1 Luke 4.27 Ia ko Neamani, na kavetani ni nona mataivalu na tui Siria, sa tamata vakaturaga e mata ni nona turaga, ka sa dokai ni sai koya ka vakabulai Siria kina ko Jiova. A sa tamata qaqa e nai valu, ia sa tauvi vukavuka.
2Ia era a lako yani vakaivalu eliu na kai Siria, ka kauta vakabobula yani e dua na goneyalewa lailai mai na nodra vanua na Isireli, ka sa dauqarava voli na wati Neamani ko koya.
3A sa kaya ko koya vua na nona marama, “Isa, ke la'ki tiko mada na noqu turaga vei koya na parofita mai Samaria! Ena vakabulai koya ko koya mai na nona vukavuka.”
4A sa lako ko Neamani, ka tukuna vua na nona turaga, ka kaya, “Sa vosa vakaoqo na goneyalewa, o koya sa kau mai na vanua ko Isireli.”
5Ka sa kaya ko tui Siria, “Mo vakarau, mo lako sara oqo, ka'u na vola e dua nai vola mo kauta vua na tui Isireli.” A sa lako yani ko koya, ka kauta vata kaya e tini na taledi siliva, e ono na udolu na koula, kei nai sulu me veisau kina vakatini.
6A sa kauta nai vola ko koya vua na tui Isireli, ka sa vaka, “Ni sa yaco vei iko nai vola oqo, raica, ka'u sa tala vei iko na noqu tamata ko Neamani, mo vakabulai koya mai na nona vukavuka.”
7Ia ni sa wilika oti nai vola ko tui Isireli, sa dresuka na nona i sulu, ka sa kaya, “Oi au beka na Kalou, me'u ia na veivakamatei kei na veivakabulai, sa talaki kina vei au na tamata oqo me'u vakabula e dua na tamata mai na nona vukavuka? Ia dou kila mada, ka raica, ni sa via vakatubu ca vei au ko koya.”
8Ia ni sa rogoca ko Ilaisa na tamata ni Kalou ni sa dresulaka na nona i sulu ko koya na tui Isireli, sa talaki vua na tui, ka kaya, “A cava ko sa dresulaka kina na nomu i sulu? Laiva me lako mai vei au ko koya, me kila kina ni sa tiko e dua na parofita e Isireli.”
9A sa lako mai ko Neamani kei na nona ose kei na nona qiqi vakaturaga, ka sa tu mai na katuba ni vale i Ilaisa.
10A sa tala e dua nai talaki vei koya ko Ilaisa, ka kaya, “Mo ni la'ki toni vakavitu e na Joritani, ena qai bula tale mai na lewemu, ia ko na savasava mai.”
11Ia sa cudru ko Neamani, ka lako tani, ka kaya, “Raica, ka'u sa nanuma ga ni na lako dina mai vei au ko koya, ka mai tu, ka masuta na yaca i Jiova na nona Kalou, ka yalovaka na ligana e cake e na tikina, ka vakabula na vukavuka.
12Sa sega li ni vinaka cake ko Epana kei Paripari, na uciwai mai Tamasiko mai na wai kecega ni Isireli? Me'u kua li ni sili kina, ka savasava mai?” A sa vuki rubu ko koya, ka lako vakacudrucudru yani.
13Ia sa toro voleka vua ko ira era sa qaravi koya, ka vosa vua, ka kaya, “Na tamaqu, kevaka sa vakarota vei kemuni e dua na ka levu na parofita, ko na sega li ni cakava? Ia sa dodonu vakalevu cake, ni sa kaya ko koya vei kemuni, ‘Mo sili, ka ko na savasava’?”
14Sa qai lako sobu ko koya, ka toni koya vakavitu e na Joritani, me vaka na nona vosa na tamata ni Kalou; ka sa bula tale na lewena me vaka na lewe ni gone lailai, ka sa savasava mai ko koya.
15A sa lesu tale ko koya vua na tamata ni Kalou, o koya kei ira kece na nona lewe ni sala, a sa la'ki tu ga e matana, ka kaya, “Raica, au sa qai kila ni sa sega e dua na Kalou e vuravura taucoko, e Isireli duaduaga; ia oqo, mo taura mada e dua nai loloma mai vei au na nomu tamata.”
16Ia sa kaya ko koya, “Me vaka sa bula ko Jiova, o koya ka'u sa tu e matana, ka'u na sega ni taura e dua na ka!” A sa cikecike ko koya me taura, ia sa bese ga ko koya.
17A sa qai kaya ko Neamani, “Kevaka ko sa sega ni via taura, ni yalovinaka me soli mada vei au na nomu tamata eso na qele me na colata rawa e rua na meule; ni'u na sega ni vakacabora tale koi au na nomu tamata nai soro kama, se dua nai madrali, vei ira na kalou tani, ia vei Jiova duaduaga.
18Me kakua ni cudruvi au na nomu tamata ko Jiova e na vuku ni ka oqo, ni sa curu na noqu turaga ki na burekalou i Rimoni me soro mai kina, a sa ravita na ligaqu, ia, ni ka'u sa cuva e na burekalou i Rimoni; io, ni ka'u sa cuva e na burekalou i Rimoni, me kakua mada ni cudruva na nomu tamata ko Jiova e na vuku ni ka oqo.”
19A sa kaya vua ko koya, “Mo lako e na vakacegu.”
Na Loma Kocokoco i KeasiIa ni sa lako vakalailai yani mai vua ko Neamani,
20a sa vaka ko Keasi, na cauravou i Ilaisa na tamata ni Kalou, “Raica, sa lomani Neamani oqo na kai Siria ko koya na noqu turaga, ka sega ni taura mai vua na ka sa kauta mai ko koya. Me vaka sa bula ko Jiova, ka'u na cicimuri koya, ka kauta mai vua e dua na ka.”
21A sa cicimuri Neamani ko Keasi. Ia ni sa raici koya ko Neamani ni sa cicimuri koya tiko, sa sobu mai na qiqi vakaturaga me la'ki tavaki koya, ka sa kaya, “E vinaka tiko li na ka kece, se segai?”
22A sa kaya ko koya, “Sa vinaka saka. Ia sa talai au ga mai na noqu turaga, ka kaya, ‘Raica, sa qai lako walega mai vei au e le rua na cauravou, mai vei ira na luvedra na parofita, mai na vanua veiulunivanua ko Ifereimi. Mo ni solia mada vei rau e dua na taledi siliva kei na rua nai sulu ni veisau.’ ”
23A sa kaya ko Neamani, “Sa vinaka, mo kauta e rua na taledi.” A sa cikevi koya, ka vauca e rua na taledi siliva e na taga e rua, kei na rua nai sulu ni veisau, ka tauca vei rau e le rua na nona tamata. A rau sa colata, ka rau sa liu vei Keasi.
24Ia ni sa yaco ko koya ki na vanua-cecere, a sa taura mai vei rau na taga, ka biuta e loma ni vale, ka talai rau yani na tamata, ka rau sa lako.
25A sa lako ko koya, ka tu e matana na nona turaga, ka sa kaya vua ko Ilaisa, “I Keasi, o sa lako mai vei?” A sa kaya ko koya, “E sega ni dua na vanua sa lako kina na nomu tamata.”
26A sa kaya vua ko koya, “Sa sega beka ni lako na yaloqu ni sa vuki lesu tale na tamata mai na nona qiqi vakaturaga me tavaki iko? Sa gauna li oqo mo taura kina na siliva, ka taura nai sulu, kei na olive, kei na loga-ni-vaini, kei na sipi, kei na bulumakau, kei ira na tamata, kei ira na vada?
27Ena ka oqo, ena kabiti iko kina na vukavuka i Neamani, ka vakakina ko ira na nomu kawa ka tawa mudu.” A sa lako tani ko koya mai vua ka sa tauvi vukavuka, sa vaka na uca-vulavula.
Who We AreWhat We EelieveWhat We Do
2025 by iamachristian.org,Inc All rights reserved.
