SALAMO 56 - Tuvalu Revised Bible

Te Talo o te Talitonu ki te Atua

1Te Atua, a koe ke alofa mai ki a au, me i a au ko ta ne oku fili;

E fakasaua mai ki a au i aso katoa.

2I aso katoa e ta faeloa au ne tino kola e ita mai ki a au.

Ko oko eiloa te tokouke latou kola e fai taua mai ki a au.

3Te Aliki Sili i te Malosi, kafai au e mataku,

Au e fakatuanaki ki a koe.

4Au e fakatuanaki ki te Atua, tena te mea ko se mataku ei au;

Au e 'viki ki a ia ona ko ana folafolaga.

Se a te mea e mafai ne se tino o fai mai ki a au?

5A mea katoa e fai ne au e fakalavelave mai faeloa oku fili ki a au.

E mafaufau faeloa latou o fakapakia a au!

6E luku atu latou ki olotou koga muni,

O alamati ki aku mea e fai,

Mo te fakamoemoe ke tamate au.

7Te Atua, fakasala ake a latou i olotou amioga masei,

Fakatakavale a tino konei i tou kaitaua!

8Ko iloa katoa ne koe a fakalavelave ne oko ki a au;

Ko oti foki ne tusi ne koe se tala e uiga ki oku loimata.

Kona eiloa e tusi i loto i tau tusi.

9I te aso e kalaga atu ei au ki a koe,

E toe 'foki katoa ki tua oku fili.

E iloa ne au i te Atua e kau maua

10Ko te Aliki, tela e tavae ne au ana folafolaga.

11Au e fakatuanaki ki a ia, tena te mea ka se mataku ei au.

Se a te mea e mafai ne se tino o fai mai ki a au?

12Te Atua, e avatu ne au ki a koe a mea ne folafola atu ne au;

E avatu ne au a taulaga fakafetai ki a koe,

13i te mea ne fakasao ne koe au mai te mate,

Kae fai foki ne koe au ke manumalo.

Tena te mea ko sasale ei au i mua o te Atua i te mainaga tela e maina atu i luga o tino ola.