FAATAOTO 12 - Tuvalu Revised Bible

1So se tino tela e fiafia ki te poto e fiafia ke fakatonu atu ne se tino ana mea se ne fai. Se uiga valea fua o ita manafai e fakatonu koe ne se tino.

2A te Aliki e fiafia ki tino amio lei, kae e fakamalaia ne ia a tino kola e fai fuafuaga masei.

3A te amio masei e se aumai ne ia te saogalemu, ka ko tino amiotonu e tumau i olotou tulaga.

4A te fafine amio lei e fai ne ia tena avaga ke fakamatamata kae fiafia ona ko tena lei; ka ko te fafine tela e fakamasiasi ne ia tena avaga e pela mo te masaki ko te kenisa i te ivi o te tagata.

5A te tino faimeatonu e fai faka'lei ne ia a tino; a te tino amio masei e manako fua o fakatogafiti a tino.

6A muna a te tagata amio masei e tatino, ka ko muna a te tagata amiotonu e fakasao ne ia a tino puapuaga.

7A tino amio masei e mate kae seai ne fanau, ka ko kaiga o tino amiotonu e ola faeloa.

8Kafai koe e poto, e tavae koe ne tino; kafai koe e valea, e katagina koe ne tino.

9E sili atu te nofo penei mo te tokoukega o tino, o galue mo tausi te olaga, i lo te taumafai o fia takutakua, kae tela la, e mate fia'kai fua.

10A te tagata amiotonu e tausi fakalei ki ana manu, ka ko tagata amio masei e fai fakamasei ki ana manu.

11A te tagata toki lakau tela e galue malosi e uke ana meakai e maua, kae se mea valea manafai e fakamaumau ou taimi o fai a galuega se aoga.

12A te mea e manako ki ei a tino amio masei ko te fai o uiga masei, ka ko tino amiotonu e tumau i olotou tulaga.

13A te tagata amio masei e lavelavea foki eiloa i ana muna e fai, ka ko te tagata amiotonu e sao mai i fakalavelave.

14A tou taui e maua eiloa i au muna e fai, pela foki i au mea e fai; ka maua eiloa ne koe te ikuga e tau o maua ne koe.

15A tino valea e mafaufau pela i a latou e tonu faeloa. A tino poto e fakalogo sale ki manatu fesoasoani.

16Kafai ko kaitaua te tino valea, e vave fakaasi ne ia tena kaitaua. A tino mafaufau e se saga ki tino kola e o'mai fakaitaita latou.

17Kafai e faipati ne koe te mea tonu e iku foki eiloa ki te faiga o te mea tonu, ka ko muna pelo e iku ki te faiga o te mea se tonu.

18A muna kola e sona fai fua e mafai o fakapakia ne ia te tino e pela mo te pelu, ka ko muna kola e fai mo te mafaufau e mafai o fakasao ne ia te tino.

19A te loi e toetoe tena ola, ka ko te muna tonu e ola ki te se gata mai.

20A tino kola e fai olotou fuafuaga masei e fakaseaogagina, ka ko tino kola e galue mo te lei, ka maua ne latou te fiafia.

21E seai ne mea masei e tupu ki tino amiotonu, ka ko tino amio masei e tupu faeloa ki ei a fakalavelave.

22A te Aliki e se fiafia ki tino loi, kae e fiafia ki tino kola e tausi ki olotou muna e fai.

23A tino poto e se fakamatamata i olotou mea e iloa, ka ko tino valea e olo sale fua o talai te lotou valea.

24A te galue malosi e fai ne ia koe ke malosi, ka ko te paie e fai ne ia koe ke liu pologa.

25A te mafaufau mafa ki se mea, e ave keatea ne ia te fiafia mai i a koe, ka ko te alofa e fakafiafia ne ia koe.

26A te tagata amiotonu e fai mo takitaki o tena taugasoa, ka ko te tagata amio masei e taki fua ne ia ona taugasoa keatea mai i te auala tonu.

27Kafai koe e paie, e se mafai o maua ne koe te mea tela e manako koe ki ei, kae kafai e galue malosi koe kae maua ne koe te manuia.

28A te amiotonu ko te auala ki te ola; te amio masei ko te auala ki te mate.