SALAMO 77 - Tuvalu Revised Bible

Fakamafanafanaga i Taimi o Puapuaga

1Au e tagi pakalaga ki te Atua;

Au e tagi pakalaga, kae lagona ne ia.

2I taimi o puapuaga, au e talo ki te Aliki;

i po katoa au e sisi oku lima kae 'talo,

Kae se maua eiloa ne au se fakamafanafanaga.

3Kafai e mafaufau au ki te Atua, au e manava fi'ta;

Kafai e mafaufau loto au,

E tupu ei toku loto vaivai.

4E fai ne ia au ke se to taku moe;

Ko oko foki toku fanoanoa, ko se mafai ne au o faipati.

5Au ko mafaufau ki aso ko 'teka,

Kae masaua foki ne au a tausaga ko palele atu.

6E mafaufau 'mafa au i te po katoa;

E mafaufau 'loto au kae fai ifo ei au ki a au eiloa penei:

7“E a, ko te Aliki nei ka se saga faeloa ki a matou?

E mata e se toe fiafia mai a ia ki a matou?

8Kae a, ko gata nei tena alofa ki a matou?

Ko se aoga nei ana folafolaga?

9E a, ko puli i te Atua o alofa mai?

Ko tena alofa nei ko sui ne tena ita?”

10Ne fai ake aku muna penei, “Tenei te mea tafasili e faka'mae ne ia toku loto,

i te Atua ko seai sena malosi.”

11Te Aliki, ka manatua ne au au galuega ma'losi;

E toe fakamasausau ne au au galuega fakaofoofogia ne fai i aso ko 'teka.

12Ka mafaufau au ki mea katoa ko oti ne fai ne koe;

Ka mafaufau 'loto au ki mea fakaofoofogia katoa ne fai ne koe.

13Te Atua, e 'malu mea katoa e fai ne koe.

E seai foki se atua e sili atu i a koe.

14A koe ko te Atua tela e fai ne koe vavega;

Ne fakaasi foki ne koe tou malosi ki fenua katoa.

15Ko tou 'mana foki tela ne fakasao ei ne koe ou tino,

Ko mokopuna o Iakopo mo Iosefa

16Te Atua, a te mateaga ne vai a koe, ne ma'taku latou,

A te moana 'poko foki ne polepole.

17Ko ligi ifo ne kaumana te ua;

Ne pa'pa mo fatili mai te lagi

Kae lapalapa foki mo uila i koga katoa.

18A te gulu o tou fatili ko salalau atu,

Ka ko te lapaga o uila ko maina atu ki te lalolagi katoa;

Ko polepole kae galulu te lalolagi.

19Ne sasale koe i va o galu;

Ne saele foki koe i te moana 'poko,

Ka ko ou kalafaga ne se matea.

20Ne takitaki ne koe tou fenua pela me se tausi mamoe,

Ka ko Mose mo Alona ko takitaki o latou.