LEVITIKO 22 - Tuvalu Revised Bible

Ko te 'Malu o Taulaga

1Ne fakatonu mai te Aliki ki a Mose

2ke fai atu ki a Alona mo ana tama tagata penei, “E se tau mo koutou o fakamasei toku igoa tapu, tela la, e tau mo koutou o fai mo te ava a taulaga 'malu kola e tuku mai ne tino Isalaelu ki a au. Au ko te Aliki.

3Kafai se tino o tou gafa e fakapilipili mai ki taulaga tapu kola ko oti ne tuku mai ne tino Isalaelu ki a au, i te taimi e lailai ei a ia, ka se toe tavini mai a ia ki a au i te fata-fai-taulaga. A te mea tena e tumau ki taimi katoa fakamuli. Au ko te Aliki.

4“E tapu se tino i te gafa o Alona tela e maua ne te lepela io me e fano tena sua, e kai ki taulaga tapu vagana ke oti a ia ne faka'ma. So se faitaulaga e patele ki se mea ne patele ki se foitino mate ka lailai. E lailai foki a ia tela ne fano tena sua mai tena foitino,

5pena foki manafai ne patele a ia ki se manu mate io me se tino mate.

6So se faitaulaga ko lailai, e tumau eiloa tena lailai ke oko ki te afiafi, kae ke mo a foki a ia e kai ki taulaga tapu vagana ke oti a ia ne koukou.

7Kafai ko oti ne to te la, ko 'ma ei a ia, tena ko mafai ei ne ia o kai a taulaga tapu, kola ko ana meakai.

8Ke mo a e kai ne ia ne kano o se manu tela ne mate eiloa i a ia, io me se manu ne ta ne manu fe'kai, i a ia ma lailai. Au ko te Aliki.

9“E tau mo faitaulaga katoa o tausi ki fakatonuga katoa kona ko oti ne tuku atu ne au. Kafai se faka'logo latou ko latou ko agasala kae ka mate latou, me ne seki faka'logo ki fakatonuga tapu kona. Ko au ko te Aliki tela e fai ne au latou ke 'malu.

10“Ko te tino fua i te kaiga o faitaulaga e mafai o kai ki taulaga tapu, e seai aka foki, ke oko foki eiloa ki so se tino fakaatea e nofo i te faitaulaga, io me se tino e galue i a ia.

11Ko te tavini fua a te faitaulaga, tela ne togi eiloa ki ana tupe, io me ko te tavini tela ne fanau i loto i tena fale e mafai o kai ki meakai e maua ne te faitaulaga.

12A te tamaliki fafine a te faitaulaga tela e avaga ki se tino e se se faitaulaga e se kai eiloa ki taulaga tapu.

13Kae kafai se tama fafine a te faitaulaga tela ko mate tena avaga io me ko mavae mo tena avaga kae seai ne ana tamaliki kae ko foki mai o nofo i tena tamana ke tausi atu a ia, e talia a ia o kai ki meakai e maua ne tena tamana i tena tofi faitaulaga. Ko tino fua i te kaiga o faitaulaga e mafai o kai ki taulaga tapu kona.

14“Kafai se tino e se tau tena gafa ki faitaulaga kae ne kai ki taulaga tapu kae se ko tena loto ke fai ne ia se mea pena, e tau o toe togi ne ia ki te faitaulaga te katoaga o te togi o te mea tena, fakaopoopo atu ki ei mo te luasefulu pasene.

15E se tau mo faitaulaga o fakalailai a taulaga tapu konei

16o talia ne latou so se tino e seki ai se taliaga ke kai ki ei. A te tino tena e fai ne ia te mea tena ka maua ne ia se fakasalaga. Ko au ko te Aliki, e fai ne au a taulaga ke 'malu.”

17Ne fakatonu atu te Aliki ki a Mose

18ke tuku atu a fakatonuga konei ki a Alona mo ana tama tagata pela foki ki tino Isalaelu katoa. So se tino Isalaelu io me se tino fakaalofa e nofo tasi mo tino Isalaelu e tuku atu sena taulaga sunu; me se taulaga e fakataunu ei tena feagaiga io me se taulaga i tena loto malie, a te manu o te taulaga e tau o seai sena pona.

19A te taulaga e talia fua manafai te manu se manu tagata kae seai sena pona.

20Teu 17.1 Kafai e ofo atu ne koe se manu e isi sena pona, ka se talia ne te Aliki.

21Kafai se tino e ofo atu ne ia se taulaga fakafetai ki te Aliki, me se taulaga e fakataunu ei tena feagaiga io me se taulaga i tena loto malie, e tau o tuku ne ia se manu tagata kae seai sena pona, kae ka talia ne te Aliki.

22Sa ofo atu ki te Aliki se manu kivi io me se manu pili io me se manu e pakia se vaega o tena foitino, io me se manu e pala te foitino. Sa ofo se vaega manu pena i luga i te fata-fai-taulaga ke fai mo taulaga meakai.

23E mafai ne se tino o ofo atu se manu tela e se katoatoa tena foitino mo fai te taulaga loto malie. Kae e se talia manafai e fai mo taulaga e fakataunu ei se feagaiga.

24Sa ofo atu ki te Aliki se manu ne pa'kia ona masaki. E tapu e fai ne koutou se mea pena i te otou fenua.

25E tapu e ofo mai ne se tino se manu ne maua ne ia mai se tino fakaalofa ke fai mo taulaga meakai. A manu pena e se katoatoa, tela la, e se taulia.

26-27Kafai ko fanau mai se tamā pulumakau, io me se tamā mamoe io me se tamā kouti, e se tau o ave keatea mai i tena matua i aso e fitu, kae mai tua ifo ko mafai o fai mo taulaga meakai.

28E tapu e ofo ne koutou se pulumakau mo tena tama, io me se mamoe mo tena tama io me se kouti mo tena tama i te aso eiloa e tasi.

29Kafai e ofo ne koe se taulaga fakafetai ki te Aliki, masaua o tautali i fakatonuga kola ne tuku atu ko te mea ke talia koe ne te Aliki;

30masaua o kai katoa te taulaga i te aso tena kae sa faka'toe ne mea ki te sua aso.

31Muna a te Aliki, “Tausi ki aku fakatonuga; au ko te Aliki.

32Sa fakamasiasi ne koutou toku igoa tapu; a tino katoa o Isalaelu e tau o iloa ne latou i a au e 'malu. Ko au ko te Aliki, kae e fai ne au koutou ke 'malu.

33Ne aumai ne au koutou keatea mai Aikupito ke fai au mo Atua o koutou, Au ko te Aliki.”