TEUTELONOME 24 - Tuvalu Revised Bible

Ko Avaga Mavae mo te Toe Avaga

1 tena la, ke tusi aka ne ia a pepa o te mavae, tuku atu ne ia ki te fafine kae uga ne ia ke fano keatea mai i tena fale.

2Kae kafai ne toe avaga a ia ki se isi tagata,

3kae ne iku aka foki i te tagata tena i a ia ko se fiafia ki te fafine, tusi foki ei ne ia a pepa mavae, tuku ei ne ia ki te fafine, kae uga ne ia ke fano keatea mai i tena fale. Io me ko tena avaga i te lua ne mate.

4I feitu katoa kona, a tena avaga muamua e se tau o toe foki mai o avaga ki ei. E tau o fakavasega ne ia te fafine tena ko lailai i feitu fakatapuakiga. Kafai e toe avaga a ia ki ei, se mea se lei tena i mua o te Aliki. E se tau mo koutou o fai se vaega agasala pena i te fenua tenei ne avatu ne te Aliki te otou Atua mo koutou.

Ko Nisi Tulafono

5“Kafai se tagata ne fatoa avaga, e se tau a ia o faulu ki loto i te kautau, io me e fakagalue i se galuega; e tau a ia o malolo i se tausaga e tasi, ko te mea ke nofo a ia i tena fale o fakafiafia tena avaga.

6“Kafai e tuku fakakaitalafu ne koe se mea ki se tino, ke mo a e puke mai ne koe tena fatu solo saito o fakaleoleo i te mea ma se togi tena kaitalafu; a te fatu solo saito ko te ola o te kaiga.

7 Eso 21.16 “So se tino e kaisoa ne ia sena taina Isalaelu kae fakapologa ne ia, io me e fakatau atu ne ia ke fai mo pologa, e tau o tamate. I te faiga tena e ave keatea ei te amioga masei tena mai i luga i te fenua.

8 Levi 13.1—14.54 “Kafai koutou e maua ne te lepela, masaua o fai a mea katoa kola e fakatonu atu ne faitaulaga i te matakaiga o sa Levi. Tautali ki fakatonuga kola ko oti ne ave ne au ki a latou.

9Nume 12.10 Masaua te mea ne fai ne te Aliki te otou Atua ki a Miliama i te taimi ne o'mai ei koutou keatea mai Aikupito.

10 Eso 22.26,27 “Kafai ne ave fakakaitalafu ne koe se mea ki se tino, sa ulu ki loto i tena fale o puke mai te gatu tela e aumai ne ia ke tausi ne koe ke oko ki te taimi e togi ei tena kaitalafu;

11fakatali malie i tua me e aumai eiloa ne ia ki a koe.

12Kafai a ia se tino mativa, sa nofo mo koe tena gatu i po;

13fakafoki sale ki ei i afiafi takitasi, ko te mea ke kafu sale i ei. Tena la, ka fiafia a ia, kae ka fiafia foki ei te Aliki tou Atua ki a koe.

14 Levi 19.13 “Sa fakaloiloigina se tavini mativa, faitalia me se Isalaelu io me se tino fakaatea e nofo i se fa'kai i te otou fenua.

15I aso katoa, koi tuai o to te la, e tau o ave ne koe tena togi i tena galuega i te aso; a ia e manako ki tupe kae ne fakatalitali foki ki ei. Kafai e se togi atu ne koe a ia, ka kalaga a ia ki te Aliki, ko taia ei koe i te agasala.

16 2Tupu 14.6; 2NTupu 25.4; Esela 18.20 “A matua e se tau o tamate i agasala e fai ne olotou tama. E pena foki tamaliki e se tau o tamate i agasala a olotou matua; a te tino e tamate eiloa i te agasala ne fai ne ia.

17 Eso 23.9; Levi 19.33,34; Teu 27.19 “Sa fakatogafiti ne koutou a tino fakaatea mo tamaliki seai ne matua, i mea kola e tau o maua ne latou; sa puke foki ne koutou a te gatu o te fafine ko mate tena avaga, o tausi ke oko ki te taimi e togi atu ei tena kaitalafu.

18Masaua i a koutou ne nofo pologa i Aikupito, kae ne fakasao koutou ne te Aliki te otou Atua; tena te mea e avatu ei ne au a te fakatonuga tena.

19 Levi 19.9,10; 23.22 “Kafai ko fano koe o luku mai au lakau kaina, kae puli o aumai a nisi saito kola ko oti ne kati ne koe, sa toe foki ki ei. A mea kona e tau o tuku ma tino fakaatea, tamaliki seai ne matua, mo fafine ko mate olotou avaga, kae ka fakamanuia koutou ne te Aliki te otou Atua i mea katoa a koutou e fai.

20Kafai ko oti ne tau au olive, sa toe foki o puke mai a mea ne toe, tuku i ei ma tino fakaatea, tamaliki seai ne matua, mo fafine ko mate olotou avaga.

21Kafai ko oti ne fakaputu au vine, sa toe foki fakalua o toe tae mai au vine; tuku i ei a mea e toe ma tino fakaatea, tamaliki seai ne matua, mo fafine ko mate olotou avaga.

22Sa puli i a koutou ne nofo pologa i Aikupito; tena te mea ne avatu ei ne au te fakatonuga tena.