1 Samuela 24 - Ai Vola Tabu (Vakadewa Makawa Vakavoutaki 2021)（FRV21）

Sega ni Vakamatei Saula ko Tevita e Loma ni Qara

1Ia ni sa lesu ko Saula mai na nona muri ira na kai Filisitia, sa qai tukuni vakaoqo ki vua, “Raica, sa tiko ko Tevita e na vanua lala mai Eni-keti.”

2A sa kauta ko Saula e le tolu na udolu na tamata sa digitaki mai vei ira kecega na Isireli, ka la'ki qarai Tevita kei ira na nona tamata e na dela ni Veivatu ni Me Kila.

3 A sa tiko ko Tevita kei ira na nona tamata e loma ni qara.

4A ra sa kaya vei Tevita ko ira na nona tamata, “Raica, oqo na siga sa tukuna kina vei iko ko Jiova, ‘Raica, au na solia na nomu meca ki na ligamu, ka ko na kitaka vua na ka e vinaka vei iko.’ ” A sa tu ko Tevita, ka kosova lo na bui ni sulu nei Saula.

5Ia ni sa oti oqori, sa qai veivutuni ka sa rarawa na loma i Tevita ni sa kosova na bui ni sulu nei Saula.

61Samu 26.11A sa kaya ko koya vei ira na nona tamata, “Sa vakatabuya ko Jiova me'u kitaka na ka vakaoqo vua na noqu turaga, o koya ka lumuta ko Jiova, ka me'u dodoka vua na ligaqu; ni sai koya nai lumuti i Jiova.”

7A sa tarovi ira na nona tamata ko Tevita e na vosa oqo, ka sega ni laivi ira me ra vakacacani Saula. A sa cavu tu ko Saula mai na qara, ka lako yani.

8A sa cavu tu e muri ko Tevita, ka curu yani mai na qara, ka kaci vei Saula, ka kaya, “Noqu turaga, na tui!” Ni sa rai yani ki muri ko Saula, a sa cuva sobu ko Tevita ka vakarokoroko.

9A sa kaya vei Saula ko Tevita, “A cava ko ni sa goleva kina na nodra vosa na tamata, ni ra sa kaya, ‘Raica, sa segata ko Tevita me vakacacani kemuni’?

10Raica, e na siga edaidai ko ni sa raica ni sa qai soli kemuni oqo ki na ligaqu mai na loma ni qara ko Jiova. A ra sa kaya eso me'u vakamatei kemuni, ia ka'u a lomani kemuni. Ka'u a kaya kina, ‘Au na sega ni dodoka na ligaqu me'u vakacacana na noqu turaga, ni sa lumuti koya ko Jiova.’

11Ia, na tamaqu, mo ni raica, io, mo ni raica na bui ni nomuni sulu e na ligaqu; ni'u a kosova na bui ni nomuni sulu, ka sega ga ni vakamatei kemuni, mo ni kila ka raica kina ni sa sega vei au na ca se na talaidredre. Au sa sega ni cakava e dua na ka ca vei kemuni, ia ko ni sa qarai au tikoga me'u mate.

12Me lewa mada vei kedaru ko Jiova, ka cudruvaki au ko Jiova e na vukumuni, ia ena sega ga ni tarai kemuni na ligaqu.

13Me vaka na vosa vakaibalebale sa daucavuta ko ira na qase eliu, ‘Sa tubu nai valavala ca mai vei ira na tamata i valavala ca.’ Ia ena sega ni tarai kemuni na ligaqu.

141Samu 26.20Sa lako mai me muri cei na tui Isireli? Ko cei ko ni sa ciciva mai? E dua na koli mate! E dua na kutu ni manumanu!

15Ia me qai vakatulewa ga ko Jiova, ka me lewa vei kedaru, ka raica, ka dautotaki au, ka vakabulai au mai na ligamuni.”

16Ia ni sa vosa oti vakaoqo vei Saula ko Tevita, sa kaya ko Saula, “A domomu beka oqo, i Tevita na luvequ?” A sa tagi cake vakadomoilevu ko Saula.

17Ka sa kaya vei Tevita ko koya, “O sa yalododonu ga, ka'u sa cala koi au; ni ko sa caka vinaka vei au, ia ka'u a caka ca vei iko.

18Ia ko sa vakatakila edaidai ni ko sa caka vinaka vei au, ni ko a sega ni vakamatei au, ni sa soli au ko Jiova ki na ligamu.

19Ia kevaka sa kunea na nona meca e dua na tamata, ena laivi koya li me lako vakavinaka yani? Ia me sauma vakavinaka vei iko ko Jiova na ka ko sa cakava vei au edaidai.

20Ia oqo, raica, au sa kila sa dina ni ko na tui, ka na vakataudeitaki vei iko na matanitu ko Isireli.

21Ia mo bubului mada vei au e na yaca i Jiova ni ko na sega ni vakawabokotaka na noqu kawa, ka sega talega ni bokoca na yacaqu mai na vale i tamaqu.”

22A sa bubului vei Saula ko Tevita. Sa qai lako yani ko Saula ki na nona vale; ia ko Tevita kei ira na nona tamata era sa lako cake ki na koro ni drodro.