ESETA 2 - Tuvalu Revised Bible

Eseta ko Avaga mo te Tupu

1I se taimi fakamuli ifo, a te tupu ko se kaitaua, kae koi mafaufau faeloa ki te mea ne fai ne Vasati mo te folafolaga e uiga ki a Vasati.

2Ne fai atu a nisi tagata fakatonutonu a te tupu ki a ia penei, “Ai a e se taumafai ei koe ke sala mai se tamafine taulekaleka tela se taupou.

3E mafai faeloa ne koe o fili ne ofisa i itumalo takitasi i loto i tou malo kae fakatonu ki ei ke aumai a tamafine gali mai olotou itumalo ki te fale o tamafine i tou palesi, i te fa'kai o Susa, te laumua o te fa'kai. Tuku atu latou ke tausi ne te eunuka ko Hegai, te pule o au fafine, kae ke teu fakagaligali foki latou.

4Tena, ko fili ei ne koe se fafine e manako malosi koe ki ei, ko avaga ei koe ki ei ke sui ne ia a Vasati.”

Ne mafaufau aka te tupu me ko oko eiloa i te 'lei o te manatu tena, tena ne fai eiloa ne ia.

5I te vaitaimi tena, e isi se tagata Iutaia e igoa ki a Moletekai, te tama tagata a Iaila e nofo i Susa. A Moletekai se tagata mai te matakaiga o Peniamina kae se tino i te gafa o Kiso mo Simei.

62Tupu 24.10-16; 2NTupu 36.10 I te taimi ne ave fakapagota ei a te Tupu o Iuta ko Ieoiakini ne Nepukanesa te Tupu o Papelonia, fakatasi mo nisi pagota, a Moletekai ne to i pagota kona.

7E isi sena fakatau tuagaene e igoa ki a Eseta, a tena igoa i te gana Epelu ko Hatesa; a Eseta se tamafine taulekaleka kae foitino gali. I te taimi ne 'mate ei a matua o Eseta, ne puke a ia ne Moletekai kae ne tausi ne ia e pela eiloa me se tamaliki a ia.

8I te taimi ne fai ei te folafolaga tena a te tupu, e tokouke a tamafine ne aumai ki te fa'kai o Susa, a Eseta ne to mai i tamafine kona. Ne ave foki a ia ki te palesi i lalo o te tausiga a Hegai, te pule o te fale o fafine.

9A Hegai ne fiafia ki a Eseta, tena ne kamata ei o teu fakagaligali ne ia a Eseta, o milimili sale tena foitino kae fagai faka'lei. Ne tuku ne ia a Eseta ke nofo i te koga tafasili i te 'lei i te fale o fafine kae fili ne ia e tokofitu tamafine mai te palesi ke tavini ki a ia.

10Mai i te fakatonuga a Moletekai, ne seki fakaasi eiloa ne Eseta i a ia se Iutaia.

11I aso katoa, a Moletekai e fano faeloa o sasale sale i mua o te fale o fafine, ko te mea ke iloa ne ia me ko Eseta e 'lei me ikai, io me se a foki te mea ka tupu ki a ia.

12A te fakatokaga o tamafine kona e tusa mo te tausaga e tasi. E ono masina e milimili ki te sinu o te mulo kae ono foki masina e milimili ki te sinu o te pasama. Ka oti, ko fakasolo takitokotasi ei o ave ki mua o te Tupu ko Asuelu.

13E pule eiloa te tamafine i te gatu e pei ei a ia i te taimi e ave ei a ia mai i te fale o fafine ki te palesi.

14Ko te afiafi e ave ei se fafine e toko tasi ki te tupu, kae i te taeao ko ave a ia ki sua fale o fafine i lalo o te tausiga a te eunuka ko Sasakasa, te pule o avaga fakasalasala a te tupu. Ka se toe foki te tamafine tena ki te tupu vagana ke fiafia ki ei te tupu o kalaga atu ki tena igoa, ke fanatu ki a ia.

15Ko oko mai nei te taimi ka fano ei a Eseta ki mua o te tupu. A Eseta ko te tama fafine a Apihaila, kae e fakatau tuagane mo Moletekai tela ne puke ne ia a ia ke fai mo tama fafine a ia. So se tino e kilo ki a Eseta e fiafia ki ei. I te okomaiga ki te taimi o Eseta o fano ki te tupu, ne pei eiloa a ia i te gatu ne fakatonu mai ne te eunuka ko Hegai, te pule o te fale o fafine, ke pei a ia ki ei.

16Tena la, ko te fitu o tausaga o te nofoaiga a Asuelu te tupu, i te sefulu o masina, te masina o Tepete, ne avatu ei a Eseta ki te Tupu ko Asuelu i te palesi.

17Ne silia atu te fiafai o te tupu ki a Eseta i lo tamafine katoa, tena ne tuku atu ei ne ia te kalauna ki tena ulu, kae fakasopo ne ia ke fai mo tupu fafine e sui ne ia a Vasati.

18Ne fai ne te tupu te 'kaiga lasi e fakaaloalo ei a Eseta, kae ne kami mai ne ia ana ofisa katoa mo tino ma'luga. Ne folafola atu ne ia te aso malolo mo tino katoa i tena malo, kae tufatufa atu ne ia a meaalofa tafasili i te gali.

Ko Fakasao ne Moletekai a te Ola o te Tupu

19I te vaitaimi tenei, a Moletekai ko oti ne fakasopo ne te tupu ki se tulaga maluga.

20A Eseta e seki fakaasi eiloa ne ia i a ia se Iutaia. A Moletekai ne fai ki ei ke sa fakaasi eiloa ki se tino, tena ne fakalogo eiloa a Eseta e pela eiloa mo taimi ne fakalogo sale ei a ia i tena tausiga ne Moletekai.

21I te taimi ko nofo ei Moletekai i te tulaga ofisa i te palesi, a te tokolua eunuka ko Pikitana mo Telesa, kola e tiute ne laua a te mataloa ki te potu o te tupu, ko se fia'fia ki te Tupu ko Asuelu, tena ne fai ei te la togafiti ke tamate ne laua.

22Ne logo Moletekai i te togafiti masei a laua kona, fakaasi ei ne ia ki a Eseta, kae ne fakaasi atu ne Eseta ki te tupu a te tala tena a Moletekai.

23Ne sukesuke te mea tena, maua atu ei me se tala tonu, tena ave ei te tokolua kona o sisi i te koga sisi tino. Ne fai te fakatonuga a te tupu ke fakamau a te tala o te mea tena ne tupu i Tusitala o te malo.