1A te Aliki ne faipati mai ki a au e uiga ki tino Isalaelu katoa kola e nofo i Aikupito, pela foki i fa'kai o Mikitolo, Tapenesa mo Mefisi, pela foki i te feitu ki saute o te fenua.
2A te Aliki Malosi, te Atua o Isalaelu, ne fai mai penei, “Ne lavea ne koutou a te fakamaseiga tela ne fakaoko ne au ki Ielusalema, pela foki ki nisi fa'kai o Iuta. Kona eiloa e takato maofa mai ke oko mai ki aso nei, kae e seai ne tino e nofo i ei
3ona eiloa ko tino i ei ne fai ne latou a amioga masei, kae ne fai ne latou au ke kaitaua. Ne ofo olotou taulaga ki atua fakaatea, kae tavini atu ki atua kola e seki tapuaki eiloa ki ei latou, io me ko koutou, io me ko otou tupuga.
4Ne uga sale atu eiloa ne au aku tavini ko pelofeta, o fai atu ki a koutou ke se fai ne koutou a te mea masei tena e se fiafia au ki ei.
5Ka ko koutou e se fia fakalogo, io me saga atu ki olotou muna e fai atu ki a koutou. E se manako eiloa koutou o tiaki otou faiga taulaga ki atua fakaatea.
6Tela la, ne fakaoko mai toku kaitaua ki fa'kai o Iuta, pela foki ki auala o Ielusalema, o sunu ki te afi. Ne maofa valevale, kae ko se kilogina eiloa i te mataga, ke oko mai eiloa ki aso nei.
7“Tela la, a au, te Aliki Malosi, te Atua o Isalaelu, ko fesili atu nei ki a koutou, me ai a e fai ei ne koutou se vaega amioga masei pena ki a koutou. A koutou e manako o aumai te malaia ki luga i tagata mo fafine, tamaliki mo pepe, ko te mea ke seai ne tino o koutou e toe mai?
8Ai a e fai ei ne koutou au ke kaitaua i te tapuaki atu o koutou ki tupua, mo te ofo atu o otou taulaga ki atua fakaatea i konei i Aikupito, te koga tenei ne o'mai koutou o nofo i ei? E a, e fai ne koutou a te mea tena ko te mea ke ta fakapalele koutou, ko te mea ke takalialia atu a malo ki a koutou, kae fakaaoga te otou igoa o fai muna fakamalaia?
9E a, ko puli i a koutou a amioga masei katoa kola ne fai i fa'kai o Iuta, pela foki i auala o Ielusalema, ne otou tupuga mo tupu o Iuta mo olotou avaga, pena foki koutou mo otou avaga?
10Kae e seki fakamalalo eiloa koutou ke oko mai ki te aso nei. E seki fakaaloalo ne koutou a au, seki tausi foki koutou ki tulafono kola ne avatu ne au ki a koutou mo otou tupuga.
11“Tela la, a au, te Aliki Malosi, te Atua o Isalaelu, ka ofa fakamasei ne au a te fenua katoa o Iuta.
12Ka ko tino o Iuta konei e toe mai, kola e manako eiloa ke olo latou o nofo i Aikupito, ka taumafai au ke ta fakapalele katoa. A latou katoa, tino maluga mo tino malalo, ka mate i Aikupito i te taua io me i te fiakai. A tino ka mataku ma kilo ki a latou; ka takalialia a tino i a latou kae fakaaoga ne latou te lotou igoa i olotou muna fakamalaia.
13Ka fakasala ne au a tino kola e nofo i Aikupito, e pela eiloa mo te fakasalaga ne au a Ielusalema, e fakasala ki te taua, te fiakai mo te famai.
14A tino o Iuta kola koi ola kae ne o'mai o nofo i Aikupito, e seai eiloa se tino i a latou e fakasao, seai foki eiloa se tino o latou e toe foki ki Iuta, te koga e fia olo latou o nofo i ei. E seai se tino e toe foki, na ko mu tino fua kola ne sola ki ei.”
15Tena la, a tagata kola e iloa ne latou i olotou avaga ne ofo taulaga ki atua fakaatea, mo fafine katoa kola e tu i kona, fakatasi mo tino Isalaelu katoa kola e nofo i te feitu ki saute o Aikupito — se potukau tokouke eiloa — ne fai mai ki a au penei,
16“A matou e se fia fakalogo ki te mea tena ne fai mai ne koe i te igoa o te Aliki.
17E fai eiloa ne matou a mea katoa kola ne mafaufau matou o fai. Ka ofo atu eiloa ne matou omotou taulaga ki te motou atua fafine ko te Tupu Fafine o te Lagi, kae ka 'ligi atu foki ne matou omotou taulaga uaina ki a ia, e pela eiloa mo te mea ne fai sale ne matou mo omotou tupuga, mo te motou tupu mo omotou takitaki, i fa'kai o Iuta mo auala o Ielusalema. I taimi kona, e uke i ei omotou meakai, kae maumea, kae seai ne fakalavelave e oko ki a matou.
18Kae i te taimi eiloa ne gata ei te ofo sale atu ne matou o taulaga ki te Tupu Fafine o te Lagi, kae fakagata foki te 'ligi sale ne matou o te taulaga uaina a matou ki a ia, tena ko seai ei ne motou mea, mo omotou tino ko mate foki i taua, mo te fiakai.”
19Ne toe fai mai a fafine penei, “Kafai e faite sale ne matou a keke ke foliga ki te Tupu Fafine o te Lagi, kae ofo taulaga ki a ia, kae ligi taulaga uaina ki ei, a omotou avaga e fiafia eiloa i te mea e fai ne matou.”
20Tena ne fai atu ei au ki tagata mo fafine katoa kola ne tali mai pena ki a au,
21“A taulaga a koutou mo otou tupuga, mo otou tupu mo otou takitaki, mo tino o te fenua kola ne ofo atu i fa'kai o Iuta pela foki i auala o Ielusalema — i te otou fakatau e se iloa ne te Aliki otou mea kona ne fai, io me ko puli i a ia?
22I te aso nei, a te otou fenua ko maofa valevale kae seai se tino e nofo i ei. Ko oko eiloa i te mataga o te otou fa'kai, kae ko fakaaoga ne tino a te igoa o te otou fa'kai e pela me se muna fakamalaia, me i te Aliki ko se maua ne ia o kufaki otou amioga masei, mo otou faifaiga se lei.
23A te puapuaga tenei ne oko mai ki a koutou, ona ko koutou ne ofo otou taulaga ki atua fakaatea kae agasala ki te Aliki i te se fakalogo o koutou ki ana fakatonuga katoa.”
24-25Ne faipati atu au ki tino katoa, kae maise a fafine, a muna a te Aliki Malosi, te Atua o Isalaelu, kola ne fai ki tino o Iuta kola e nofo i Aikupito: “A koutou tagata mo otou avaga ko oti ne fai otou tautoga malu ki te Tupu Fafine o te lagi. Ne tauto koutou me e ofo ne koutou otou taulaga ki a ia, kae ligi otou taulaga uaina ki a ia, kae ne tausi eiloa ne koutou o tou tautoga. Ko lei! Tausi ki otou tautoga! Fai a mea kola ne tauto koutou ki ei!
26Kae nei, fakalogo mai ki taku tautoga, tela ne fai i toku igoa mana, ki a koutou katoa tino Isalaelu i Aikupito: Ka se toe talia ne au se tino i a koutou ke fakaaoga ne ia toku igoa o fai sena tautoga penei, ‘Au e tauto i te igoa o te Atua ola!’
27Ka fai eiloa ne au koutou ke se maumea, kae ke ta fakapalelegina. A koutou katoa ka mate, me mate i te taua io me i te famai, ke oko eiloa ki te taimi e seai ei se tino o koutou e toe.
28Kae ka isi ne tino i a koutou e sao mai i te mate, kae ka foki mai mai Aikupito ki Iuta. Tena la, ka iloa ei ne tino kona e toe mai, me e a ai a muna e taunu, ko aku muna me ko olotou muna.
29A au, te Aliki, ka tuku atu ne au se mea e fakatalitonu ei me ka fakasala ne au koutou i te koga tenei, ka ko taku tautoga e uiga ki te fakamaseiga tela e fakaoko mai ki a koutou e taunu eiloa.
302Tupu 25.1-7 Ka tuku atu ne au a te tupu o Aikupito ko Hokala ki ana fili kola e fia tamate ki a ia, e pela eiloa mo te tukuatuga ne au a te tupu o Iuta ko Setekaia ki tena fili ko Nepukanesa, te tupu o Papelonia, tela e fia tamate ki a ia.”
Who We AreWhat We EelieveWhat We Do
2025 by iamachristian.org,Inc All rights reserved.
