2 SAMUELU 20 - Tuvalu Revised Bible

Seepa ko Teke ki a Tavita

1 1Tupu 12.16; 2NTupu 10.16 E isi se tagata i Kilikala e igoa ki a Seepa, te tama tagata a Pikeli, mai te matakaiga o Peniamina. Ne fakatagi ne ia te pu kae kalaga penei, “Ave keatea Tavita! A matou se fia tau'tali i a ia! Tagata Isalaelu, tatou ka foki ki 'tou fale!”

2Tena, ne tiaki ei ne tino Isalaelu a Tavita o tau'tali i a Seepa, ka ko tino o Iuta ne tautali eiloa mo te fakamaoni i a Tavita mai i te Iolitana ki Ielusalema.

3 2Samu 16.22 I te okoatuga o Tavita ki tena palesi i Ielusalema ne puke atu a ia ki ana avaga fakasalasala e tinogafulu kola ne nofo o tausi te palesi, ke leoleo ne sotia. E avatu ne ia ki a latou a mea e ma'nako latou ki ei, ka ko ia e se moe fakatau avaga mo latou. Ne tausi fakapagota latou i aso o olotou olaga, pela me ne fafine ko mate olotou avaga.

4Muna a te tupu ki a Amasa, “Fakamaopoopo aka a tagata Iuta, kae ke oko mai koutou ki konei i te aso mai tua o te aso taeao.”

5Ne fano Amasa o fakamaopoopo a tino Iuta, kae e seki oko mai i te taimi ne fakasino atu ne te tupu.

6Tena ne fai atu ei te tupu ki a Apisai penei, “Ka sili atu te fakalavelave ka aumai ne Seepa ki a tatou i lo te fakalavelave ne aumai ne Apisaloma. Puke taku kau, kae fano o sala, se iloa fua i te mea manafai ko nofo i se fa'kai e isi sena olo ko sao ei a ia mai i a tatou.”

7Tena ne olo atu ei Apisai mo te kau a Ioapo, mo sotia tiute i te palesi, mo nisi sotia aka mai Ielusalema o sala a Seepa.

8I te okoatuga o latou ki te kaupapa lasi i Kipeona, kae fetaui latou mo Amasa. A Ioapo ko toka fakalei eiloa mo se taua; a tena pelu e sulu i tena sifi, kae mau ki tena fusi. I tena fanatuga ki mua o fakatalofa atu ki a Amasa, kae tapale aka ne ia tena pelu.

9Muna a Ioapo ki a Amasa penei, “Toku taugasoa, e a koe?” Kae puke atu tena lima fakaatamai ki te talafa o Amasa o sogi atu ki a ia.

10A Amasa e se iloa ne ia a te mea ka fai ne Ioapo, tela e pukepuke mai te pelu i tena lima. Ne suki ne Ioapo te tinae o Amasa, ko gakau foki eiloa o ia ko to mai ki tua, to eiloa ki lalo i te laukele. Tena mate eiloa i kona, i te suki a Ioapo tela e tasi.

Tena, olo atu eiloa a Ioapo mo tena taina ko Apisai o sala a Seepa.

11E tokotasi te tagata mai te kau a Ioapo ne tu i tafa o te foitino o Amasa kae kalaga penei, “A tino kola e fia 'kau i a Ioapo mo Tavita ke o'mai o tau'tali i a Ioapo!”

12A te foitino o Amasa, tela e fonu i toto, e takato fua i te kogaloto o te auala. Ne lavea ne ofisa a Ioapo i tino ko tu o kilokilo ki te foitino, tena ne toso ei ne ia keatea mai te auala ki loto i fatoaga, kae fakapulou atu ki te pulagiketi.

13I te otiga ne ave keatea o te foitino o Amasa mai te auala, ko tagata katoa eiloa i kona ko tau'tali atu i a Ioapo o sala a Seepa.

14A Seepa ne ulu i loto i kogā fenua katoa o matakaiga katoa o Isalaelu, tena, oko mai ei a ia ki te fa'kai o Apelu Peta Maka, ka ko tino katoa i te kaukaiga o Pikeli ne maopoopo o tau'tali atu i a ia ki loto i te fa'kai.

15Ne logo Ioapo mo tena kau i a Seepa tena e nofo i kona, tena ne olo atu ei latou o nikoi te fa'kai. Ne tali mai ne latou a one o faka'tu ki luga i pui o te fa'kai, kae keli foki ne latou te feitu ki lalo ko te mea ke siga te 'pui.

16E isi se fafine poto i te fa'kai tena ne kalaga mai luga i te 'pui penei, “Faka'logo mai! Fakalogo mai! Fai ki a Ioapo ke vau ki konei; au e manako o faipati ki ei.”

17Ne fanatu Ioapo, kae fesili mai te fafine tena, “A koe na ko Ioapo?”

Ne tali atu a Ioapo, “Ao, au ko Ioapo.”

Muna a te fafine, “Tou malu, fakalogo mai ki a au.”

Ne tali atu Ioapo, “Au tenei e fakalogologo atu.”

18Muna a te fafine, “I aso mua e masani sale latou o faipati penei, ‘Olo ke maua mai se ikuga i te fa'kai o Apelu’ — tena, fai eiloa ne latou a te mea tena.

19A te motou fa'kai se fa'kai filemu kae fakamaoni i luga i Isalaelu. Ai a e taumafai ei koe o fakamasei te motou fa'kai? A koe e taumafai o fakamasei a mea a te Aliki?”

20Ne tali atu a Ioapo, “Se mafai! E se mafai ne au o fakamasei te otou fa'kai!

21Se tena te mea ne mafau'fau matou o fai. E isi se tagata e igoa ki a Seepa te tama a Pikeli mai Efalaima, ne taumafai o fia teke ki te Tupu ko Tavita. Tuku mai te tagata tena, ko olo ei matou keatea mai te otou fa'kai.”

Ne tali mai te fafine, “Ka pei atu ne matou tena ulu i luga o te 'pui ki a koutou.”

22Tena, ne fanatu te fafine tena ki tino o te fa'kai mo tena fuafuaga tena, kati ei ne latou te ulu o Seepa kae pei atu i luga o te pui o te fa'kai ki a Ioapo. Ne fakatagi ne Ioapo te pu, o fakailoa ki tena kau i a latou ka olo keatea mai te fa'kai tena, foki atu ei latou ki te lotou fa'kai. Ka ko Ioapo ne foki atu ki a Tavita i Ielusalema.

Ko Ofisa a Tavita

23A Ioapo ko te takitaki o te kautau a Isalaelu; a Penaia, te tama tagata a Ieoiata ko te takitaki o sotia tausi a Tavita;

24Atonilama, ko te takitaki o te kau ga'lue; a Iosefatu te tama tagata a Ailuta ko te tino e fakamau ne ia a tala o mea ne tupu;

25a Seva ko te failautusi i te fono; Satoka mo Apiata ko faitaulaga,

26ka ko Ila mai te fa'kai o Iaila se faitaulaga foki a Tavita.