Ecclesiasticus (Sirach) 45 - William Morgan Bible with Apocrypha, 1959 Edition

1Ac efe a ddug allan ohono ef ŵr trugarog, yr hwn a gafodd ffafr yng ngolwg pob cnawd, sef Moses, yr hwn oedd hoff gan Dduw a dynion, yr hwn y mae ei goffadwriaeth yn fendigedig.

2Efe a’i gwnaeth ef yn debyg i’r saint gogoneddus, ac a’i mawrygodd ef, gan beri i’w elynion ei ofni ef.

3Trwy ei eiriau ef y gwnaeth efe i ryfeddodau beidio, ac a’i gwnaeth ef yn ogoneddus yng ngolwg brenhinoedd: efe a roddes gydag ef orchymyn i’w bobl, ac a ddangosodd iddo ran o’i ogoniant.

4Efe a’i sancteiddiodd ef yn ei ffyddlondeb a’i larieidd-dra, ac a’i dewisodd ef o blith yr holl ddynion.

5Efe a wnaeth iddo glywed ei lais ef, ac a’i dug ef i’r cwmwl tywyll ac a roddes orchmynion o’i flaen ef, sef cyfraith bywyd a gwybodaeth; fel y dysgai efe y cyfamod i Jacob, a’i farnedigaethau i Israel.

6Efe a ddyrchafodd Aaron y sanct tebyg iddo ef, ei frawd o lwyth Lefi.

7Efe a wnaeth ag ef gyfamod tragwyddol, ac a roddes iddo offeiriadaeth ymysg y bobl: efe a’i gwnaeth ef yn ddedwydd mewn harddwisg, ac a’i gwisgodd ef â gwisg ogoneddus.

8Efe a’i gwisgodd ef â gogonedd cyflawn, ac a’i gwregysodd ef ag offer cadernid, â llawdr, â gwisg laes, ac ag effod.

9Efe a’i hamgylchodd ef a phomgranadau, ac â chlych aur lawer o amgylch, i seinio pan gerddai efe, i wneuthur sŵn a glywid yn y deml, ac i fod yn goffadwriaeth i feibion ei bobl ef;

10A gwisg sanctaidd o aur, â sidan glas, â phorffor ac amryw waith, â dwyfronneg barn, ag arwyddion gwirionedd,

11Ac â gwaith cywraint o sgarlad plethedig, ac â meini gwerthfawr wedi eu cerfio fel sêl, a’u gosod mewn aur trwy waith eurych, ag ysgrifen wedi ei cherfio, er coffadwriaeth, yn ôl nifer meibion Israel.

12Ar y meitr y gosodasai efe goron o aur, yn yr hon y cerfiesid Sancteiddrwydd, yn harddwch anrhydeddus, yn waith godidog, yn hyfryd i’r llygaid, yn hardd ac yn deg.

13Ni bu y fath o’i flaen ef; ac erioed ni wisgodd neb dieithr hwynt, ond ei feibion ef bob amser.

14Dwy waith yn y dydd yn wastadol y poethoffrymir eu haberthau hwynt.

15Moses a’i cysegrodd ef, ac a’i heneiniodd ag olew sanctaidd: a hyn a wnaed yn gyfamod tragwyddol iddo ef ac i’w had, cyhyd ag y parhao’r nefoedd, gael ohonynt ei wasanaethu ef, ac offeiriadu hefyd, a bendithio’r bobl yn ei enw ef.

16Efe a’i dewisodd ef o flaen pob dyn byw, i offrymu offrwm i’r Arglwydd, myctarth a pherarogl er coffadwriaeth, i wneuthur cymod dros y bobl.

17Efe a roddes iddo ei orchmynion, ac yng nghyfamod y gyfraith awdurdod, i ddysgu ei dystiolaethau ef i Jacob, ac i egluro ei gyfraith ef i Israel.

18Dieithriaid a gydsafasant i’w erbyn ef, ac a genfigenasant wrtho ef yn yr anialwch, sef y gwŷr oedd gyda Dathan ac Abiram, a chynulleidfa Core, mewn llid a dicter.

19Yr Arglwydd a welodd hyn, ac ni bu fodlon; a hwy a ddifethwyd yn llidiowgrwydd ei ddicter ef: efe a wnaeth arnynt wyrthiau, gan eu difetha â fflam dân.

20Eithr efe a roddes ychwaneg o ogoniant i Aaron, ac a roddes iddo etifeddiaeth; blaenffrwyth y cyntaf-anedig a rannodd efe iddo; yn enwedig efe a arlwyodd ddigon o fara:

21Oblegid y maent hwy yn cael bwyta o aberthau’r Arglwydd, y rhai a roddes efe iddo ef ac i’w had.

22Eithr ni roddes efe etifeddiaeth iddo ef o dir y bobl, ac nid oedd iddo etifeddiaeth ymysg y bobl: oblegid efe ei hun yw rhan ei etifeddiaeth ef.

23Phinees mab Eleasar oedd y trydydd mewn gogoniant; am iddo ddwyn sêl yn ofn yr Arglwydd, a sefyll i fyny ag ewyllys da a pharod, a gwneuthur cymod dros Israel, pan droesai’r bobl ymaith.

24Am hynny y gwnaeth efe ag ef gyfamod heddychlon, y câi efe fod yn bennaf ar y cysegr ac ar ei bobl, fel y byddai braint yr offeiriadaeth iddo ef ac i’w had byth:

25Yn ôl y cyfamod a wnaethid â Dafydd mab Jesse o lwyth Jwda, y byddai etifeddiaeth y brenin i’w epil ef yn unig; ac y byddai etifeddiaeth Aaron i’w had ef yr un modd.

26Rhodded Duw ddoethineb yn eich calon chwi, i farnu ei bobl ef yn gyfiawn, fel na ddileer eu daioni hwynt, ac y parhao eu gogoniant trwy eu cenedlaethau.