2 KOLINITO 12 - Tuvalu Revised Bible

Ko Moemiti mo Fakaasiga ki a Paulo

1E 'tau mo au o fakamatamata; kae tonu me seai se mea e maua mai i ei, kae ka faipati nei au ki mea ne matea ne au i fakaasiga mai i te Aliki.

2E iloa ne au me isi se kelisiano ne ola ake i a Keliso, ko tusa mo te sefulu fa tausaga ko teka, ne avake ki te lagi tuatolu. E se iloa ne au me ne tupu eiloa te mea tenei io me se fakaasiga fua, ka ko te Atua fua e iloa ne ia.

3Ke toe fai atu foki ne au: e iloa ne au me i te tagata nei ne avake foki ki Palataiso, me ne tupu te mea tenei io me se fakaasiga fua, ko te Atua e iloa ne ia,

4kae ne lagona ne ia i kona a mea kola e se mafai o fakamuna ki 'gana a tino.

5Tela la, ka fakamatamata au ona ko te tagata tenei, kae se fakamatamata au e uiga ki a au eiloa, vagana fua ki mea kola e fakaasi mai ei me pefea a toku vaivai.

6Kafai e manako au o fakamatamata, e se 'tau mo au o fai mo vale, me ko te mea tonu eiloa e faipati au ki ei. Kae nei ko se saga au ki ei, ko te mea ke se toe manatu mai se tino ki a au, manafai e kilo mai ki a au, io me fakalogologo ki a au e lauga.

7Ko te mea ke mo a e to fakamalugagina au i te uke o fakaasiga ko tuku mai ki a au; a te logo'mae o te foitino, ko te avefekau a Satani tena ko vau o kini au, kae taofi ne ia au ke mo a ma fakamatamata.

8Ne fakamolemole fakatolu atu au ki te Aliki e uiga ki te mea nei, kae fakatagi atu ki a ia ke ave ne ia keatea mai i a au.

9Kae ne tali mai ki a au penei, “A toku alofa tauanoa ko lava 'lei eiloa mo koe, me i toku mana e sili atu i tou vaivai.” Tela la, ka lasi toku fiafia o fakamatamata i oku feitu vaivai, ko te mea ke i luga i a au te mana o Keliso.

10Ona ko Keliso au ko loto malie o fakafeagai mo uiga vaivai o te foitino, muna masei, puapuaga, fakasauaga mo mala; me kafai ko vaivai au i te feitu faka te foitino ona ko mea konei, kae malosi eiloa au i te feitu faka te Agaga i te fesoasoani mai o te Aliki.

Ko te Loto Finafinau o Paulo mō Tino Kolinito

11Ko oti ne fai au mo vale! Ne fakamalosi au ne koutou ke fai mo vale, me ne 'tau koutou o tavae mai au. E tonu me seai soku aoga. E tonu i a au e fatauva, kae seai se mea e malalo ei au i apositolo 'loi kola e fakasilisili ne koutou.

12A fakailoga o te apositolo tonu ne fakaasi 'lei atu eiloa ki a koutou i te loto kufaki, i fakailoga, i mea fakaofoofogina mo galuega 'mana.

13Kae se a te mea e taofi ei koutou me ne fakapuli ne au koutou i aku faiga? A te auala ne fakakese ei ne au koutou mai nisi Ekalesia ko te feitu tenei: i a au e seki fakatagi atu ke 'togi mai ne koutou toku folafola atu a te Tala 'Lei. Kafai la tena, fakamolemole, fakamagalo mai au mo te feitu tenei!

14Tenei te fakatolu o toka au o fanatu ki a koutou, ke se fai au mo amoga ki a koutou, me i a au e se 'sala ki otou mea, ka ko koutou; me i fanau e se 'tau o fakaputuputu koloa mō matua, ka ko matua mō fanau.

15Ka sili toku fiafia o fakamaumau aku mea fakatasi mo toku ola mō otou agaga. Kae e lavea atu nei ne au me ko te lasi o toku alofa mo koutou, ko te foliki tena o te a'lofa o koutou ki a au.

16Tela la, e talitonu koutou i a au e se fai mo amoga 'mafa ki a koutou. Kae ka fai mai se tino i a au e faitogafiti, kae malei foki koutou ne au i oku loi.

17E a, ne fakakolekole ne au koutou ke maua ne aku mea, e alatu i avefekau ne uga atu ne au ki a koutou?

18Ne fakamalosi ne au a Tito ke fanatu, uga atu ei foki ne au te sua taina kelisiano ke olo atu laua. E a, e fakakolekole koutou ne Tito ke maua ne mea mai i a koutou? E tasi te fakavae mo te faifaiga o te ma galuega.

19Kati e mafaufau faeloa koutou i taimi katoa, i a matou e taumafai o fia 'lei i otou mua. Ikai, e se pena. Ko mua o te Atua ne faipati atu ei matou i a Keliso. Taina fagasele, ne fai a mea katoa konei mo te otou 'lei.

20Au e tai manavase manafai e fanatu ei au ki a koutou, kae maua ake ei ne au i a koutou e se 'nofo i te tulaga e fiafia au ki ei, kae maua ake foki ne koutou au me se nofo i te tulaga e fia'fia koutou ki ei. E se taumate ka iai te kinauga, te kaisanosano, te kaitaua, te manatu fakapito, te fai tala loi, te gutu faipati, te fakamatamata mo te se nofonofo 'lei.

21Au e tai manavase me kafai e toe fanatu au, ka fakamalalogina au ne toku Atua i mua o koutou, ka fanoanoa ei au mo latou kola i loto i te otou Ekalesia kola ne agasala i aso ko teka, kae seki sala'mo eiloa ki olotou amioga se 'ma, amioga fina lalolagi mo te fai o manakoga masei faka te foitino.