Jope 27 - Ai Vola Tabu (Vakadewa Makawa Vakavoutaki 2021)（FRV21）

Sa Vakadeitaka Tikoga ko Jope na Nona Yalodina

1A sa tomana na nona i vakamacala ko Jope, ka kaya:

2“Me vaka sa bula na Kalou, o koya ka sa kauta tani na noqu dodonu,

kei Koya sa Kaukauwa, o koya ka sa vakararawataka na yaloqu,

3ni se tiko ga e lomaqu na noqu i cegu,

ka se tiko ga e na qara-ni-ucuqu na yalo ni Kalou,

4ena sega dina ni vosataka na ka ca na tebenigusuqu,

ka na sega ni cavuta na veivakaisini na yamequ.

5Me yawa tani sara vei au me'u vakadonui kemudou;

au na sega ni biuta tani vei au na noqu yalododonu me yacova sara na noqu mate.

6A noqu yalododonu ka'u sa taura matua, ka'u na sega ni biuta;

ena sega ni beitaki au na lomaqu e na veisiga kece ni noqu bula.

7“Me vakataki ira na tamata ca ko ira na noqu meca,

kei koya sa dauvorati au me vakataki ira na tawa dodonu.

8Ia ka cava na ka me vakanuinui kina ko koya na dauveivakaisini ni sa tagutuvi koya na Kalou,

ni sa kauta tani na nona bula na Kalou?

9Ena rogoca beka na Kalou na nona tagi

ni sa qai yacovi koya na ka rarawa?

10Ena kune marau li vei Koya sa Kaukauwa?

Ena daumasu tikoga li vua na Kalou e na veigauna?

11Au na vakavulici kemudou e na vuku ni liga ni Kalou;

au na sega ni vunia na ka sa tu vei Koya sa Kaukauwa.

12Raica, koi kemudou kecega dou sa raica oti;

ka qai cava ga dou sa qai sega tu kina ni macala?

13“Oqo na nona i votavota na tamata ca mai vua na Kalou,

kei na ka era na taukena ko ira nai valavala vakaukauwa mai vei Koya sa Kaukauwa.

14Kevaka sa vakalewevuqataki mai na luvedra, eratou na mate e nai seleiwau;

era na sega talega ni mamau e na madrai ko ira na nona kawa.

15Ko ira era vo tiko vua era na buluti e na mate,

ena sega talega ni tagicaki ira na nodra yada.

16E dina ga ni ra sa binia vata na siliva me vaka na kuvu-ni-soso,

ka binibinia cake nai sulu me vaka na qele—

17era na binibinia cake, ia era na vakaisulu ga kina na yalododonu,

ka ra na vota na siliva ko ira sa sega ni cala.

18Era sa tara na nodra veivale me vaka na sova ni manumanu,

ka vaka na vale tabanikau sa cakava nai vakatawa.

19Era sa koto sobu kei na nodra vutuniyau, ia era na sega tale ni kumuna vata;

era dolava na matadra, ka sa yali nai yau.

20Sa vauci ira na domobula me vaka na waluvu;

sa butakoci ira tani e na bogi na cava.

21Sa kauti ira tani na cagi ni tokalau ka sa lako tani sara ko koya;

sa caginataki ira tani vakaukauwa mai na nona vanua.

22Sa biliraki ira ka sega ni loloma;

era sa dro tani vakatotolo sara mai na nona kaukauwa.

23Ena vakasausau vua ko ira na tamata,

ka vakasiusiutaki koya tani mai na nona i tikotiko.