ESEKIELU 16 - Tuvalu Revised Bible

Ielusalema se Fakamaoni

1A te Aliki ne toe faipati mai ki a au,

2ana muna, “Te tagata ola, fakasino atu ki tino Ielusalema a mea masei kola ne fai ne latou.

3Fai atu ki Ielusalema a muna konei a te Aliki.

“A koe ne fanau i te fenua o Kanana. A tou tamana se tino Amoli, ka ko tou matua se fafine Heti.

4I te taimi ne fanau ei koe, e seai se tino ne kati ne ia tou pito, io me ne mulu ne ia koe, io me ne mili ne ia tou foitino ki masima, io me ne fakapulupulu ne ia koe ki laugatu.

5E seai se tino ne alofa ki a koe o fai a mea kona ki a koe. I te taimi ne fanau ei koe, e seai eiloa se tino ne alofa atu ki a koe. A koe ne ave fua o pei ki tua o te fa'kai.

6“Tena la, ne fakasili aka au i ou tafa, lavea ei ne au a koe e fakapikipiki mai i luga i ou toto. A koe e fonu i toto, kae ne seki tiaki ne au a koe ke mate.

7Ne fai ne au a koe ke tupu ake e pela me se lakau ola lei. Ne tupu ake koe mo te malosi, kae maluga, se matuā tamafine eiloa. A ou mataū ko oko eiloa i te 'tupu lei, mo tou laulu ko loa, ka ko koe e nofo fuafua.

8“Ne toe fakasili aka au i ou tafa, kae lavea atu ne au me ko oko mai te taimi ko tau ei koe o fiafai ki se tino. Ne ufi ne au tou foitino ki toku gatu loa, kae tauto au i a au ka alofa ki a koe. Ao, ne fai taku feagaiga fakatau avaga mo koe, tena ne fai ei koe mo oku.” Ko muna kona a te Aliki Sili.

9“Tena ne puke mai ne au te vai o fulu keatea te toto mai i a koe. Ne mili ne au tou foitino ki te sinu olive.

10Ne fakapei ne au koe ki gatu ne sui fakagaligali, kae tuku atu a taka ne faite mai i pakili manu tafasili i te gali, mo te mea sai ulu lino, mo te gatu silika.

11Ne safe atu ne au a teuga taua ki a koe — ko taulima mo malele.

12Ne avatu foki ne au se ligi isu mo ligi taliga, mo te kalauna gali ke tuku ki tou ulu.

13Ne avatu foki ou teuga aulo mo siliva, ka ko koe e pei faeloa ki gatu e fakagaligali ki lino mo silika. E kai koe i te falaoa ne faite mai i te falaoa tafasili i te gali, e kai foki koe i hani mo sinu olive. A tou gali ko oko eiloa, kae ne fai koe mo tupu fafine.

14Ne takutakua koe i malo katoa ona ko tou gali, me ko au ne fai ne au a koe ke gali pena.” Ko muna kona a te Aliki Sili.

15“Kae ne fakaaoga ne koe tou gali mo tou takutakua o moe mo so se tino tela e fetaui mo koe.

16E fakaaoga ne koe a nisi gatu o koe o teu ki ei au koga tapuaki, kae ne talia eiloa ne koe so se tino, pela eiloa koe me se fafine tali tagata.

17Ne puke ne koe a teuga siliva mo aulo kola ne avatu ne au ki a koe, kae fakaaoga ne koe o faite ki ei a fakatusa tagata, kae tapuaki atu koe ki ei.

18Ne puke ne koe a gatu kola ne sui fakagaligali, kola ne avatu ne au, kae fakapei ne koe ki fakatusa kona, kae ne ofo atu foki ne koe ki fakatusa kona a te sinu olive mo mea manogi kola ne avatu ne au ki a koe.

19Ne avatu ne au a meakai — ko te falaoa tafasili i te lei, sinu olive, mo hani — kae ne ofo atu ne koe mo fai tau taulaga ki tupua ko te mea ke fiafia atu ki a koe.” Ko muna kona a te Aliki Sili.

20“Tena, kae ne toe puke aka ne koe au tama tagata mo tama fafine ne fai i a au, ofo atu foki ne koe ke fai mo taulaga ki tupua. E a, e se malie koe i te masei o te se fakamaoni mai ki a au,

21kae manako foki eiloa koe ke ave aku tamaliki ke fai mo taulaga ki tupua?

22I te taimi ne fai ei au amioga masei i tou olaga tali tagata, e seki manatua eiloa ne koe tau folikiga — i te taimi ne nofo fuafua ei koe, kae fakapikipiki i luga i ou toto.”

Ko Ielusalema Pela me se Fafine Tali Tagata

23Muna a te Aliki Sili, “A koe ko malaia! Ko malaia! Ne fai ne koe a amioga masei katoa kona, oti aka,

24faite ei ne koe a koga e tapuaki atu ei koe ki tupua, i tafa o auala katoa, kae fai ne koe amioga masei.

25Ko toso ne koe tou gali i loto i te pela. E tuku atu tou foitino ki so se tino e vau ki a koe, kae gasolosolo ake eiloa o malosi tou tali tagata i aso takitasi.

26E talia ne koe tou tuakoi kai manako ko Aikupito ke moe koulua, kae fai ne koe au ke kaitaua i tou olaga tali tagata.

27“Nei, ko oti ne sau aka toku lima o fakasala koe, kae ave keatea tou vaega i aku fakamanuiaga. Ko oti ne tuku atu ne au a koe ki te kau Filisitia, kola e takalialia i a koe kae se fiafia ki au faiga masei.

28“Ona ko koe e seki fakamalie ne fiafaiga muamua a koe, tena ne tele ei koe i tua o te kau Asulia. A koe ko te fafine tali tagata a latou, kae e seki mafai foki ne latou o fakamalie ou manakoga.

29A koe foki se fafine tali tagata ki tino Papelonia, te fenua fai pisinisi, kae e seki mafai foki ne latou o fakamalie ou manakoga.”

30Konei a muna a te Aliki Sili: “Ne fai ne koe a amioga kona, pela eiloa me se fafine tali tagata tela e se ma i se mea.

31I auala katoa, e faite ne koe a koga tapuaki ki tupua, kae fai ou uiga tali tagata. Ka ko koe e se fano o sala tupe pela mo fafine tali tagata e tokouke.

32A koe e pela me se fafine tela e moe mo tagata fakaatea kae e se alofa ki tena avaga.

33A te fafine tali tagata e isi se togi e maua ne ia, ka ko koe e fano fua o ave meaalofa ki au fiafaiga, kae togi ne koe ke o'mai mai i koga katoa ke moe mo koe.

34A koe se fafine tali tagata e kese eiloa mai i nisi fafine tali tagata. E seai se tino ne fai malo ne ia koe ke fai mo fafine tali tagata. E seai sou togi e maua; ko koe e fano o togi a tino ke moe mo koe! Ao, a koe e kese eiloa.”

Ko te Fakamasinoga a te Atua ki Ielusalema

35Tela la, Ielusalema, a koe se fafine tali tagata! Fakalogo mai ki muna a te Aliki.

36Konei a muna a te Aliki Sili: “E tapale ou gatu kae tuku atu tou foitino pela me se fafine tali tagata ki au fiafaiga, pela foki ki au tupua mataga, kae e tamate foki ne koe au tamaliki ke fai mo taulaga ki tupua kona.

37Ona ko te mea tena, ka fakamaopoopo mai ne au au fiafaiga katoa i aso mua — ko latou e fiafia koe ki ei mo latou kola e se fiafia koe ki ei. Ka aumai ne au latou ke tu fakatamilo i a koe, ko tapale ei ne au ou gatu ke kilo ki a koe e nofo fuafua.

38Ka fakamalaia ne au a koe ona ko te mulilua mo te tatino, kae i toku kaitaua, ka fakasala ne au a koe ki te mate.

39Ka tuku atu ne au a koe ki te lotou malosi, kae ka ofa ki lalo ne latou a koga ne fai ei au amioga tali tagata, mo koga ne tapuaki atu ei koe ki tupua. Ka ave keatea ne latou ou gatu mo ou teuga taua, kae tiakina koe ke nofo fuafua.

40“Ka fakaoso ne latou se muimuiga tino ke peipei koe ki fatu, kae kati likiliki ne latou a koe ki olotou pelu.

41Ka sunu ne latou ou fale, kae fai ki fafine ke o'mai o onoono i te fakasalaga o koe. Ka fakagata ne au tou tali tagata, kae fai foki ke fakagata te ave sale ne koe o meaalofa ki au fiafaiga.

42Tena, kae ka noga toku kaitaua, ko filemu ei au. Ka se toe ita eiloa au io me toe masalosalo.

43Ko puli eiloa i a koe aku faiga ki a koe, i aso koi foliki ei koe, kae ne fai eiloa ne koe au ke kaitaua i mea katoa ne fai ne koe. Tena te mea ne taui atu ei ne au ki a koe e tusa eiloa mo au mea kona ne fai. Ai a ne fakaopoopo ei ne koe te mulilua ki mea se tau kola ne fai ne koe?” Ko te Aliki Sili tena ne faipati atu.

A te Tamaliki Fafine e Soko foki eiloa ki te Matua

44Muna a te Aliki, “Ielusalema, a tino ka fakaaoga ne latou a te fataoto tenei e uiga ki a koe: ‘E pela mo te matua, e pena foki tena tama fafine.’

45A koe ko te tama fafine a tou matua tela ne tiakina ne ia a tena avaga mo ana tamaliki, a koe ko te taina a ou taina, kola ne tiakina ne latou a olotou avaga mo tamaliki. A tou matua se fafine Heti kae ko tou tamana se tagata Amoli.

46“A tou taina matua ko Samalia tela e tu i matu, mo ona fa'kai foliki ei. A tou taina foliki tela e nofo ki te feitu ki saute o Sotoma mo ana tamaliki fafine.

47E a, ne fiafia eiloa koe o tautali i olotou auala kae fakaakoako ki olotou amioga masei? Ikai, e seki leva atu nei, a koe ne silia atu te masei o mea ne fai ne koe i lo latou.

48Muna a te Aliki Sili, “E pela eiloa mo te iloa tonu i a au ko te Atua ola, e fai atu ei au penei, i tou taina ko Sotoma mo ona fa'kai e seki fai eiloa ne latou a amioga masei kola ne fai ne koe mo ou fa'kai.

49A Sotoma mo ana tama fafine ne fakamatamata me e uke olotou meakai kae ola i se olaga filemu kae tokagamalie, kae e seki alofa ki tino mativa mo tino seai ne mea a latou.

50E fakamatamata kae loto makeke, kae ne fai ne latou a mea kola e se fiafia au ki ei, tena ne ta fakapalele ei ne au latou, e pela eiloa mo te mea e iloa lei ne koutou.

51“A te agasala a Samalia e se oko foki ki te afā o te agasala ne fai ne koutou. A uiga o koe ko oko eiloa i te mataga i lo ana mea ne fai. A tou masei ko oko eiloa, tela la, a ou taina pela me ko mata se agasala manafai e fakatusa ki au mea ne fai.

52Tela la, i te taimi nei, ko tau eiloa o kufaki ne koe tou masiasi. A au agasala ko oko eiloa i te silia mao mo agasala a ou taina, tela la, a ou taina ko pela eiloa me ne tino se agasala manafai e fakatusa mo au mea ne fai. Tela la, amo tou masiasi, me ne fai ne koe ou taina ke mata se agasala i te uke o au agasala.”

Sotoma mo Samalia ka Toe Atiake

53Muna a te Aliki ki a Ielusalema, “Ka toe fai ne au a Sotoma mo Samalia mo o la fa'kai ke toe maumea. Ao, a koe e fai foki ne au ke toe maumea.

54Ka masiasi koe ona ko ou uiga, a tou mataga ka fai ne ia ou taina ke lavea ne latou i a latou e lei faeloa.

55Ka toe maumea latou, a koe mo ou fa'kai ka toe atiake foki.

56E a, e seki fai fa'kata koe e uiga ki a Sotoma i aso koi fakamatamata ei koe,

57kae koi tuai foki ei o sae aka au amioga masei? Nei, a koe ko pela eiloa mo Sotoma, se mea fa'katakata ki te kau Etoma, te kau Filisitia, mo ou tuakoi kola e takalialia i a koe.

58E tau eiloa o puapuaga koe ona ko amioga masei kae se lei kola ne fai ne koe.” Ko te Aliki tena ne faipati atu.

Ko te Feagaiga ki te Se Gata Mai

59Muna a te Aliki Sili, “Ka fai ne au ki a koe a te mea tela e fetaui tonu mo au mea ne fai, me ne seki saga koe ki au tautoga kae ne ofa foki ne koe te feagaiga.

60Kae ka fakaaloalo au ki te feagaiga a taua i te taimi koi foliki ei koe, tela la, ka fai ne au se feagaiga mo koe tela e tumau ki te se gata mai.

61Ka manatua ne koe au amioga ne fai, kae ka masiasi koe i au mea kona ne fai, manafai ko toe foki mai tou taina matua mo tou taina foliki. Ka fai ne au laua ke pela me ne tama fafine a koe, e ui eiloa a te mea tena e se se vaega o te feagaiga a aku mo koe.

62Ka fakafou ne au taku feagaiga mo koe, kae ka iloa ne koe i a au ko te Aliki.

63Ka fakamagalo ne au a mea se katoa a koe ne fai, ka ko koe ka manatua faeloa ne koe au agasala kona ne fai, tela la, ka se mafai eiloa o fakamaga tou gutu i a koe e ma.” Ko te Aliki Sili tena ne faipati atu.