Jeremaia 17 - Ai Vola Tabu (Vakadewa Makawa Vakavoutaki 2021)（FRV21）

Na Nodra i Valavala Ca na Juta kei na Kena i Totogi

1“A nodra i valavala ca na Juta sa ceuti tu e nai ceu kaukamea, e na mata ni taiamodi, ka sa ceuti tu ki na lomadra kei na tutuna balavu cake ni nomudou i cabocabo-ni-soro,

2ni ra sa vakananuma tiko ko ira na luvedra na nodra i cabocabo-ni-soro kei na nodra kalou yalewa e na ruku ni kau bulabula mai na veiulunivanua.

3Ko iko na noqu ulunivanua mai vanua, na nomu i yau, kei na nomu ka talei kece ka'u na solia me tokitaki ga, ia na nomu veiyasana cecere sa ia kina nai valavala ca, e na nomu i yalayala kecega.

4Ia ko iko talega, ko na kua so ni tiko e na nomu i tikotiko ka'u a solia vei iko, ia ka'u na lewai iko mo qaravi ira na nomu meca e na vanua ko sa lecava, ni sa dua na buka dou sa tutuvaka e na noqu cudru, ena waqa ka sega ni mudu.”

Na Veivosa Bibi e Cavuti

5Sa kaya vakaoqo ko Jiova:

“Ena ca na tamata sa vakararavi ki na tamata,

ka sa goleva na liga ni tamata,

ka sa lako tani mai vei Jiova na lomana.

6Ni na vaka na kau e na vanua dravuisiga ko koya,

ena sega ni kunea na vinaka ni sa yaco mai.

Ena tikotiko ga e na vanua mamaca e na loma ni vanua lala,

e na vanua masima sa sega ni tawa.

7“Sa kalougata na tamata sa vakararavi vei Jiova,

ka sa nuitaki Jiova ga.

8 Same 1.3 Ni na vaka na kau sa tei e na bati ni wai,

ia sa vakateteva na wakana ki na bati ni uciwai.

Ena sega ni kila ni sa yaco mai na katakata,

a drauna talega ena drokadroka tu;

ia e na yabaki ni dausiga ena sega ni nuiqawaqawa kina,

ena sega talega ni mudu ni vuavuai.”

9Sa ka dauveivakaisini duaduaga na yalo ni tamata;

ka sa dredre ni vinaka—

ko cei me kila rawa?

10 Same 62.12; Vtaki 2.23 “Koi au ko Jiova ka'u sa dikeva na loma ni tamata,

ka'u sa vakatovolea na kena ivi,

me'u solia ki na tamata yadua me vaka na nona i valavala,

me vaka na vua ni nona cakacaka.”

11 Me vaka na toa ni veikau sa saulaka na yaloka sa sega ni vakalutuma,

sa vakakina ko koya sa kumuna nai yau, ka segai e nai valavala dodonu;

ena laiva ga ko koya e na veimama ni nona bula,

ia e na kenai cavacava ena tamata lialia ga.

12Sai tikotiko vakaiukuuku ka cecere mai nai vakatekivu

na yasana ni neimami vale tabu.

13Koi kemuni Jiova, era dauvakararavi kina na Isireli,

ko ira kece era biuti kemuni era na madua ga;

ko ira era lako tani mai vei kemuni era na volai ga e na qele,

ka ni ra sa biuti Jiova na mata-ni-wai bula.

Sa Kerea ko Jeremaia na Veivuke i Jiova

14Mo ni tara na noqu mavoa, kemuni Jiova, ena qai mavo;

ni vakabulai au, ka'u na qai bula;

ni sai kemuni ka'u sa vakacaucautaka.

15Raica, era sa kaya vei au,

“Sa evei na vosa i Jiova?

Me yaco mada ga!”

16Ia koi au, ka'u a sega ni vakatotolo ni biuta na noqu i tavi ni vakatawa me'u muri kemuni;

ia na siga ca ka'u a sega ni gadreva.

Ko ni sa kila ga na ka sa lako tani mai na gusuqu;

ni sa tevuki ga e matamuni.

17Mo ni kakua ni vakadomobulataki au;

koi kemuni ga ka'u sa vakararavi kina e na siga ca.

18Me ra vakamaduataki ko ira era vakacacani au,

ia me'u kakua ni vakamaduataki koi au;

me ra taqaya ko ira,

ia me'u kakua ni taqaya koi au;

mo ni vakayacora vei ira na siga ca,

ia mo ni vakarusai ira e na rusa e vakaruataki.

Na Vakarokorokotaki ni Siga ni Vakacecegu

19Sa kaya vakaoqo vei au ko Jiova, “Mo la'ki tu e na Matamata-ni-koro ni Tamata, era dauveicuruyaki kina na tui Juta, e na matamata-ni-koro kece talega kei Jerusalemi;

20ka kaya vei ira, ‘Dou rogoca na vosa i Jiova, koi kemudou na tui Juta, kemudou kei na Juta kecega, kei na kai Jerusalemi kecega, sa daucuruma na veimatamata-ni-koro oqo.

21Nie 13.15-22Sa kaya vakaoqo ko Jiova: Dou qarauni kemudou, mo dou kakua ni colata nai kaukau e na Siga ni Vakacecegu, se kauta mai e na veimatamata-ni-koro ki Jerusalemi;

22Lako 20.8-10; Vrua 5.12-14dou kakua talega ni colata yani nai kaukau mai na nomudou veivale e na Siga ni Vakacecegu, se cakava e dua na cakacaka, ia dou vakatabuya ga na Siga ni Vakacecegu, me vaka ka'u a vakarota vei ira na nomudou qase.

23Ia era sega ni talairawarawa, se vakatu daligadra, era sa vakadomoqataki ira ga, me ra kakua ni vakarorogo, se me ra vakavulici.

24“ ‘Ia ena yaco, kevaka dou na vakarorogo sara vei au, sa kaya ko Jiova, mo dou kakua ni colata mai nai kaukau ki na veimatamata-ni-koro oqo e na Siga ni Vakacecegu, ka sa vakatabuya ga na Siga ni Vakacecegu, me kakua ni caka kina e dua na cakacaka,

25ena qai curu mai ki na veimatamata-ni-koro oqo ko ira na tui kei na turaga era sa tiko e nai tikotiko i Tevita, ka sa vodo e na qiqi-vakaturaga kei na ose, ko ira, kei na luvedra, kei ira na Juta, kei na lewe i Jerusalemi. Ia ena tudei ga na koro oqo ka tawa mudu.

26Ka ra na lako mai na veikoro vaka-Juta, kei na yasayasa vaka-Jerusalemi, kei na vanua i Penijamini, kei na buca, kei na vanua veiulunivanua, kei na mata ni ceva, ka kauta mai nai soro kama, kei nai soro, kei nai madrali laukana, kei na ka boi vinaka, ka kauta mai nai madrali ni vakavinavinaka, ki na vale i Jiova.

27Ia kevaka dou na sega ni vakarorogo vei au mo dou vakatabuya na Siga ni Vakacecegu, ka me kakua ni colata mai nai kaukau, ka curu ki na veimatamata-ni-koro ki Jerusalemi e na Siga ni Vakacecegu, ka'u na qai tutuvaka na buka e na kena matamata-ni-koro, ena kania na veivale vakaturaga mai Jerusalemi, ena sega talega ni bokoci.’ ”