HOSEA 2 - Tuvalu Revised Bible

1Tela la, fakaigoa otou taina Isalaelu ko “Te Fenua o te Atua” mo “E Alofagia ne te Aliki”.

Ko Komeli se Fakamaoni — Ko Isalaelu se Fakamaoni

2Aku tama, faipati faka'lei aka ki te otou matua — a ia nei ko se fai mo aku avaga. Fakamolemole atu ki a ia ke fakagata tena mulilua mo tena tali tagata.

3Kafai e se fakagata, ka fakanofo fuafua ne au a ia e pela eiloa mo te taimi ne fatoa fanau mai ei a ia. Ka fai ne au a ia ke pela me se fenua seai ne vai kae se ola lakau i ei, kae ka mate a ia i te fia inu.

4-5Ka se alofa au ki ana tamaliki; me ne tamaliki fua a te fafine tali tagata tena. Muna a te fafine tena penei: “Au ka fano ki oku fiafaiga, me e aumai ne latou ki a au a mea'kai mo meainu, fulufulu o manu mo lino, pela foki mo sinu olive mo uaina.”

6Tela la, ka 'pui ne au a ia fakatasi mo lakau makai'kai, kae faite se pui e fakamao atu ei a ia keatea.

7Ka tautali a ia i tua o ana fiafaiga kae ka se maua eiloa ne ia. Ka salasala ne ia, kae ka se maua eiloa ne ia a latou. Tena ka fai aka ei a ia penei, “Au ka foki ki taku avaga muamua — e sili atu toku nofo 'lei i ei i lo taimi nei.”

8E se iloa lele eiloa ne ia me ko au tela ne tuku ne au ki a ia a saito, uaina, sinu olive, ke oko eiloa ki siliva mo aulo kola ne fakaaoga ne ia i ana tapuakiga ki a Paala.

9Tela la, kafai e oko ki te taimi e tau ei o kati a saito, ka toe puke mai ne au a saito mo uaina kola ne fakameaalofa atu ne au ki a ia, e pela foki mo fulufulu o manu mo lino kola ne tuku ne au ki a ia mo fai ana gatu.

10Ka ave keatea ne au ona gatu ko te mea ke nofo fuafua a ia i mua o ona fiafaiga, kae ka seai se tino e mafai ne ia o fakasao a ia mai i toku malosi.

11Ka fakagata ne au ana fakafiafiaga katoa — ko ana aso lasi i tausaga takitasi mo masina takitasi, mo ana aso fakamanatu i Sapati — ke oko eiloa ki ana fakapotopotoga faka-te‐lotu.

12Ka fakamasei ne au ana vine e pela foki mo ana lakau ko mati ke liu toga vao; ko manu lata vao ke fakamasei ne latou.

13Ka fakasala ne au a ia e tusa mo taimi kola ne puli saale ei au i a ia, kae sunu ana taulaga manogi ki a Paala kae fakagaligali aka tena foitino ki teuga taua, o fano o tautali saale i ana fiafaiga. Ko te Aliki tena ne faipati atu.

Ko te Alofa o te Aliki mō tena Fenua

14Ka toe ave ne au a ia ki te koga lavaki; kae i kona ka toe fakafoki mai ne au a ia ki a au ki aku muna alofa.

15 .

17Ka se toe talia ne au a ia ke takutaku te igoa o Paala.

18I te taimi tena, ka toe fai ne au a te feagaiga mo manu vao mo manu eva, ko te mea ke se toe fakapa'kia ne latou oku tino. Ka toe ave keatea ne au a olotou mea tau mai te fenua, ko pelu katoa mo kausana, kae ka nofo oku tino mo te filemu mo te saogalemu.

19Isalaelu, ka fai ne au a koe ko taku avaga;

Au ka fakamaoni eiloa ki a koe;

Au ka alofa tonu atu ki a koe

Kae fai koe ko taku avaga ki te se gata mai.

20Ka tausi ne au taku feagaiga kae fai ne au a koe mo oku,

Kae ka talia foki ne koe i a au ko te Aliki.

21-22I te taimi tena, ka tali ne au a talosaga a toku fenua ko Isalaelu. Ka fai ne au a vaiua ke to ki te laukele, Kae ka ola a saito mo vine mo olive i te laukele.

23 Loma 9.25; 1Pete 2.10 Ka fakanofo ne au oku tino i te fenua,

Kae fakamanuia a latou.

Ka fakaasi ne au toku alofa ki a latou kola ne fakaigoa ko “Se Alofagia,”

E pela foki ki a latou kola ne fakaigoa ko “Se Ko Oku Tino.”

Ka fai atu au penei, “A koutou ko oku tino,”

Kae ka tali mai a latou penei, “A koe ko te motou Atua.”