HOSEA 14 - Tuvalu Revised Bible

Ko te Fakamolemole a Hosea ki Tino Isalaelu

1Tino Isalaelu, foki nei ki te Aliki te otou Atua. Ko otou agasala ko ala ei koutou o siga kae paku.

2Foki nei ki te Aliki, kae ke fai te talo tenei mo taulaga a koutou ki a ia: “Fakamagalo mai omotou agasala kae talia mai te motou talo, kae ka tavae ne matou a koe e pela eiloa mo te motou tautoga.

3E se mafai na Asulia o fakasao matou, e se mafai foki ne solofanua tau o puipui matou. Ka se toe fai ake matou ki omotou tupua i a latou ko te motou Atua. Te Aliki, a koe e alofa ki tino kola ko seai ne fakamoemoega.”

Ko Folafola ne te Aliki se Ola Fou Mo Isalaelu

4Muna a te Aliki,

“Ka fakafoki mai ne au toku fenua ki a au.

Ka alofa au ki a latou mo toku loto katoa;

Ko gata toku kaitaua ki a latou.

5A au ki tino Isalaelu ka pela me se vaiua e to ki se fenua oge vai.

Ka olaola lei latou e pela me ne pula ko ma'tala;

Ka mautakitaki latou

E pela mo lakau o Lepanona.

6Ka ola aka latou i se olaga fou,

Kae gali e pela me ne lakau ko olive.

Ka ma'nogi e pela mo alasi o Lepanona.

7Ka toe ola latou i lalo o taku puipuiga.

Ka olaola lei latou e pela me se fatoaga

Kae 'fua malosi e pela me se togavine.

Ka takutakua latou e pela mo te uaina o Lepanona.

8Ka se toe ai se tapuakiga a tino Isalaelu e fai ki tupua;

Ka tali au ki olotou talo kae tausi latou;

Ka fakamalu ne au a latou e pela me se lakau e lausiusi faeloa;

Ko au ko te pogai o olotou fakamanuiaga katoa.”

Fakaotiga

9A latou kola e poto, ke malamalama i te mea tenei e tusi i konei, kae ke tauloto faka'lei foki ne latou. A auala o te Aliki e tonu. A tino amio'tonu e ola me e tau'tali i ei, ka ko tino agasala e siga kae pakū me e se saga ki ei.