2 Samuela Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala Taumada Nai Karua ni Vola i Samuela e semati ga mai nai Matai ni Vola i Samuela, ka vola i tukutuku ni nona veiliutaki vakatui ko Tevita me vakatekivu mai na nona liutaki ira na Juta mai na ceva (wase 1-4) me yacova sara na vanua taucoko ko Isireli, ka okati kina na matanitu ena vualiku (wase 5-24). Nai vola oqo e sa tukuni vakamatata kina na sasaga i Tevita me vakalevutaka cake na nona matanitu ka vakadeitaka na nona i tutu ena nona valuti ira na meca e lomai Isireli kei ira mai taudaku. Sa yalodina sara ka gumatua ena qaravi Kalou ko Tevita, ka sa rawa talega na yalodra e lewe vuqa na nona tamata. Ia, e kunei talega vua ni tamata voravora ena so na gauna, ka kitaka na cala bibi eso me rawata kina na lomana kei na veika lelevu e gadreva. Ia ena gauna sa dusimaka kina vua ko Necani na parofita i Jiova na nona cala, sa tusanaka sara na nona cala ka tu vakarau me ciqoma nai totogi ni Kalou ki vua.A lauti ira vakalevu na Isireli na bula kei na veika sa rawata ko Tevita. E yaco kina me ra dau vakasaqara e dua na luve i Tevita, oqori e dua e lako mai na kawa i Tevita ka vakataki koya me dabe ena i tutu vakatui ena gauna dredre era a sotava e muri.Na Lewe ni VolaNa nona liutaki Juta ko Tevita 1.1—4.12

Na nona liutaki Isireli taucoko ko Tevita 5.1—24.25

a. Nai tekitekivu ni veiyabaki 5.1—10.19

b. Ko Tevita kei Pacisepa 11.1—12.25

c. Na leqa kei na veika dredre eso 12.26—20.26

d. Na veitabayabaki e muri 21.1—24.25