1 NOFOAIGA TUPU 23 - Tuvalu Revised Bible

1 1Tupu 1.1-40 I te taimi ko toeaina ei a Tavita, ne fai ne ia tena tama ko Solomona ke fai mo tupu o Isalaelu.

Ko te Galuega a te kau Sa Levi

2Ne fakamaopoopo ne te Tupu ko Tavita a takitaki katoa o Isalaelu, pela foki mo faitaulaga mo te kau sa Levi.

3Ne lau ne ia te aofaki katoa o te kau sa Levi kola ko taki tolusefulu tausaga o fano ki luga. A te aofaki katoa e tusa mo te 38,000.

4E luasefulu fa afe ne tuku ne te tupu ke pulepule ne latou te faiga o te galuega o te Faletapu, e ono afe ke fakamaumau ne latou a tala o mea, kae fakamasino a kinauga,

5e fa afe ke tiute, kae e fa afe ke tavae ne latou te Aliki o fakaaoga a mea fakatagitagi kola ne aumai ne te tupu mo fakaaoga i vikiga o te Atua.

6Ne vaevae ne Tavita a te kau sa Levi ki vaega e tolu, i olotou kaukaiga eiloa: Kelesona, Koate, mo Melali.

7A Kelesona e tokolua ana tama tagata: ko Latana mo Simei.

8A Latana e tokotolu ana tama tagata: ko Ieielu, Setama, mo Ioelu.

9A latou ko matai o kaukaiga kola ne 'tupu mai i a Latana. (A Simei e tokotolu ana tama tagata: ko Selomota, Hasielu, mo Halana).

10-11A Simei e tokofa ana tama tagata:ko Iahata, Sina, Ieusa, mo Pelia, tena te fakasologa mai i te tino matua o fanaifo ki te tino foliki. A Ieusa mo Pelia e se tokouke tino i o la gafa, tena la, ne lau ei laua se kaukaiga e tasi.

12A Koate e tokofa ana tama tagata: ko Amalamo, Isala, Hepelona, mo Usieli.

13Eso 28.1 A tena tama matua ko Amalamo, ko te tamana o Alona mo Mose. A Alona mo tena gafa ne fakatapu ke pule ne latou a mea tapu ki te se gata mai, ke sunu ne latou a mea manogi i te tapuakiga ki te Aliki, ke tavini latou ki a ia, kae fakamanuia a tino i te igoa o te Aliki.

14Ka ko tama tagata a Mose, te tagata o te Atua, ne fakatasi ki te kau sa Levi.

15A Mose e tokolua ana tama tagata, ko Kelesoma mo Eliesa.

16A te takitaki i tama tagata a Kelesoma ko Sepuelu.

17A Eliesa e tokotasi eiloa tena tama tagata, ko Lehapaia, ka ko Lehapaia e tokouke tena gafa.

18A Isala, te tama tagata a Koate i te tokolua, e isi sena tama tagata, ko Selomita, te matai o te kaukaiga.

19A Hepelona, te tama tagata a Koate i te tokotolu, e tokofa ana tama tagata: ko Ielia, Amalia, Iasielu, mo Iekameamo.

20A te tama fakaoti a Koate, ko Usieli, e tokolua ana tama tagata, ko Mika mo Isia.

21A Melali e tokolua ana tama tagata, ko Mali mo Musi. A Mali e tokolua foki ana tama tagata, ko Eleasalo mo Kiso.

22A Eleasalo ne mate seai ne ana tama tagata, kae ne tama fafine fua. Ana tama fafine ne avaga ki olotou fai tuagaene, tama tagata a Kiso.

23A Musi, te tama tagata i te tokolua a Melali, e tokotolu ana tama tagata: ko Mali, Eta, mo Ielemota.

24Tena te gafa o Levi, i olotou kaukaiga mo kaiga takitasi, ko tino katoa kona ne fakamau olotou igoa. A tino katoa i tena gafa, kola ko taki luasefulu tausaga o fano ki luga, e tofu katoa mo vaega o latou i te galuega ki te faitega o te Faletapu o te Aliki.

25Muna a Tavita, “A te Aliki te Atua o Isalaelu ko oti ne aumai ne ia te filemu ki tena fenua, ka ko ia ka nofo eiloa i Ielusalema ki te se gata mai.

26Teu 10.8 Tela la, ko se toe manakogia te kau sa Levi ke aveave ne latou te Faleie o te Aliki mo mea katoa kola e fakaaoga i tapuakiga.”

27Mai i luga i te toe fakatonuga a Tavita, tena ne fakamau ei a igoa o tino Sa Levi katoa ke ga'lue, manafai ko katoa taki luasefulu tausaga.

28Nume 3.5-9 Konei a galuega ne fakasoa ki ei latou: ke fesoasoani ki faitaulaga i te gafa o Alona i tapuakiga i te Faletapu, ke tausi ne latou a potu ateatea mo potu o te Faletapu, kae ke tausi ke mo ā e lailai i feitu faka‐tapuakiga a mea tapu katoa;

29ke fakatoka kae tausi te falaoa e ofo atu ki te Atua, falaoa e fakaaoga i taulaga, falaoa e se palu ki te mea fakafete, taulaga kola e tao, mo te falaoa e palu mo te sinu olive; o fua te 'mafa mo te uke o taulaga o te Faletapu;

30kae o viki kae tavae te Aliki i taeao mo afiafi katoa,

31pela foki i taimi kola e ofo ei a taulaga sunu ki te Aliki i Sapati, i te Kaiga Fiafia o te Masina Tu, mo nisi kaiga fiafia faka‐te‐lotu. E isi eiloa ne tulafono ne fakatoka ke fakasino ei te aofaki o sa Levi e tau o fai ne latou te galuega tenei i taimi takitasi. A te kau sa Levi, ne tuku ki ei te tofi o tapuaki atu ki te Aliki, i taimi katoa.

32Ko latou e pule i te tausiga o te Faleie o te Aliki mo te Faletapu, pela foki o fesoasoani ki olotou kaiga ko faitaulaga i te gafa o Alona, i tapuakiga i te Faletapu.