1Yn ddiau da yw DUW i Israel; sef i’r rhai glân o galon.
2Minnau, braidd na lithrodd fy nhraed: prin na thripiodd fy ngherddediad.
3Canys cenfigennais wrth y rhai ynfyd, pan welais lwyddiant y rhai annuwiol.
4Canys nid oes rhwymau yn eu marwolaeth; a’u cryfder sydd heini.
5Nid ydynt mewn blinder fel dynion eraill; ac ni ddialeddir arnynt hwy gyda dynion eraill.
6Am hynny y cadwynodd balchder hwynt, ac y gwisg trawster amdanynt fel dilledyn.
7Eu llygaid a saif allan gan fraster: aethant dros feddwl calon o gyfoeth.
8Y maent wedi llygru, yn chwedleua yn ddrygionus am drawster; yn dywedyd yn uchel.
9Gosodasant eu genau yn erbyn y nefoedd: a’u tafod a gerdd trwy y ddaear.
10Am hynny y dychwel ei bobl ef yma; ac y gwesgir iddynt ddwfr ffiol lawn.
11Dywedant hefyd, Pa fodd y gŵyr DUW? a oes gwybodaeth gan y Goruchaf?
12Wele, dyma y rhai annuwiol, a’r rhai sydd lwyddiannus yn y byd, ac a amlhasant olud.
13Diau mai yn ofer y glanheais fy nghalon, ac y golchais fy nwylo mewn diniweidrwydd.
14Canys ar hyd y dydd y’m maeddwyd; fy ngherydd a ddeuai bob bore.
15Os dywedwn, Mynegaf fel hyn; wele, â chenhedlaeth dy blant di y gwnawn gam.
16Pan amcenais wybod hyn, blin oedd hynny yn fy ngolwg i;
17Hyd onid euthum i gysegr DUW: yna y deellais eu diwedd hwynt.
18Diau osod ohonot hwynt mewn llithrigfa, a chwympo ohonot hwynt i ddinistr.
19Mor ddisymwth yr aethant yn anghyfannedd! pallasant, a darfuant gan ofn.
20Fel breuddwyd wrth ddihuno un; felly, O Arglwydd, pan ddeffroech, y dirmygi eu gwedd hwynt.
21Fel hyn y gofidiodd fy nghalon, ac y’m pigwyd yn fy arennau.
22Mor ynfyd oeddwn, ac heb wybod; anifail oeddwn o’th flaen di.
23Eto yr ydwyf yn wastad gyda thi: ymaflaist yn fy llaw ddeau.
24A’th gyngor y’m harweini; ac wedi hynny y’m cymeri i ogoniant.
25Pwy sydd gennyf fi yn y nefoedd ond tydi? ac ni ewyllysiais ar y ddaear neb gyda thydi.
26Pallodd fy nghnawd a’m calon: ond nerth fy nghalon a’m rhan yw DUW yn dragywydd.
27Canys wele, difethir y rhai a bellhânt oddi wrthyt: torraist ymaith bob un a buteinio oddi wrthyt.
28Minnau, nesáu at DDUW sydd dda i mi: yn yr Arglwydd DDUW y gosodais fy ngobaith, i draethu dy holl weithredoedd.
Who We AreWhat We EelieveWhat We Do
2025 by iamachristian.org,Inc All rights reserved.
