiga fiafia, kae ko fakamolemole mai Tavita ke tali faka'lei aka matou ne koe. Fakamolemole tuku mai te mea e mafai ne koe o tuku mai ki au tavini pela foki ki tou taugasoa ko Tavita.”

9Tena, ne fakaoko atu ei ne te kau a Tavita te fekau tena ki a Napalu i te igoa o Tavita. Tena ne faka'tali ei latou i kona,

10kae tali mai mo Napalu, “Ko oi Tavita? Au seki logo eiloa i te tino tena! I aso nei, a te fenua ko fonu eiloa i pologa e sola sale!

11E se talia ne au ke avatu a falaoa mo vai, mo aku manu ne 'ta ma aku tino vele mamoe, ke tuku atu ki tagata e se iloa ne au te koga ne o'mai mai i ei!”

12Ne 'foki atu te kau a Tavita, kae fai atu ki ei a muna a Napalu ne fai atu ki a latou.

13Tena ne fakatonu atu Tavita penei, “Faka'mau otou pelu!” Tena ne fakamau olotou pelu, pela foki Tavita, te mea eiloa ko olo mo te faselau o ana tagata, kae e nofo e luaselau o tausi olotou mea.

14E isi se tavini a Napalu e tokotasi ne fai atu ki a Apikaila, te avaga a Napalu penei, “A koe kai logo i avefekau ne uga mai ne Tavita mai te vao mo alofaaga ki a Napalu, kae ne tali se 'lei a ia ki a latou?

15Ka ko Tavita mo tena kau ko latou eiloa ko lei ki a tatou; e se ti o'mai o kosukosu tatou, kae i taimi katoa e nofo tasi sale ei tatou i fatoaga, e seai eiloa ne mea a tatou kai kaisoa ne latou.

16E puipui ne latou matou i ao mo po, i taimi katoa ne nofo tasi ei matou o tausi omotou lafu manu.

17Fakamolemole mafaufau ki te mea tena, kae onoono ki se faiga lei ke fai ne koe. E iku eiloa o isi se mea e tupu ki a Napalu, pela foki tena kaiga katoa. A ia se tagata loto makeke, tela la, e se fia fakalogo ki so se tino!”

18Tena, ne sala fakavave ne Apikaila e luaselau puta falaoa, e lua taga e fonu i uaina, e lima mamoe ne tao, e sefulufitu kilokalame o saito ne tao, e selau fuifui vine, kae luaselau keke ne faite ki mati malō, tena, fakauta ei ki luga i asini.

19Ne fai atu ei a ia ki tavini penei, “Mua koutou, kae fakamuli atu au.” Kae ne seki fakailoa eiloa ne ia tena mea tena ne fai ki tena avaga.

20A Apikaila ne fanatu i luga i tena asini, oko atu ki te pikoga i te feitu o te mauga, i kona foki eiloa, fetaui ei a ia mo Tavita mo tena kau e olo atu ki a ia.

21A Tavita ne mafaufau sale penei, “Ai a ne tausi faka'lei ei ne au a mea a te tagata tela i te vao nei? E seai eiloa se mea a ia kai kaisoa ne se tino, kae tenei te togi e maua ne au mai i a ia e tusa mo toku fesoasoani ki a ia!

22Ke tamate au ne te Atua manafai e se tamate ne au a tagata katoa kona koi tuai o ao!”

23I te mateaga ne Apikaila a Tavita, ne sopo fakavave ifo a ia kae fakasiga ki lalo i te laukele

24i vae o Tavita, kae fai atu ki a ia penei, “Tou malu, fakamolemole fakalogo mai ki a au! Tuku mai ki a au te 'se tena.

25Fakamolemole, sa saga ki a Napalu, te tagata se aoga tena! A ia e tautali eiloa i te uiga o tena igoa — ko valea! Tou malu, au e galo i te okoatuga o au tavini.

26Ko te Aliki e taofi ne ia koe ke se 'ta ne koe ou fili. Kae nei, au e tauto atu ki a koe, i te igoa o te Aliki ola, me i ou fili mo latou kola e taumafai o fakapakia koe ka fakasala pela mo Napalu.

27Tou malu, fakamolemole, talia mai a te meaalofa tenei ne aumai ne au ki a koe ke tuku atu ki tau kau.

28Tou malu, fakamolemole fakamagalo mai a au e tusa mo mea 'se ne fai ne au. A te Aliki ka fai ne ia koe mo tupu, pela foki a tino i tou gafa, me i a koe e taua i ana taua; kae ka se fai ne koe se mea 'se i tou olaga katoa.

29Kafai se tino e taumafai o tamate koe, ko te Aliki tou Atua ka puipui ne ia koe, e pela me se tino e puipui tena koloa taua. Ka ko ou fili, ka pei ne ia keatea, e pela me se tagata e sana a fatu ki tena sana fatu.

30Kae kafai ko oti ne fai ne te Aliki a mea 'lei katoa kola ne tauto ei a ia ki a koe, kae fai foki koe mo tupu o Isalaelu,

31tena la, ko se toe tau koe o salamo io me fanoanoa i au tino ne sona tamate mo tino ne taui atu ne koe te mate ki a latou. Tou malu, kae kafai ko fakamanuia koe ne te Aliki, sa puli mai a au.”

32Muna a Tavita ki a Apikaila, “Ke vikia te Aliki, te Atua o Isalaelu, tela ne uga mai ne ia koe i te aso nei!

33Au e fakafetai ki te Atua e tusa mo tou alofa mai, e pela foki mo te mea ne fai ne koe i te aso nei o taofi ne koe a au mai te fai o te agasala ko te tatino mo te taui atu foki toku puapuaga.

34A te Aliki ne taofi ne ia a au ke se fai se mea ki a koe. Ka ko au e tauto atu i te igoa o te Atua ola o Isalaelu me moi ne seki vave mai koe o fakafetaui mai ki a au, e penei e tamate katoa a te kau a Napalu kae seki oko ki te taeao!”

35Tena ne talia ei ne Tavita a mea ne aumai ne Apikaila ki a ia, kae fai atu ei a ia penei, “Foki ki tou fale kae sa manatu mafa ki te mea tenei. Ka fai ne au te mea e manako koe ki ei.”

36Ne foki atu Apikaila, ka ko Napalu e kai mai i meakai gali pela mo ne meakai a se tupu. Ko oko eiloa i tena kona kae fiafia, tela la, e seki fakailoa atu eiloa ne Apikaila ki ei ke oko eiloa ki te taeao o te sua aso.

37I te leiga o te kona o Napalu, ne fakamatala atu ei ne Apikaila a mea katoa ki a ia. Ne mate tena fatu, te mea eiloa ko fakamate tena foitino.

38E sefulu aso mai tua ifo, ko te Aliki eiloa ko tamate ne ia a Napalu.

39I te logoga o Tavita i a Napalu ko mate, muna a ia, “Ke vikia te Aliki! Ko oti ne taui atu ne te Atua ki a Napalu e tusa mo ana muna se lei ne fai ki a au, kae ne taofi ne te Atua a au mai te fai o te agasala. A Napalu ko fakasala ne te Aliki e tusa mo ana amioga masei ne fai.”

Tena ne ave ei te fekau a Tavita ki a Apikaila ke avaga laua.

40Ne olo atu ana tavini ki a Apikaila i Kalamelu kae fai atu ki ei penei, “A matou ne uga mai ne Tavita ke puke atu koe ke avaga koulua.”

41Ne punou ifo Apikaila ki te laukele, kae fai atu penei, “Au ko tena tavini, tela e toka o fulu a vae o ana tavini.”

42Ne tu fakavave a ia ki luga, sopo atu ei ki tena asini. Tena ne fanatu ei a ia mo ana tavini e tokolima, olo tasi atu eiloa latou mo tavini a Tavita, avaga eiloa laua mo Tavita.

43A Tavita ne avaga ki a Ainoama mai Iseleelu, kae nei ko avaga foki ki a Apikaila.

442Samu 3.14-16 I te vaitaimi tena, a Mekala, te tama fafine a Saulo, tela ne avaga mo Tavita, ko oti ne tuku atu ne Saulo ke avaga mo Palati, te tama tagata a Laisa, mai i te fa'kai o Kalima.