TANIELU 5 - Tuvalu Revised Bible

Ko te 'Kaiga a Pelesala

1I te po e tasi, ne kami mai ne te Tupu ko Pelesala e tusa mo te toko afe tagata ma'luga ki te kaiga ne fakatoka ne ia, tena ne inu uaina fakatasi ei latou.

2I te taimi koi inu ei latou, kae fai te fakatonuga a Pelesala ke aumai a ipu aulo mo ipu siliva pela foki a pōla kola ne puke mai ne tena tamana ko Nepukanesa mai te Faletapu i Ielusalema. Ne uga te fekau a te tupu ke aumai a mea kona, ke inu i ei a ia mo ana tino maluga mo ana avaga tonu mo ana avaga fakasalasala.

3Tena, ne aumai a ipu mo pōla aulo kona, fakaaoga ei ne latou o inu uaina i ei,

4kae vikia ne latou a atua ne faite ki aulo, siliva, palasi, fiti, lakau mo fatu.

5I kona eiloa, kae sae aka mo te tapulima o te tagata o kamata o tusitusi i te 'pui o te palesi, ko te koga tena e tai maina malosi i te mainaga o moli. Ne lavea ne te tupu a te tapulima tena e tusitusi i te pui.

6Tena, kae poko mai mo te mataku ki a ia, tela la, ko lau'tea faka eiloa a ia mo ona tuli ko kamata pole'pole.

7Ne kalaga atu a ia ke aumai a tino poto katoa i mea taulaitu. I te okomaiga a latou ki loto, muna a te tupu ki a latou penei, “So se tino e mafai ne ia o faitau a muna kona e tusi mai kae fakamatala tena uiga, ka fakapei ki gatu o tupu, lanu kulakula, kae sai te malele aulo i tena ua, kae ka tokotolu ki te tupu i te malo.”

8Ne o'mai a tino fakatonutonu ki mua, kae seai eiloa se tino e mafai ne ia o faitau a muna kona, io me iloa ne ia te uiga o muna kona.

9A te tupu ko Pelesala ko gasolo eiloa o lau'tea tena foitino i te fanoanoa, ka ko ana tino maluga ko se iloa o fai se mea.

10Ne lagona ne te matua o te avaga a te tupu a te logoa mai o te tupu mo ana tino ma'luga, tena ne ulu atu ei a ia ki loto i te fale tena e fai ei te kaiga. Muna a ia penei, “Ke ola leva Tou Malu! Fakamolemole sa to fanoanoa, i a koe ko lau'tea faka eiloa.

11E isi se tagata i loto i tou malo e nofo i ei a te agaga o atua malu katoa. I te taimi ne tupu ei tou tamana, ne lavea atu ei te poto mo te mafaufau o te tagata tenei, e pela eiloa mo te poto o atua. Tela la, ne fakasopo a ia ne Nepukanesa, tou tamana, ke pule i ana tino fakatonutonu katoa.

12A te tagata tenei e tafasili te poto i fakamatalaga o moemiti mo mea funa. Uga tau fekau ki a Tanielu, tela ne fakaigoa ne te tupu ki a Peletisala, kae ka fakaasi atu ne ia a uiga o muna kona e tusi i te pui.”

Ko Fakamatala ne Tanielu a Tusitusiga i te Pui

13Ne aumai fakavave a Tanielu ki mua o te tupu, kae fai atu mo te tupu ki a ia penei, “A koe ko Tanielu, te Iutaia tela ne puke fakapagota mai ne toku tamana mai i Iuta?

14Au ne logo i te agaga o atua malu e nofo i a koe, ka ko koe foki se tagata poto kae atamai.

15A tino fakatonutonu mo tino fakataulaitu ne aumai ne au ki loto i konei, ke fakamatala mai te uiga o muna kola ne tusi i te pui, kae se mafai ne latou.

16Au ne logo me mafai ne koe o fakamatala a uiga o mea funa pena. Kafai e maua ne koe o faitau a te tusitusiga tena kae taku mai tena uiga, ko koe ka fakapei ki gatu o tupu lanu kulakula, kae ka fakamau i tou ua se malele aulo, se fakailoga o tou tulaga fakaaloalogia, kae ka tokotolu koe ki te tupu i te malo.”

17Ne tali mai Tanielu penei, “Au meaalofa kona ke tausi eiloa ne koe io me tuku atu ki se tino fakaatea. Ka faitau atu ne au ki Tou Malu a muna kona ne tusi i te pui, kae fakaasi atu foki tena uiga.

18“A te Atua Maluga ne fai ne ia a Nepukanesa tou tamana mo tupu takutakua, kae avatu foki ne ia ki ei te tulaga maluga kae fakaaloalogina.

19A ia se tagata tafasili i te takutakua, tela la, a tino o malo katoa e ma'taku i a ia. Kafai e loto a ia o tamate se tino, e tamate eiloa ne ia; kafai e manako a ia o fakaola se tino, e fakaola eiloa ne ia. E mafai ne ia o fakamasiasi so se tino e manako a ia o fakamasiasi, io me avaka ne ia so se tino e loto a ia ki ei, ki se tulaga maluga.

20Kae ona ne maua ne ia te loto fakamatamata mo te loto ita, mo te amio masei, tena ne ave keatea ei a ia mai tena nofogaaliki.

21Ne afuli keatea a ia mai te koga e nofo ei a tino; a tena mafaufau ko pela mo se mafaufau o te manu. E nofo tasi a ia mo asini vao, e kai ki mouku e pela me se pulumakau, kae moe fakasau i te matafale, e seai se mea e 'pulu ei a ia mai te sau o te po. Fakamuli ifo, ne talitonu ei a ia i te Atua Maluga e pule i malo faka‐te‐lalolagi katoa, kae e mafai fua o tuku ne ia ki so se tino e loto a ia ki ei.

22“Ka ko koe, tena tama, e ui eiloa ko oti ne iloa ne koe a mea kona, kae se fakamala'lalo ifo eiloa koe.

23Ne teke koe ki te Aliki o te lagi i te aumaiga ne koe o ipu mo pola kola ne aumai mai tena Faletapu. A koe mo au tino maluga, mo au avaga tonu mo au avaga fakasalasala, ne inu uaina i ipu kona kae vikia ne koutou a atua ne faite ki aulo, siliva, palasi, fiti, lakau mo fatu, ne atua e seai se lotou mea e mafai o lavea io me lagona, kae seai se lotou mea e iloa. Kae e seki fakaaloalo ne koutou a te Atua tela e pule i otou ola mo mea katoa e fai ne koutou.

24Tena te mea ne uga mai ei ne te Atua a te lima tena ke tusi ne ia a muna kona.

25“Konei a muna ne tusi ne te lima tena: ‘Numela, numela, mafa, vaevae.’

26A te uiga tenei: numela a te Atua ko oti ne numela ne ia te aofaki o aso ka fakagata ei ne ia tou malo;

27mafa a tou mafa ko oti ne fua ki te fua mea mafa, kae iloa aka nei i a koe ko to mama;

28vaevae a tou malo ka vaevae kae tuku atu ki tino Metai mo tino Pelesia.”

29Tena, fai eiloa te fakatonuga a Pelesala ki ana tavini ke fakapei Tanielu ki gatu loa faka‐tupu lanu kulakula, kae safe atu se malele aulo ki tena ua, te fakailoga tena i a ia ko maluga; kae ne fakasopo a ia ne te tupu ke tu i te tokotolu i tena malo.

30I te po eiloa tena, ko Pelesala eiloa, te tupu o Papelonia ko mate;

31kae sopo ei Taliu, te tagata Metai tela ko tusa mo te onosefulu lua ona tausaga, o fai mo tupu.