FAILAUGA 4 - Tuvalu Revised Bible

1Tena, ne toe kilokilo au ki amioga masei katoa konei e fai i te lalolagi tenei. A tino puapuaga e tagi, kae e seai se tino e fesoasoani ki a latou. E seai se tino e fia fesoasoani ki a latou, me i tino kola e fakapuapuaga ne latou a tino kona ne tino ma'luga ka e malosi.

2E fakaamutia au ki tino kola ko oti ne mate kae ko galo atu; me ko 'lei atu latou i tino konei koi ola nei.

3Kae e silia atu te lei o tino kola e seki fanau mai lele eiloa ki te lalolagi, kola e seki lavea eiloa ne latou a uiga ma'sei konei e fai i te lalolagi.

4Ko oti foki ne iloa ne au me ai a e ga'lue malosi ei a tino ko latou ke manuia: me e ita i a latou ma takavale i olotou tuakoi. E seai eiloa se aoga. E pela eiloa me se tino e fano o afuli te matagi.

5Olotou muna i te tino tela e pilima ana lima kae sagasaga fua ke mate a ia i te fia'kai, se tino valea.

6Kaati e tonu, kae e sili atu te 'lei manafai e maua ne mu mea a koe kae e 'toka tou mafaufau, i lo te galue malosi o koe ki ou lima e lua, o taumafai o afuli te matagi.

7E isi foki se mea ne lavea ne au i te olaga nei tela e seai se aoga.

8Onoono ki te tagata tenei e nofo tokotasi. E seai sena tama tagata, seai sena taina kae e galue malosi faeloa a ia, e se mafai o malie i te koloa e maua ne ia. E galue fi'ta a ia, kae e se fakafiafia a ia ki fua o ana galuega, kae ko oi la te tino ka manuia i ana galuega? E seai eiloa se aoga o te faiga tena, kae se olaga e fakafi'ta.

9A te tokolua e 'lei atu i te tokotasi, me e lasi atu te aoga o galuega e fai ne te tokolua.

10Kafai e siga te sua tino, kae ka fesoasoani ki ei a te sua tino. Ka ko te tino e fai tokotasi ana galuega, kafai e siga ki lalo, e seai se tino e fesoasoani ki ei.

11Kafai e moko te aso, e mafai ne te tokolua o moe fakatasi ko mafanafana ei laua, kae mafai pefea ne te tino tokotasi o fai a ia ke mafanafana?

12E mafai ne te tokolua o teke atu a tino kola e se mafai ne te tino tokotasi o teke. A te lopu tela e fili ki uka e tolu e faigata o'motu.

13-14E mafai te tino o fanake mai te olaga mativa o fai mo tupu i tena fenua, io me vau mai te falepuipui o nofo i te nofogaaliki, kae kafai ko toeaina a ia kae se fia fakalogo ki ana tino fakatonutonu, ko tena uiga ka sili atu te lei o te tamataene tela e mativa kae isi te poto i ei.

15Au ne mafaufau ki tino katoa konei e nofo i te lalolagi tenei, kae iloa aka ne au me isi eiloa se tamataene i se kogā koga ka sui ne ia a te tupu.

16E mafai o seai se gatamaiga o te aofaki o tino i lalo o te pulega a se tupu; kafai ko galo atu a ia, e seai eiloa se tino e fiafia i mea ko oti ne fai ne ia. Tela la, e seai se aoga. E pela me se tino e fano o afuli te matagi.