2 Tui 22 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Josaia

1 Jere 3.6 Sa yabaki walu ko Josaia ni sa buli me tui, ka sa lewa tiko ko koya mai Jerusalemi me yabaki tolusagavulu-ka-dua. Ia na yaca i tinana ko Jitita, na luve i Ataia na kai Posikaci.

2A sa caka dodonu ko koya e na mata i Jiova, ka muria nai valavala kecega i Tevita na nona qase, ka sega ni lako tani ki nai matau se ki nai mawi.

Sa Kunea ko Ilikaia nai Vola ni Vunau

3Ia e na kenai katinikawalu ni yabaki i Josaia na tui, sa talai Savani ko koya na tui, o koya na luve i Asalaia, na luve i Mesulame, o koya na vunivola, ki na vale i Jiova, ka kaya,

4“Mo lako cake vei Ilikaia na bete levu, ka me sa wilika ko koya na siliva sa dau kau ki na vale i Jiova, o koya sa kumuna vata mai vei ira na tamata ko ira nai vakatawa-ni-katuba;

5ka me ra solia kivei ira era kitaka na cakacaka, io, vei ira era sa lewa na vale i Jiova; ka me ra solia ko ira kivei ira na tamata cakacaka era cakacaka tiko e na vale i Jiova, ko ira era vakavinakataka tiko na veitiki ni vale sa kabasu

6(vei ira na matai ni kau, kei ira era dautara vale, kei ira na matai ni vatu), me ra volia kina na kau kei na vatu sa ta, me vakavinakataki kina na vale.

72Tui 12.15Ia me kakua ni tarogi kivei ira e dua na ka vakaivola ni i lavo sa soli kivei ira, ni ra sa tamata daucakacaka vakadodonu.”

8A sa kaya ko Ilikaia na bete levu vei Savani na vunivola, “Au sa kunea nai Vola ni Vunau e na vale i Jiova.” A sa solia nai vola vei Savani ko Ilikaia, ka sa wilika ko koya.

9Sa qai lako vua na tui ko Savani na vunivola, ka sa tukutuku vua na tui, “Sa kumuna vata ko ira na nomuni tamata nai lavo ka kune e na vale, ka ra sa solia kivei ira era kitaka na cakacaka, io, ko ira sa lewa na cakacaka ni vale i Jiova.”

10A sa tukuna vua na tui ko Savani na vunivola, ka kaya, “Sa solia vei au e dua nai vola ko Ilikaia na bete.” A sa wilika ko Savani vua na tui.

11Ni sa rogoca ko koya na tui na vosa ni Vola ni Vunau, sa dresulaka na nona i sulu.

12A sa vakaroti Ilikaia na bete ko koya na tui, kei Eaikami na luve i Savani, kei Akipori na luve i Mekaia, kei Savani na vunivola, kei Asaia, e dua na tamata sa dauqarava na tui, ka kaya,

13“Dou lako, dou taroga vei Jiova e na vukuqu, e na vukudra talega na tamata, e na vukudra kece talega na Juta, na vosa ni vola oqo sa qai kune. Ni sa ka levu na cudru i Jiova sa waqa mai kivei keda, baleta ni ra sa sega ni vakarorogo ki na vosa ni vola oqo ko ira na noda qase, me ra cakava me vaka na ka kecega sa volai kivei keda.”

14A sa lako ko iratou ko Ilikaia na bete, kei Eaikami, kei Akipori, kei Savani, kei Asaia, kivei Ulita na parofita yalewa, na wati Salumi na luve i Tikiva, na luve i Ariasi, o koya sa daumaroroya nai sulu; (ia sa tiko ko koya mai Jerusalemi, e na kenai karua ni yasana;) a ratou sa veivosaki kaya.

15A sa kaya vei iratou ko koya, “Sa vosa vakaoqo ko Jiova na nodra Kalou na Isireli: ‘Dou kaya vua na tamata sa talai kemudou mai vei au,

16Sa kaya vakaoqo ko Jiova, Raica, ka'u na vakayacora na ca ki na tikina oqo, kivei ira talega era tiko kina—na vosa kecega ni vola sa wilika oti ko tui Juta.

17Ni ra sa biuti au ka sa vakama na ka boi vinaka ki na kalou tani eso, me vakacudrui au kina e na cakacaka kecega ni ligadra, o koya oqo ena waqa kina na noqu cudru ki na vanua oqo, ka na sega ni bokoci rawa.

18Ia dou kaya vua na tui Juta, o koya ka talai kemudou me tarogi Jiova, Sa kaya vakaoqo ko Jiova na nodra Kalou na Isireli: E na vuku ni vosa ko sa rogoca,

19ni sa veivutuni na lomamu, ka ko sa vakayalomalumalumutaki iko e na mata i Jiova, ni ko a rogoca na ka ka'u a kaya e na vuku ni tikina oqo, e na vukudra talega era tiko kina, ka me ra vakarusai, ka vatonaki me ra ca, ni ko sa dresulaka talega na nomu i sulu, ka tagi e mataqu, au sa vakarogoci iko talega koi au, sa kaya ko Jiova.

20Raica, e na vuku ni ka oqo, au na kauti iko yani kina vei ira na nomu qase, ia ko na kau e na vakacegu ki na nomu i bulubulu, ia ena sega ni raica na matamu na ka ca kecega ka'u na vakayacora ki na vanua oqo.’ ” A ratou sa la'ki tukuna vei koya na tui na vosa oqo.