1A phan glywsant hwy, y rhai oedd yn y pebyll, hwy a synasant oherwydd y weithred.
2Ac ofn a dychryn a syrthiodd arnynt, fel nad oedd neb mwyach a allai aros yn wyneb ei gilydd, eithr yn wasgaredig y ffoesant o unfryd i holl ffyrdd y gwastadedd a’r mynydd-dir.
3A’r rhai a wersyllasant yn y mynyddoedd o amgylch Bethulia a ffoesant. Yna meibion Israel, sef pob rhyfelwr ohonynt, a ruthrasant arnynt hwy.
4Yna Oseias a anfonodd i Bethomasthem, ac i Bebai, ac i Chobai, ac i Chola, ac i holl derfynau Israel, rai i fynegi iddynt yr hyn a ddarfuasai, ac i beri iddynt hwy oll ruthro ar y gelynion, i’w difetha hwynt.
5A phan glybu meibion Israel, hwy a ruthrasant oll o unfryd i’w herbyn hwynt hyd Choba. Felly hefyd y rhai a ddaethai o Jerwsalem, ac o’r holl fynydd-dir, (canys rhai a fynegasai iddynt hwy yr hyn a wnaethid yng ngwersyll eu gelynion,) a’r rhai oedd yn Galaad, ac yn Galilea, a’u hymlidiasant hwynt â phla mawr, nes iddynt fyned heibio i Damascus a’i hardaloedd.
6A’r rhan arall, y rhai oedd yn trigo yn Bethulia, a ruthrasant i wersyll yr Asyriaid, ac a’u hysbeiliasant hwy, ac a ymgyfoethogasant yn ddirfawr.
7A meibion Israel, y rhai a ddychwelasant o’r lladdedigaeth, a berchenogasant y gweddill: a’r trefydd a’r dinasoedd, y rhai oedd yn y mynydddir, ac yn y dyffryndir, a gawsant anrhaith fawr: canys eu lliaws oedd fawr iawn.
8Yna Joacim yr archoffeiriad, a henuriaid meibion Israel, y rhai oedd yn trigo yn Jerwsalem, a ddaethant i edrych y daioni a wnaethai Duw i Israel, ac i gael gweled Judith, ac i ymddiddan yn heddychlon â hi.
9A phan ddaethant hwy ati, hwy a’i bendithiasant hi o unfryd, ac a ddywedasant wrthi, Ti yw dyrchafiad Jerwsalem; ti yw mawr ogoniant Israel; ti yw mawr barch ein cenedl ni;
10Canys ti a wnaethost hyn oll â’th law; ti a wnaethost ddaioni ag Israel: a Duw sy fodlon iddynt. Bendigedig fyddych di gan yr hollalluog Arglwydd byth yn dragywydd. A’r holl bobl a ddywedasant, Felly y byddo.
11A’r bobl a ysbeiliasant y gwersyll dros ddeng niwrnod ar hugain. A hwy a roddasant i Judith babell Oloffernes, a’i holl lestri arian, a’r gwelyau, a’r cawgiau, a’i holl ddodrefn ef: a hi a’u cymerth hwynt, ac a’u gosododd ar ei mul, ac a baratôdd ei menni, ac a’u llwythodd arnynt.
12Yna holl wragedd Israel a redasant ynghyd i’w gweled hi, ac a’i bendithiasant, ac a wnaethant ddawns yn eu mysg eu hunain iddi hi: a hi a gymerodd ganghennau yn ei dwylo, ac a’u rhoddes hefyd i’r gwragedd oedd gyda hi.
13Hwythau hefyd a’i coronasant hi ag olewydd, a’r hon oedd gyda hi: a hi a aeth o flaen yr holl bobl mewn dawns, gan arwain yr holl wragedd: a holl wŷr Israel a ganlynasant yn arfog, â choronau ac â chaniadau yn eu geneuau.
Who We AreWhat We EelieveWhat We Do
2025 by iamachristian.org,Inc All rights reserved.
