1Ia ni sa raica ko Pelami ni sa vinaka vei Jiova me vakalougatataki ira na Isireli, sa sega ni goleva tale, me vaka eliu, na ka ni veinita, ia sa vakanamata ga vaka ki na vanua lala.
2A sa ta cake ko Pelami, a sa raici ira na Isireli ni ra sa tiko vakayavusa; a sa curumi koya na Yalo ni Kalou.
3A sa lagata ko koya na nona i tukutuku, ka vaka:
“Nai tukutuku i Pelami, na luve i Piori,
io nai tukutuku ni tamata ka vakayadrati na matana,
4nai tukutuku i koya sa rogoca na vosa ni Kalou,
ka sa raica na raivotu i Koya na Kaukauwa,
sa bale sobu mai ka sega ni tabonaki na matana:
5sa ka talei na nomudou veivale laca, na Jekope,
na nomudou veivale ni tiko, na Isireli!
6Sa tevuki yani me vaka na veiloga niusawa,
ka vaka na veiwere mai na bati ni uciwai,
sa vaka na yasiyasi sa tea ko Jiova,
ka vaka na sitari e na bati ni wai.
7Ena nodra na veisaqa sa drodro mai kina na wai,
ia ena nodra na sila-tei e loma ni wai e vuqa;
ena levu na nodra tui, ka lailai ko Ekaki,
ia ena vueti cake na nodra matanitu.
8Sa kauti ira tani mai Ijipita na Kalou,
sa kaukauwa ko ira e vaka na iunikoni;
ena kania na veimatanitu era nodra meca
ka qurulaka na suidra,
ka suaka basika e na nona gasau.
9 Vteki 12.3; 49.9 Sa koto sobu, sa koto me vaka na laione,
ka vaka na laione yalewa; ko cei ena vakayadrata?
Sa kalougata ko ira yadua sa vosavakalougatataki iko,
ka me ra cudruvi ko ira yadua sa vatonaki iko.”
10Sa qai waqa mai vei Pelami na cudru i Pelaki, ka sa qumia vata na ligana. A sa kaya vei Pelami ko Pelaki, “Au a kacivi iko mo vatonaki ira na noqu meca, ka raica, ko sa qai vosavakalougatataki ira tale vakatolu oqo.
11Ia oqo, mo dro tani sara ki na nomu i tikotiko! Au a sa kaya oti, ‘Au na vakalevulevui iko vakaidina’; ia ka raica, sa vakadaroya ko Jiova mo kakua kina ni vakalevulevui.”
12A sa kaya vei Pelaki ko Pelami, “Au a sega beka li ni tukuna vei ira na nomu i talaki ko a tala vei au, ka vaka,
13‘Kevaka sa na solia mai vei au ko Pelaki na nona vale ka sa sinai kina na siliva kei na koula, au na sega ni sivia rawa na vosa i Jiova, me'u kitaka na ka vinaka se na ka ca e na lomaqu ga. A ka ga sa cavuta ko Jiova, oqori ga ka'u na cavuta’?
14Ia oqo, raica, ka'u sa lako vei ira na kai noqu. Me'u na vakatakila mada vei iko na ka era na cakava e na gauna mai muri na tamata oqo kivei ira na nomu tamata.”
Ai Kava ni Tukutuku i Pelami15A sa lagata ko koya na nona i tukutuku, ka kaya:
“Nai tukutuku i Pelami na luve i Piori,
nai tukutuku ni tamata ka vakayadrati na matana,
16nai tukutuku i koya sa rogoca na vosa ni Kalou,
ka kila nai vakavuvuli i Koya na Cecere Sara,
ko koya sa raica na raivotu i Koya na Kaukauwa,
sa bale sobu mai, ia sa sega ni tabonaki na matana:
17Au sa raici koya, ia e sega e na gauna oqo;
au sa vakanamata vua, ia e sega ni se voleka—
ena vura mai e dua na kalokalo mai vei Jekope,
ka tubu e dua nai titoko vakatui mai vei Isireli;
ena yavita na veiyalayala ni vanua ko Moapi,
ka vakawabokotaki ira kecega na luve i Seci.
18Ena taukeni Itomi ko koya,
ena taukeni Sia talega ko ira na nona meca,
ia ena gumatua ko Isireli.
19Ia ko koya sa daulewa ena lako mai vei Jekope,
ka vakarusai ira era sa vo e na veikoro!”
20A sa raici ira na Amaleki ko koya, a sa lagata na nona i tukutuku, ka kaya:
“Ko Amaleki ka liu taumada vei ira na veimatanitu,
ia na kenai tinitini na rusa vakaloloma sa tawa mudu.”
21A sa raici ira na Kenaiti ko koya, a sa lagata na nona i tukutuku, ka kaya:
“Sa kaukauwa na nomudou i tikotiko,
e na uluvatu sa caka na nomudou i mocemoce;
22ia ena malai yani na Kenaiti,
me yaco mada na gauna sa vakabobulataki kemudou kina na kai Asiria.”
23A sa lagata tale ko koya na nona i tukutuku, ka kaya,
“Ulei, ko cei me bula rawa ni sa kitaka na ka oqo na Kalou!
24Ia ena lako mai eso na waqa mai na baravi kei Kitimi,
ka vakararawataki Asiria, ka vakararawataki ira na Iperi,
ka na rusa laivi talega ko koya.”
25A sa cavu tu ko Pelami, ka la'ki lesu ki na nona i tikotiko. A sa lako talega e nona sala ko Pelaki.
Who We AreWhat We EelieveWhat We Do
2025 by iamachristian.org,Inc All rights reserved.
