Vakatakila 21 - Ai Vola Tabu (Vakadewa Makawa Vakavoutaki 2021)（FRV21）

Na Lomalagi Vou kei na Vuravura Vou

1 Aisea 65.17; 66.22; 2Pita 3.13 Ia ka'u a raica na lomalagi vou kei na vuravura vou; ni sa takali na lomalagi makawa kei na vuravura makawa; ia sa segai sara na wasawasa.

2Aisea 52.1; 61.10; Vtaki 3.12Ia koi au ko Joni, au a raica na koro tabu, ko Jerusalemi vou, sa lako sobu mai vua na Kalou mai lomalagi, a sa ukucavu me vaka na goneyalewa sa ukucavu me lako vua na watina.

3Isi 37.27; Vsoro 26.11,12Ia ka'u a rogoca e dua na domo levu mai lomalagi, sa kaya,

“Raica, a vale ni Kalou sa tu vei ira na tamata.

Ia ena tiko vata kei ira ko koya,

ia era na nona tamata,

ia ko koya na Kalou ena tiko vata kei ira, me nodra Kalou.

4 Aisea 25.8; Aisea 35.10; 65.19 Ia na Kalou ena tavoya tani kecega na wai ni mata mai na matadra.

Ia ena sega tale na ciba,

se na rarawa, se na tagi, ka na sega tale na vutugu,

ni sa takali tani na ka makawa.”

5Sa qai vosa ko koya sa tiko e nai tikotiko-vakaturaga, “Raica, au sa vakavouya na ka kecega.” A sa kaya vei au ko koya, “Vola oqo, ni sa vosa mana oqo ka dina.”

6Aisea 55.1A sa kaya vei au ko koya, “Sa qaravi oti! Oi au na Alifa kei na Omeka, nai vakatekivu kei nai vakataotioti. Au na solia wale vua sa viagunu na wai mai nai vurevure ni wai ni bula.

72Samu 7.14; Same 89.26,27O koya sa gumatua ena rawata na ka kecega oqo, ka'u na nona Kalou koi au, ia ena luvequ ko koya.

8Ia ko ira na daurere, kei ira e vakatitiqa, kei ira era vakasisila, kei ira na daulaba, kei ira na dauveidauci, kei ira era kila ka-vakatevoro, kei ira sa dausoro ki na veimatakau, kei ira na daulasu kecega, sa votai vei ira na nodra i votavota e na drano sa caudre kina na buka kei na sulifure, ka oqo nai karua ni mate.”

Na Raivotu me Baleti Jerusalemi Vou

9Sa qai lako mai vei au e dua vei iratou na agilosi e lewe vitu, eratou sa taura na bilo e vitu sa sinai e na mate ca ena muri sara mai, a sa vosa vei au, ka kaya, “Lako mai ki ke, au na vakatakila vei iko na goneyalewa, na wati ni Lami.”

10Isi 40.2A sa kauta na yaloqu ko koya ki na dua na ulunivanua levu ka cecere, a sa vakatakila vei au na koro levu, ko Jerusalemi savasava, sa lako sobu mai lomalagi mai vua na Kalou,

11a sa tu kina nai ukuuku ni Kalou, ka kena rarama e vaka na vatu kunekunei dredre sara, me vaka na vatu jasipa, sa rairai makare vinaka me vaka na karisitala.

12Isi 48.30-35Ia na kena bai e levu ka cecere, a sa tinikarua na kena matamata-ni-koro, a sa lewe tinikarua na agilosi sa tu e na matamata-ni-koro, a sa volai kina na yacadra, ia oqori na yacadra na nodra yavusa e tinikarua na Isireli—

13e tolu na matamata-ni-koro sa donuya na tokalau, e tolu na matamata-ni-koro sa donuya na vualiku, e tolu na matamata-ni-koro sa donuya na ceva, ka tolu na matamata-ni-koro sa donuya na ra.

14Ia na kena yavu na bai ni koro sa tinikarua a sa tu kina na yacadra nai apositolo ni Lami e lewe tinikarua.

15 Isi 40.3 Ia sa taura e dua na gasau koula ko koya sa vosa vei au, me katuma kina na koro, kei na kena matamata-ni-koro, kei na kena bai.

16Ia sa va na yasa ni koro, a kena balavu e tautauvata kei na kena raraba; a sa katuma na koro ko koya e na gasau, ka sa dua na udolu ka lima na drau na maile. Ia sa tautauvata na kena balavu kei na kena raraba kei na kena cecere.

17A sa katuma ko koya na kena bai, a kena kiupiti e dua na drau ka vasagavulu ka va, ia nai vakarau ni tamata sai koya nai vakarau ni agilosi.

18Aisea 54.11,12Ia na kena bai sa jasipa, ia na koro sa koula dina sara ga, me vaka nai iloilo makare.

19Ia na yavu ni bai ni koro sa vakaiukuukutaki e na veivatu talei kecega. Ai matai ni kena yavu na jasipa, ai karua na safairi, ai katolu na kalisetoni, ai kava na emeralita,

20ai kalima na satonikisa, ai kaono na satiusa, ai kavitu na karisolita, ai kawalu na perili, ai kaciwa na topasa, ai katini na karisopiraso, ai katinikadua na vatu karakarawa, ai katinikarua na amecisita.

21Ia na matamata-ni-koro sa caka e na mataniciva e tinikarua, ka sa dua na mataniciva sa caka kina na matamata-ni-koro yadua, ka sala koula vinaka sara na sala ni koro, me vaka nai iloilo makare sara.

22Ia sa sega na valenilotu ka'u a kunea kina, ni sa kena valenilotu ga na Kalou Kaukauwa kei na Lami.

23Aisea 60.19,20A sa sega ni yaga e na koro oqo na mata-ni-siga, se na vula, me cila kina, ia nai ukuuku ga ni Kalou sa vakararamataka, ka sa kena cina na Lami.

24Aisea 60.3Ena lako voli e na kena rarama ko ira na lewe ni veimatanitu, kei ira na tui kei vuravura era sa kauta mai na nodra i ukuuku me tu kina.

25Aisea 60.11Ia na kena veimatamata-ni-koro ena sega ni sogo e na siga—ka na sega talega e kea na bogi.

26Ia era na kauta mai me tu kina nai ukuuku kei na vakarokoroko ni veimatanitu.

27Aisea 52.1; Isi 44.9Ka sa sega sara e dua na ka eda vakasisilataka ena curu kina, se dua e kitaka na ka ca, se daulasu, ia ko ira ga era sa volai e na nona i vola ni bula na Lami.