IOPU 6 - Tuvalu Revised Bible

1-2Moi ne fua oku fakalavelave mo puapuaga i se fua mea mafa.

3E penei e mafa atu i one o te tai,

Tela la, aku muna kona ne fai valevale atu ke mo a eiloa e 'poi ei koutou.

4A te Atua Malosi ne velo ne ia au ki matasana,

A te poisini o matasana ko salalau i toku foitino.

Ko oti ne fakatoka ne te Atua ana meatau fakamataku ke ta ei au.

5A te asini e malie i te kai o mouku,

A te pulumakau e filemu foki manafai e kai ki kausaito.

6Kae ko oi te tino e mafai ne ia o kai a meakai seai se manogi, meakai seai se masima i ei?

Se a te gali i te mea kena o te fuamoa?

7E seai soku fiakai ki vaega meakai pena,

A mea katoa e kai ne au e masaki fua ei au.

8Ai a e se aumai ei ne te Atua ki a au a te mea e manako au ki ei?

Ai a seki tali mai ei a ia ki taku talo?

9E sili atu moi ne na tamate ne ia a au!

10Moi ne iloa ne au me ka tamate ne ia a au,

Penei au e eva eiloa ki luga i te fiafia,

Faitalia eiloa te lasi o toku mae.

E iloa ne au i te Atua e malu; e seki 'teke eiloa ne au se fakatonuga a ia.

11Tefea toku malosi e mafai ei au o toe ola ke tai leva atu?

Ai a e fia ola ei au manafai ko seai soku fakamoemoega?

12E a, au nei ne faite ki fatu? A toku foitino nei se palasi?

13Ko seai soku malosi e toe ke fakasao ei au;

E seai eiloa se koga e mafai o maua mai i ei soku fesoasoani.

14I taimi o fakalavelave penei, au e manako ki taugasoa fakamaoni faitalia me ko oti ne tiaki ne au a te Atua io me ikai.

15Ka ko koutou, oku taugasoa, ko fakatogafiti ne koutou a au,

E pela me ne vaitafe foliki kola ko masa pakupaku me ko seai ne vaiua.

16A vaitafe foliki ko pono ne te kiona,

17Kae i te taimi ko vela ei te aso, ko 'galo atu ei,

Mo takele papa o vaitafe foliki ko tuku faka'sau mai,

Me ko masa pakupaku.

18A tino olo malaga ko galo i te ologa o sala a vai;

Ko tekateka fua latou i te toafa,

Mate atu foki eiloa i ei.

19A tino olo malaga mai Seepa mo Tema ne salasala ki vai,

20Kae ko gata eiloa olotou fakamoemoega i te mauaga ne latou a vaitafe foliki e masa pakupaku fua.

21A koutou e pela eiloa mo vaitafe foliki kona,

E lavea ne koutou te ikuga ka oko ki a au,

Ko koutou eiloa ko tele ki tua i te mataku.

22E a, kai fakamolemole atu eiloa a au ke aumai se meaalofa?

E a, kai togi fakakolekole eiloa ne au a se tino mō soku lei?

23Io me ke fakasao ne ia a au mai soku fili?

24Ko lei, akoako mai au; taku mai a mea e 'se ei au.

Au ka filemu kae fakalogologo atu eiloa ki a koutou.

25A muna tonu e gali i te fakalogo, ka ko koe e faipati valea fua.

26A koutou e leake nei i a au e soona faipati valevale fua, pela fua me se matagi;

Ai a la ne tali mai ei koutou ki pati ne fai ne au ona ko toku puapuaga?

27E mafai foki eiloa ne koutou o puke a pologa kola e seai ne matua,

Kae fakatogafiti ne koutou a otou taugasoa pili eiloa, ko koutou ke maumea!

28Kilo mai ki oku mata. Au e se loi.

29Ko to silia tau mea ne fai. Fakagata nei tou fai mea se tonu.

Sa fakamalaiagina au. Au e nofo i te auala tonu.

30A koutou e leake nei i a au e loi, koutou e mafaufau pela me e se iloa ne au te mea lei mo te mea masei?