2 NOFOAIGA TUPU 23 - Tuvalu Revised Bible

Ko te Tekega o Atalia(2Tupu 11.4-16)

1I te katoaga o te ono o tausaga o te fakatalitaliga a Ieoiata, ko te mea eiloa ko tonu i a ia ke na gasue a ia o fai se mea. Ne fai tena feagaiga mo ofisa o kautau e tokolima: ko Asalia te tama tagata a Ieloama, Isamaeli te tama tagata a Ieoananu, ko Asalia te tama tagata a Opeta, ko Maseia te tama tagata a Ataia, mo Elisafata te tama tagata a Sikeli.

2Ne malaga atu latou ki fa'kai katoa o Iuta, kae ne o'mai latou mo te kau sa Levi mo matai katoa o kaukaiga ki Ielusalema.

3 2Samu 7.12 Ne maopoopo katoa latou i te Faletapu, fai ei ne latou i kona a te lotou feagaiga mo Ioasa, te tama tagata a te tupu. Muna a Ieoiata ki a latou, “Tenei te tama tagata a te tupu fakamuli nei! E tau a ia o fai nei mo tupu, e pela eiloa mo te tautoga a te Aliki e uiga ki te gafa o te Tupu ko Tavita.

4Tenei te mea e tau o fai ne tatou. Kafai ko o'mai a faitaulaga mo te kau sa Levi o fai te lotou galuega i te Sapati, e tasi vae tolu o latou ka tausi ne latou a mataloa o te faletapu,

5a te sua tasi vae tolu ka leoleo ne latou a te palesi, ka ko te toega ka nofo i te Mataloa o Fakavae. A tino katoa ka maopoopo i te koga fono o te faletapu.

6E seai eiloa se tino e talia ke ulu ki loto i te faletapu, ko faitaulaga fua mo te kau sa Levi kola e tu. E mafai ne latou o ulu ki loto, me i a latou ko oti ne fakatapu, ka ko te toega o tino e tau o tautali i fakatonuga a te Aliki, o nofo i tua.

7A te kau sa Levi e tu fakatamilo i te tupu, mo olotou pelu e toka, kae ka nofo eiloa o tausi te tupu i so se koga e fano ki ei a te tupu. So se tino e taumafai o ulu ki loto i te Faletapu e tau o tamate.”

8Ne fai eiloa ne te kau sa Levi mo tino Iuta a te fakatonuga a Ieoiata. A tagata kola ko oti olotou tūga i te Sapati, ne seki fakamalolo, tela la, e maua eiloa ne takitaki a tino e olo atu o tu, mo tino kola ko palele mai olotou tūga.

9Ne tuku atu ne Ieoiata ki ofisa a tao mo talita kola e a Tavita, kola ne tuku i te Faletapu.

10Ne fakatulaga ne ia a tagata mo olotou pelu i olotou lima, i mua o te Faletapu, ke puipui ne latou a te tupu.

11Tena la, ne taki atu ne Ieoiata a Ioasa ki tua, tuku atu mo te kalauna ki tena ulu, kae avatu se kopi o tulafono e uiga ki te tulaga fakatupu. Tena la, ne fai ei a ia mo tupu. Ne faū ne te faitaulaga ko Ieoiata mo ana tama tagata a Ioasa, tena la, kae kalaga mo tino katoa penei, “Ke ola loa te tupu!”

12Ne lagona ne Atalia a tino e kalaga fiafia e uiga mō te tupu, tena ne fanatu fakavave atu ei a ia ki te Faletapu, te koga e maopoopo mai i ei a te vaitino.

13I kona, ne lavea ei ne ia a te tupu fou, i te mataloa ki te Faletapu, e tu mai i tafa o te pou o tupu, kae e nikoi ne ofisa o te kautau mo te kau fakatagi pu. A tino katoa ko kalaga mo te fiafia kae fakatagi a pu, ka ko te kau tata o te Faletapu e taki ne latou te fakafiafiaga ki olotou mea fakatagitagi. Ne puke Atalia ki ona gatu, saesae ne ia, kae kalaga penei, “Koutou ko teke ki te malo! Koutou ko teke ki te malo!”

14A Ieoiata e se manako ke tamate a Atalia i tafa o te Faletapu, tena ne kalaga atu ei a ia ki ofisa o te kautau, kae fai atu penei, “Avatu a ia i te va o laina o sotia, kae tamate so se tino e taumafai o fakasao a ia.”

15Ne puke ne latou a ia, ave ne latou ki te palesi, tamate ei ne latou i te Mataloa o Solofanua.

Ko Mea ne Fai ne Ieoiata(2Tupu 11.17-20)

16Ne fai ne Ieoiata a te Tupu ko Ioasa mo tino katoa ke kau atu ki a ia, i te faiga o te lotou tautoga ki te Aliki, i a latou ka fai mo ona tino tonu eiloa.

17Oti aka, olo atu ei latou ki te faletapu o Paala o ofa ki lalo. Ne ofa ne latou a fata-fai-taulaga mo tupua i kona, kae tamate ne latou a Matana, te faitaulaga a Paala, i mua o fata-fai-taulaga.

18Ne tuku ne Ieoiata a faitaulaga mo te kau sa Levi ke pule i galuega o te Faletapu. E tau o fai ne latou a galuega ne tuku atu ki a latou, ne te Tupu ko Tavita, kae ke sunu foki a taulaga e ofo atu ki te Aliki, e pela eiloa mo Tulafono a Mose. E pule foki ne latou te faiga o pese mo mea fakatagitagi, pela foki mo fakafiafiaga.

19Ne tuku foki ne Ieoiata ne sotia ke tausi ne latou a mataloa o te Faletapu, ke mo a se tino lailai i feitu fakatapuakiga e ulu ki loto i te Faletapu.

20A ofisa o te kautau, tino maluga, ofisa, mo tino katoa, ne o'mai fakatasi mo Ieoiata i te solo a latou o aumai te tupu mai i te Faletapu ki te palesi. Ne ulu atu latou i te mataloa lasi, fanatu ei te tupu o nofo i tena nofogaaliki.

21A tino katoa ko oko eiloa i te fiafia, mo te fa'kai ko filemu faka eiloa, me ko mate atu a Atalia.