Same 97 - Ai Vola Tabu (Vakadewa Makawa Vakavoutaki 2021)（FRV21）

Na Lagilagi ni Nona Veiliutaki na Kalou

1Sa lewa ko Jiova! Me reki ko vuravura;

me marau na veiyanuyanu e vuqa!

2Sa vakavolivoliti koya na o kei na butobuto;

na yavu ni nona i tikotiko vakaturaga na yalododonu kei na lewa dodonu.

3Sa liu yani vei koya na bukawaqa,

ka sa vakamai ira na nona meca era vakavolivoliti koya.

4Sa vakararamataki vuravura na nona livaliva;

sa raica ko vuravura, ka sautaninini.

5Sa waicala na veiulunivanua e na mata i Jiova,

e na matai koya na Turaga kei vuravura taucoko.

6Sa vakatakila na nona yalododonu na lomalagi,

ka ra sa raica na nona i ukuuku na veimataqali kecega.

7Me ra vakamaduataki ko ira kecega era sa qarava na matakau ceuceu,

o ira sa daudokai ira e na matakau;

dou cuva vua, na kalou kecega.

8Sa rogoca ko Saioni, ka sa reki kina;

ka ra sa ladelade na goneyalewa ni Juta,

e na vuku ni nomuni lewa, i Jiova.

9Ni kemuni sa cecere sara, i Jiova, ki vuravura kecega;

o ni sa levu sara ka lailai na kalou kecega.

10Oi kemudou sa lomani Jiova, dou cata na ka ca;

sa maroroya ko koya na yalodra na nona tamata yalododonu;

sa vakabulai ira mai na liga ni tamata ca.

11Sa kaburaki na rarama me nodra na caka dodonu,

kei na marau me nodra sa dodonu na lomadra.

12Dou rekitaki Jiova, koi kemudou na yalododonu;

ka vakavinavinaka ni dou sa nanuma na nona yalosavasava.