2 KOLINITO 11 - Tuvalu Revised Bible

Ko Paulo mo Apositolo 'Loi

1Au e loto ke kufaki fakatasi tatou i taimi e tai valea ei au. Fakamolemole, kufaki mai!

2Au e masalosalo ki a koutou, e pena foki te Atua ki a koutou; me i a koutou e pela eiloa mo se tamafine e seki iloa ne ia tagata, tela ne fai feagaiga ke avaga mo te tagata e tokotasi, ko Keliso.

3Kene 3.1-5,13Au e mataku i otou mafaufauga mana faka'segina, ko tiaki ei ne koutou te otou 'lei mo te tuku katoa atu otou loto i a Keliso, e pela mo Eva ne fakaloiloi foki ne te gata i tona poto faitogafiti.

4Me kafai e vau se tino o folafola atu ki a koutou se isi Iesu mai te Iesu tela ne folafola atu ne matou, io me kafai e maua ne koutou se agaga fakaatea mai te Agaga tela ne maua ne koutou mai a matou, io me talia ne koutou se sua tala 'lei mai te tala 'lei ne talia ne koutou mai a matou, e vave eiloa te ma'fuli otou loto ki ei o talia!

5I toku taofi, e seai se mea e ala ei o malalo au i apositolo 'loi kola e fakasilisili ne koutou.

6Kafai foki e valea au i te lauga, kae iai te poto i a au. Ko oti ne fakamalamalama atu ne matou ki a koutou i taimi katoa, i mea katoa ne akoako atu.

7Ne folafola atu ne au te Tala 'Lei a te Atua ki a koutou e aunoa mo soku fai atu ki se 'togi. Ne fakasilisili foki ne au koutou i lo au. E a, e 'se au i ei?

8I taku galuega i a koutou, au ne 'togi ne nisi Ekalesia. Ko tona uiga, e pela me ne 'fao ne au olotou mea ke fesoasoani atu ei au ki a koutou.

9Fili 4.15-18 Kae i te taimi ne fakatasi ei tatou, e seki fia akai atu au ki ne tupe i te taimi ne manako ei au ki tupe; me i te kau taina kola ne o'mai mai Maketonia, ne aumai ne latou a mea katoa ne manako au ki ei. Tela la, i taimi ko teka mo taimi konei e o'mai, e se toe fakafi'ta ne au koutou.

10Ona ko te munatonu a Keliso e i loto i a au, ka se taofi eiloa ne au toku fakamatamata i koga katoa o Eleni.

11Ai a? Ona ko au e se alofa ki a koutou? E iloa ne te Atua i a au e alofa ki a koutou!

12Ka fai eiloa ne au a mea kola e fai nei ne au, ko te mea ke se mafai ne nisi apositolo 'loi o fakamata'mata, kae fai ake pela me fai foki ne latou a galuega kola e fai ne matou.

13A tino pena ne apositolo 'loi, e ga'lue fakaloiloi, e sui olotou foliga ke pela mo ne apositolo tonu a Keliso.

14Kae se tioa eiloa, i a Satani e mafai ne ia o sui ona foliga ke pela mo se agelu o te mainaga!

15Tela la, e se se mea faigata manafai e sui foki foliga o ana tavini ke pela mo tavini a te amiotonu. Ka fakasala latou ona ko olotou galuega ma'sei ne fai.

Ko Puapuaga Fakaapositolo o Paulo

16Ke toe faipati atu au: ke seai se tino e mafaufau pela i a au e valea. Kae kafai e mafaufau koutou pena, ke talia la ne koutou au e pela mo se vale, ko te mea ke isi fua se mea foliki e fakamatamata au ki ei.

17Aku muna konei e fai atu, ne seki fai atu ne au i te pule a te Aliki, kae i toku fakamatamata tenei ko faipati ei au e pela mo se vale.

18Ona ko te tokouke e fakamata'mata i mea faka te foitino; e pena foki au.

19E taofi koutou i a koutou e 'poto, kae tela la e talia ne koutou a te talaiga a tino va'lea!

20Ko tona uiga e talia ne koutou manafai e vau se tino o pule koutou, io me o malei koutou, io me o takitaki 'se koutou, ke oko ki te 'pa otou kalafou.

21I taku nofoga i a koutou e seki pena aku faiga ki a koutou, kae ne atafai atu eiloa au ki a koutou.

A faiakoga 'loi konei e fakamata'mata ki fua o olotou galuega ne fai ki a koutou. E tiga toku takua pela mo se vale, au foki e fia fakamatamata e uiga ki aku galuega ne fai mo koutou.

22E a, a latou ne tino Epelu? E pena foki au. E a, a latou ne tino Isalaelu? E pena foki au. E a, a latou ne fanau a Apelaamo? E pena foki au.

23Galu 16.23 E a, e talitonu fakamaoni me i a latou ne tavini tonu a Keliso? E tiga toku takua e pela mo se vale, ka ko te mea e sili atu au i lo latou! Ne galue malosi atu au i lo latou. Ne fale puipui fakauke foki au i lo latou. Ne sili foki oku kiniga i lo latou. E uke foki a taimi ne tai mate ei au i lo latou.

24Teu 25.3E fakalima taku kiniga ne tino Iutaia, kae takitolu sefulu iva a kini i te taimi e tasi.

25Galu 16.22 E fakatolu taku kiniga ne tino Loma, kae fakatasi taku peipeiga ki fatu; ko fakatolu foki a taimi ne 'kasa vakamutu i taku folauga i ei, kae tasi te fakalavelave ne tapeapea ei au i te moana i te lua sefulu fa itula.

26Galu 9.23; Galu 14.15 I te ukega o aku malaga ne puapuagatia au i vaitafe, i tino faomea, i tino Iutaia, i tino o fenua fakaatea, i fa'kai lasi, i te vao, i te tai, pela foki mo taina 'loi.

27Au ne galue mo te fi'ta, au ne se moe 'lei i te ukega o taimi; au ne fia kai kae fia inu; e uke foki a taimi ko seai ne aku meakai; au ne mokotia kae seai ne oku gatu.

28Kae se gata fua i mea kona, e isi foki se mea e mafatia ei au i aso takitasi, ona ko toku loto finafinau mo Ekalesia katoa.

29Kafai se tino ko vaivai, e vaivai foki au; kafai foki e paku se tino ki te agasala, e fonu foki au i te fanoanoa.

30Kafai e 'tau au o fakamatamata, e 'tau au o fakamatamata ki mea kola e fakaasi mai ei toku vaivai i te feitu faka te foitino.

31A te Atua te Tamana o te tou Aliki ko Iesu, ko ia tela e vikia ki te se gata mai, e iloa foki ne ia i a au e se loi.

32Galu 9.23-25 I taku nofoga i Tamaseko, a te kovana tela e nofo mai lalo o te tupu ko Aleta, ne tuku ne ia leoleo ke 'tu i mataloa o te fa'kai o puke au fakapagota.

33Ka ko au ne tukutuku ifo i te kete i te fakamalama o te olo, sao atu ei au mai ona lima.