AMOSA 7 - Tuvalu Revised Bible

Ko te Fakaasiga e Uiga ki Sē Akelise

1Ne oko mai ki a au te fakasiga mai te Aliki Sili. I te fakaasiga tena, ne lavea atu ne au a te Aliki e aumai ne ia a sē akelise e uke, mai tua ifo faeloa o te 'katiga o mouku e ave ki te tupu mo fagai ana manu. I te taimi tena te mouku ko fatoa kamata eiloa o 'tupu ake.

2I te fakaasiga tena, ne lavea atu ne au a sē akelise e kai ne latou a lakau lauolaola i te fenua, fai atu ei au penei, “Te Aliki Sili, fakamagalo tou malo! E mafai pefea o ola latou? A latou ne tino fua e se aoga kae vai'vai!”

3Ne 'fuli te loto o te Aliki kae fai mai, “A te mea tena ne lavea ne koe ka se fakataunu.”

Ko te Fakaasiga e Uiga ki te Afi

4Ne oko mai foki ki a au te sua fakaasiga mai te Aliki Sili. Ne lavea ne au i te fakaasiga tena a te Aliki e fakatokatoka o fakasala a ona tino ki te afi. Ne 'ka te moana lasi tela i lalo ifo o te laukele, ka ko te laukele ko kamata foki o 'ka.

5Ne fai atu ei au penei, “Te Aliki te Atua, fakamolemole, taofi te mea tena! E mafai pefea o ola ou tino? A latou e se aoga kae vaivai!”

6Ne toe 'fuli te loto o te Aliki kae fai mai, “Ka se fakataunu foki te mea tena.”

Ko te Fakaasiga e Uiga ki te Fua Fakatautau

7Ne oko mai foki ki a au te sua fakaasiga mai te Aliki. Ne lavea ne au i te fakaasiga tenei, a te Aliki e tu i tafa o te 'pui, tela ne faka'tonu ki te fua fakatautau, kae puke foki i tena lima a te fua fakatautau.

8Ne fesili mai a ia ki a au, “Amosa, se a te mea e lavea ne koe?”

Ne tali atu au, “Ko te fua fakatautau.”

Ne toe fai mai a ia, “E fakaaoga ne au a te fua fakatautau, e fakasi atu ei i oku tino e pela me se 'pui e se tu tonu. Ka se toe 'fuli toku loto e uiga ki te fakasalaga o latou.

9A koga kola e tapuaki i ei te fanauga a Isaako ka fakamaseigina. A koga tapu foki o Isalaelu ka fakama'lepe valevale. Ka fakagata ne au a te fakasologa o te kaigā tupu o te tupu ko Ielopoamo.”

Ko Amosa mo Amasia

10A Amasia ko te faitaulaga o Peteli, ne avatu tena fekau ki a Ielopoamo te tupu o Isalaelu penei: “A Amosa tenei e fakamasei ne ia koe ki tino. A lauga a ia, e fakauiga faeloa ki te fakamalaiaga o te fenua.

11Konei ana muna: ‘A Ielopoamo ka mate i te taua, ka ko tino o Isalaelu ka ave keatea mai te olotou fenua ki te tafeaga.’ ”

12Ne fai atu Amasia ki a Amosa, “Ko lava i kona, e te pelofeta! Toe foki ki Iuta o fai au lauga i ei. Fai ki ei ke togi ne latou a koe.

13Sa toe 'valo mai eiloa koe i konei i Peteli. A te mea nei ko te koga tapuaki o te tupu, ko te fale tapuaki o te fenua katoa.”

14Ne tali mai Amosa, “A au e se ko te vaega pelofeta tela e lauga atu ke maua se 'togi. A au se tino tausi manu, kae tausi fatoaga mati.

15Ka ko te Aliki ne aumai ne ia au mai taku galuega ko te tausi mamoe, kae fakatonu mai ke fano au o lauga atu ki tino Isalaelu.

16Tela la, ke fakalogo nei koe ki muna a te Aliki. E fai mai koe ke fakagata aku valoaga, ke fakagata foki toku faipati malosi ki tino Isalaelu.

17Kae tenei la e Amasia, ko fai mai te Aliki ki a koe, ‘A tau avaga ka fai mo fafine tali tagata i auala; ka ko au tamaliki ka 'mate i te taua. Ka vaevae foki tou laumanafa o tuku atu ki nisi tino; ka ko koe foki eiloa ka mate i se fenua fapaupau. Ka ko tino o Isalaelu, ko tonu eiloa me ka ave keatea mai te olotou fenua i te tafeaga.’ ”